Tapik attrapikwan muniraikpe: ¿namun puruku chintera?

Danielpe 10 pilamera tøkaik kuik køn incha pilaken atrik køn cáncer kuantrøtøka. Yawelø lata, doctoresmera lata øsik køntrapkeik kui nepua asik køn, inchentø nøpe kuantrø puraintraitamap isuik køn; nøpe kølirawa, cáncer kuantrøwan mø maramikwan wetøtramuitamap isuik køn. Cáncerpurap doctor ashchap attrap kui muniraik køn attrap misrape tru kualøm pumupen, Danielpe kullaarap menta, mam kualømyutø kuaik køn.

Ikwan waminchippe kan doctor wamintik køn, kuantrøtelaimpurap tapikwan muniramikwaimpurap kusrepik kuik køn. Inchippape, Danielwan latawai maik purayaikwan wamintik møra kuintrun. Kan køllikchikma kuantrø tsua kan yawik puntrapikwantø muniraik køn; pupen nepua ashape yantø kuapik køn. ¿Kuantraptik tsupentø chincha muniraik kø? ¿Møikkøpen køreimpala tapik attrapikwan muniraikpe tapik kø chintera?

Yam doctoresmera nøtrø kusrepelø trenchipelø køn, tapik attrapikwan muniraikpa, kalø pumøntraitamap isuikpe treek kuantrø warømø kasraktø waramikwan purukupik kui. Inchentø, misakpe mayampa treek isumelø køn; científicosmerainukkutri atrupik kømøtø ka wamtø kuitamap isupelø køn. Møiløpe treek isupelø køn, kuantrøpe isupiku kømøtø asru kui.

Møiløpe metrapsrønkutri treek isupelø køn tapik attrapikwan muniraikpe purukumíik kui. Dos mil pilamerasrø, kan kusrepik filósofo griego Aristóteleswan paik køn: “¿Tapik attrapikwan muniraikpe chi kø? cha”, nøpe trencha løtik køn: “Tapikwan muniramikpe kan piap lataiktø køn”. Mariktø kan Estados Unidos ik Benjamin Franklin trentaik køn: “Munirapikpe parøkuap kuantrun cha”.

Tru, ¿tapik attrapikwan muniraikpe chi kø? ¿Cierton tapik attrapikwan muniraikpe treek puntrauta? ¿Chiyukøpen purukupik kø chintera tapik attrapikwan muniraikpe? ¿Científicosmera kenamarikpe ciertøn puruku chintera?

¿Nam chincha palai pøntra tapik attrapikwan muniramik?

¿DANIEL cáncer tøkakuinuk tapik attrapikwan muniraimpe chi purepsrueira? ¿Cáncer purayaik kuimpe møya øsik uñipsruik kø chintera? Namken nepua ashmer, tapik attrapikwaimpurap nu nepua kusrepeløken nepua asha kømøn. Inchentø tapik attrapikwan muniraikpe, tapik kuinkucha chishtøpa tamartrap kuitamappe isumumik køn.

Televisiónyu Canal CBS Newsyu, doctor Nathan Cherney trentaik køn: “Mur kuantrø tøkar tapik attrapikwan muniraik, chishtø puraintraitamap isuikpe kalø pupik køncha. Treekkutri na asha kur, sralø kuantrø waramne keløma trenchipelø køn: ’Tapik attrapikwan ñi isuimpe kuantrøpe pestø purepsruintrun cha. Ñipe puraintraitamap isumuikkutri katøkucha kuantrø tsun cha’ trenchipelø køn. Trentamikpe latrø kalø køn”.

Kuam kuantrø tøkarpe kualømmørik mur trantrapelø køn; treekkutri kullaarawa muraraik inchipelø køn. Inchakutri yaweløpe nøtøwai chikøpen kalø marikkutri kuantrø tsuitamap isumøntrai purukupelø køn. Trupe, ¿tapik attrapikwan muniraikpe namun cierton puruku chintera?

Øø, purukupik køn. Doctor Cherneype kuam kuantrø tøkar warapelan mentra pusrkuai inchimøwai nøm srape warainuk kuantrøwan tamartrap kømø, tap warøntrai purukupik køn. Ikwan doctormera nepua asha køn tapik attrapikwan muniraikpe kuantrø warapelan lata, kuam kuantrø tøkarwan lata purukupik kui.

Tapik attrapikwan muniraikpe latrø tapik køn

Doctor W. Gifford-Jones trentaik køn: “Tapik attrapikwan muniraikpe asr tap køntrai purukupik lataik køn cha”. Nø nepua asik køn, tru kuantrø tøkar kuamik lamøtø palapelan mantø tap mørørantrai purukumik. Øyamay mara purukuikpe, kuam kuantrø tøkarwan kuamikwaimpurap tre mentra isumøntrai purukun. Nu kusrepelø 1989wai kenamarik køn, kuantrø warapelan tap kui mørørantrai purukuikpe mas yanakatik øsik warøntrai purukupik kui. Inchentø møiløpe treek kenamarmuik køn. Treek kuintøkucha, nu kusrepeløpe kenamarik køn, kuantrø warapelø tap mørørantrai purukuikwan utapeløpe, treek trømpøik isup pusrkuapik chikar kui, katøkanelø lataken kømø.

Katøkanpurap nepua ashkun, tapikwan attrapik munirapikwai mantrøpa kalø puntrapikwan munirapikwai mantrøpa maik kuikwan nepua ashchap. 1.300 møkelan paya mørik køn, nømui øsik amønaimpurap tapik attrapikwan munirapik kui, kape kalø puntrapikwan munirapik kui nepua ashchap. Diez pilamera puraipen katøyu nømuntøwai paya mørik køn. Tru møkelan paya mørinuk, 12%pe mantrau kuantrø tøkar kui, nepua asik køn. Truiløpe kalø puntrapikwan munirapelø kui kenamarik køn. Laura Kubzansky, kusrennøpik Salud y Conducta Social de la Facultad de Salud Pública Harvardyu, trentaik køn: “Møilø misakmera trenchipelø køn tapik attrapikwan muniraikpe kuantrø kømøntrai purukun cha. Inchen 1.300 møkelan paya mørinuk kenamaran, tapik attrapikwan muniraik purukupik kui mantrøwan mintishimøntrai”.

Møilø ikpurap kusrentrap nepua ashchap inchipelan nøm nepua asinuk misakmera kuantrø kurmap isupeløpe, cirugía maren latrø yanayu tammisrøpelø køn. Inchen møilø misakmera kuantrøkar kermap isupeløpe, latrø malla tammisrøpelø kui kenamaran. Inchen tapik puntrapikwan munirapeløpe latrø yana øsik amøñipelø kui. Katøkanpurappe, kenamaran køllik misakmeran tap wammera ketene nømui asrpe chish misrøpik kui. Inchawai, pøn pøl ejercicios marik lataik chish misrøpelø køn.

¿Tapik attrapikwan muniraikpa, tap isuikpa øsik amønainuk chincha purukupik kera? Doctoresmerapa, cientificosmerapa namui asru kape namui isuikwan tap nepua ashmelø køn, inchakutri kutike maik kuikwan newan eshkantrap kaiman. Por ejemplo, kan kusrennøpik neurologíayu trentaik køn: “Nam kasrak waraikpa, tapik attrapikwan muniraikpape latrø tapik køn cha. Kakentø namui asru tap mørørantrai purukupik kuikkutri. Trektøwai kan kan namui asrwan chish køntrai maramik køn”.

Møilø doctoresmerai, sicólogosmerai kape científicosmeraimpe ik isuikpe inchippape srøik kuintrun. Inchentø Biblian kusrepelaimpe treek kømøn. 3.000 pilamera metrapsrø rey Salomón Jeupa purukuiktøka treek pørik køn: “Mantrø latrø kasrakikpe tap mømera lataik køn, inchen kullaaraik mørørai inchene kuantrø misrøpik køn [cha]”. (Proverbios 17:22). ¡Ik eshkaikpe latrø tapik køn! Kakentø uyupe trenchimíik køn, tru mantrø latrø kasrakikpe pusrkuapikwan ketriku purørøpik køn cha. Treek kømøtø, masken trenchipik køn, kan “latrø tap mømera lataik køn [cha]”.

Tapik attrapikwan muniraikpe kan pastillas kuimpe, doctorpe ik pastillaswan tranøp sruintrun, ¿cierto? Inchentø, tapik attrapikwan muniraikpe namui øsik amønainuktø kømøtø, namuinuk chish kantø tap amøñintrainkucha purukupik.

¿Tapikwanpa kaløwanpa muniraikpe chi puntrera?

Nøtrø kusrepeløpe nepua asik køn, tapikwan munirapeløpe kualinuk, kusrenaninuk, eshekinuk latrø nu purukupik kui. Por ejemplo, lulam kusrenanøpeløpe tru ishumpur luløpelan, nøm maik mørørai kuikwan paya mørik køn. Nømasiktøwai maik mørøraikwan wamintik køn. Lulam kusrenanøpelø kuenta ketrik køn, tapik attrapikwan munirapikpe nøm lulinuk mur lultrai purukupik kui, inchene treek isumeløpe mur lulmelø kui. Trupe, ¿tapik attrapikwan muniraikpe mantø purukupik kø?

Møimpe waminchikun kaløwan muniraikpe chi pupik kui. 1960waisrø nepua asik køn, ushamerape katøkan ushamera kullaarapene nømkucha lata kullaarapelø kui. Incha pøs, misakmerankucha trektøwai puraipik kui nepua asik køn. Por ejemplo, møilø misakmeran kan latrø trømpøik wantrapikwan mørin karua trentaik køn, tru wantrapikwan pasrampunkaruntrappe botonmeran asentamik kui. Inchen mayeløpa nepua marik køn.

Katøkan misakmerapa trektøwai marik køn. Botonwan asentantrai, inchentø wantrapikpe pinømuik køn. Wantrapikpe pinømupen møiløpe yantø botonmeran asentamuik køn. Truyukutrimpe nepua asik køn, wantrapikpe pinømuik incha pinømupene nømpe yantø chikucha marmuik køn. Inchen, møiløpe katøkucha tapikwan muniraik køn srapekatik, wantrapik pasrampuntraitamap.

Doctor Martin Seligman, tapikwan muniramikwanpa, kalø puntramikwanpa trupurap mas nu nepua ashchap trantrik køn. Nøpe nepua asik køn, tru misakmera tap kømikwan munirapeløpe nømui øsik amønainuk chikøpen pupen tapik maramikpe latrø murik kui kape chikucha martrap kaimapelø kui. Seligmanpe trentaik køn: “Tru veinticinco pilamera kusrep atrinuk nepua asik køn cha, tru kaløwan munirapeløpe, nømuintøwai tapik pumik kui incha mas chikøpen trømpøik pupik kui”.

Møilø misakmerai inchippape ik isuikpe srøik kuintrun, inchentø Biblian kusrepelaimpe treek kømøn. Kan proverbio trenchipik køn: “¿Ñi mur kualømmerayu kullaaraik mørørapene mur pasramik paløntrun [cha]” (Proverbios 24:10). Treekwain køn, Bibliape tør kenamaran nam tap isua marmupene chikøpen marameløyu fuerzas kaapik kui. ¿Nampe chi maramik kø kalø puntrapikwan muniramøntrap incha tapik attrapikwan munirap tøkakøntrap?

[Yu pisikpe]

Tapikwan muniraikpe tap puntrun

Kalø puntrapikwan muniramøntrap, ¿chi martrap?

¿Chi isupik kuku kalø pupen? Nøtrø kusrepelø trenchipelø køn, ñun chikøpen kalø puinuk ñi tapikwan munirapik kui kape kaløwan munirapik kui, truyu ñi maik isupik kuikwan tørtø kenamaran. Inchentø, ¿møiløpe murik puinkucha chincha mur trantrapelø kø tapikwan munirantrap? ¿Inchen katøkaneløpe murik puinuk chinchatre trømpøik kullaarapelø kø?

Ñiken isu: kan lutø lantrap ipen trusrø pupene ñune tru lutøwan tranmøptinchene, ¿maik mørørai inchipsruku? Treek pupene ñipe isupsruintrun: “Manaken lutø wetøtramumøntrur cha. Chikucha martrap kaimapik servimíik kur cha”. Ñi øyeek isuape tap kømikwan munirapik kui kenamartrun.

Kalø puntrapikwan muniramøntrap, ¿chi martrap?

Srøkutri nepua asamik køn na maik isupikwan. Tap kømøtik isupik atrupene, ikwan ketrantrap mur trantramik køn. Isuntrainchik chincha kak taikwan, ¿cierton kø chintera naimpurap chikucha servimøwai, kape chi martrap kaimapik kui? ¿Kape empresayu pek lutø marøpik palaik kuik kø chintera?

Cierton purayelantø nepua ash, incha kalø puntraptikwan ñi munirap pasrøwape nepua ashmøta truilane. ¿Kan piejechiktø kaasikpe chikucha servimøwai kape chikucha marmíik kuintø trenta chintera? Kape isu ñui øsik unikwan, por ejemplo, Jeupawayelan marøp pasrainuk, lintinuk, yawelainuk, ilan nepua ashape: ¿chikucha martrap kaimapik kurmatitru? Manatøkucha latrø trømpøiktø puntraitamappe isumøta. ¿Kan pieje kaasikpe manaken lutø wetøtramøntrauta? ¿Maik isuku? Ikpurap mas wamintilø køn, nepua ashkunas mantø kalø puntrapikwan isumumik.

Nepua martrap isuikwan mantø tap puntrap kuikwan muniramik

Møilø nøtrø kusrepeløpe, ikwan maik køtashchap ashipelø wamintan, tapikwan muniraikpe nepua martrap isuilan maramtik køncha. Yu metrap ashchap kuim pala tapikwan muniramikpe iktø kømøn. Ikwan isupene namune latrø nu purukuntrapik køn. Nam nepuntrap isuilan ­maramtik køntrun.

Metrapwai chi maramikwan tap isumtik kuintrun, øyamay marene nepuntrap isuilan maramtik køntrun. Treek marmíik kuape, metrapwai martrap isumtik kuintrun. Kanpurappe: ¿ñikan isupik køtitru chikøpen nepua martrap? Namui øsik amønainuk purø nøtrø maramik køptø, tap nepua ashmuintrun chi mas latrø nuik kui maramik, nam øsik amønainuk. Ikwaimpurap metrapsrønkutri Tiuswai Wampe chishtø eshkawa pasrik køn, “chiwan mas tabig kui nebua ashibelø” kømik (Filipenses 1:10).

Namui øsik amønainuk chi mas nuik kui nepua ashen, trukutrimpe si nepuntrap isuilan maramtik køntrun. Pølpasrøpyutøpe latrø nøtrø nepua martrap isumukunas. Ñi treek martrainchape latrø malla kullaarantrun. Møi møi latrø nøtrø martrap isumøtø tsøntatø tsøntatø martrap isumik køn.

Møiløpe trenchipelø køn, maramtik køpik køncha nepua martrap trantrape, nepua maramikwan tørtø srua wape martrap mur trantramik køn. Ikwan martrappe tsøntatø isua tørtø srua kømik køn, nepua martrap isuilan tap puntraimpe. Inchentø murik atrupene kaimamumuitamappe isumøtø, metraptø yamik køn nepua martrap.

Trupe, tsøntatø isumik køn mantø nepua maramikwan. Kan pørøpik C. R. Snyder taik, tapik muniramikwaimpurap kusrepik, trenchipik køn nepua maramikwan tørtø tøkakuape mømaykøpen martrap isumik køn. Kan martrap trantrinuk, tap wepimupene pekmay martrap isua yunømaramtik kuintrun, inchippape mas tap wepintrun.

Snyder trentaik køn, nepua maramikwan tørtø tøkakømik køncha. Kan tap wepimupene chu uras yunømaramikwan. Nepua martrap trantramik nepuntrap kaimapene mentra isumumik køn, chipik køn kakentø nampe trunun isua kullaarantrun cha. Nepua maramikwan pekmay isua marene maramtik køntrun, treek marape tapikwan munirap pøntrøntrun.

Ikpurap Bibliayu kenamarøpik pasran, Rey Davidpe Jeupawai yawan martrap latrø køtrø isupik kuik køn, inchentø Jeupape trentaik køn: “Ñi kømøn cha nai yawan martrapikpe treek kømø ñui nusrkai Salomón køn cha”. Treek pupen, nøpe namik mørmøtø, masken nui isupikwan yunømarik køn, nui nusrkawan chi palapikwan tuliship kepia purukup mentik køn, Jeupawai yawan martrai isua (1 Reyes 8:17-19; 1 Crónicas 29:3-7).

Trupe, nam nepua maramikwan maramtik kuitamap isupene, tapik attrapikwan muniraikpe inchippa palailø køpreintrun. ¿Chinchatre øyeek kera? Kakentø namun tap kømøtik pupene tamartrap kaimantrun. Misakmeran latrø trømpøik purep pasrainuk isuntrun. Por ejemplo, waachamera kuinuk, misakmerapa pek misakmerapa latrø trømpøik kuayap kuinuk, sølkantø tap asha marmupen kape latrø trømpøik kuantrømera køpen, kuamik pupen, treek purep pasrainuk, ¿tapikwan muniramikwan mantø tøkakøntrap?

[Yu pisikpe]

Treek trantrap kuikwan muniraikwan tranmupene, ¿ñipe manaken lutø wetøtramøntrauta?

[Yu pisikpe]

Rey Davidpe tørtø nepua asha nø maramelan yunømarik køn

¿Tapikwan muniramik chu wetøtrantreira?

ÑIKEN isu, ñui reloj minchap pasrampuik kui, inchen ñipe reloj tap tamarøpelø køn taimpa srua ipene, treek køpene tap tamarmelø kuin køn. Wam mørtrun ñui reloj mintikwane ñui ya puluik marik kui, truyupe ñune anwain kømø tamartrap misrtrun. Ñipe tru relojwane ñui ya puluikwan tamartra chintrap sruaipsruintrun, ¿cierto?

Møimpe nepua ashkunas tapik muniramikpe kan reloj lataik køn. Na tapik muniraikwan trupiship pasraik kuenta peñape, ¿mun purukutra chipsruku? Kakentø møilantøkucha trektøwai mur kualømmera puraipik køn. Latrø nøtrø misakmera tapikwan muniramik tøkakøntrai purukuntrap inchipelø køn, inchentø nømpe purø nøtrø wamincha namun mas peløsrkøpelø køn. Namun Ellmara Pasrøpikwan tapik muniramikwan tranøpikwan keesha wamintikpe mas tap køpik køn. Tiuswai Wampe trenchipik køn: “Tiusbe møigweinuutøgucha chi yap pasrømøn cha” treekkutri nøpe namune purukuntraptøwai pasrapik køn (Hechos 17:27; 1 Pedro 5:7).

Tapikwan muniramik mas tørtø kenamarik

Biblia tapik attrapikwan muniraimpurap wamintikpe, mas latrø nu tør kenamarøpik køn científicosmera, médicosmera, psicólogosmera wamintik lataik kømøn. Hebreomay Griegomay Biblian pørentø tru “esperanzape”, attrapikwan latrø tap kui muniraik køncha pørik køpik køn. ¿Tapik attrapikwan muniraikpe maik kø? Kanyupe tapik puntraitamap isuik køn, paryupe tapik puntrapikwan kørewa pasraik køn. Bibliayu tapik martrap misrikpe wamintiktø kømøn, isa kømø, cierton kui kenamarikwan asha pøntrer.

Fewan nøtrø wamintilan køreiktø kømø, tapik puntrapikwan nepua asha kørewa pasraik, fepe ik køn (Hebreos 11:1). Bibliape tørtø kenamarøpik køn, tapikwan muniraikpa fepape pek køn cha (1 Corintios 13:13).

Ñipe ikwan isuntrik, ñima ñui trak linchipikwan purukutra cha miantrun kakentø ñipe ashipik kuintrun, latrø tammay kui, katøkanelan latrø køtrø purukupik kui. Treek kenamarikkutri ñikucha ñun purukuntraitamap isuintrun. Fepa tapikwan muniramikpa, treek lataitøwai køpentø, tap nepua ashene pek køn. ¿Tiuswan fetøka tapik munirap pøntramikwan tøkakøntrap mantø martrap?

¿Chincha tøkakøntrap tapik muniramikwan?

Cierton tapik puntrapikwan muniramikpe Jeupa Tiuswainukkutri atrupik køn. Metrapsrø Biblian pørøp uras wamik køpik køn “Israelwai tapikwan muniraik cha” (Jeremías 14:8). Nui misakmerape tapik muniramikwan Jeupawainukkutri atrupik kui kørepelø kuik køn. Tapik muniraikpe isuiktø kømuik køn, kakentø Jeupape latrø yana kenamarøp atrik køn, nø martrap misrikwan cierton nepua marik kenamarikkutri. Israelsrø Josuépe metrap pera aship pasrapik trentaik køn: “Ñimpe ñimui mantrø umpukutri tørtø nepua asha køn nø maik taikwan martrap misriløyu isa waminchimíik køn martrap misriløpe ñimun tap puntrai isua marilø køn” (Josué 23:14).

Latrø yana purep atrinkucha Jeupape nø maik kuikwan yunømarmíik køn. Bibliape latrø nøtrø martrap misrilan cierton nepua marik purayaik kui kenamarøpik køn. Kanmaype Bibliape mara pønsramik palainkucha cierton mara pønsraik lataik waminchipik køn inchawai Jeupa martrap misriløpe køremtik køn.

Treekkutri cierton tapik attrapikwan muniraikpe Bibliayukutri atrupik køn. Tius misakmeran latrø nøtrø purukuikwan nepua kusrepene, tapik munirap pøntraikpe namuinuk mas nurap intrun. Apóstol Pablope pørik køn: “Kaguende kerrigu tru merrabsrø Tiuswei wamyu pøriibe namun kusrenanrrab pørig købig køn, tru nam tammay melabig melaikkurrimba, tru Tiuswei wam pørig namun tabig purugub wamgurrimba, nam Tiuswei tørguegwalmabigu nam Cristoba kanbalatø pønrramigwan isua muniiramig tøgagønrrai” (Romanos 15:4).

¿Tiuspe namun chi tapik attrapikwan munirantrai tranøpik kø?

Mukøpen yawik kuapen tapik attrapikwan muniramik palai pøntrapelø køn. Mukøpen kuapene latrø køtrø kullaarana pusrkuankarupik køn, inchakutri nampe tapik attrapikwan munirap pøntraikwan trupishipelø ker. Munkucha pinap kømø kuamikpe pupik køn, treekkutri namun kisønanøp pusrkuankarupik køn. Inchawai, Bibliape trenchipik køn kuamikpe latrø kaik køn cha (1 Corintios 15:26).

Inchentø, ¿mukøpen kuainuk mantø tapik attrapikwan munirap pøntrøntrap? 1 Corintios 15:26 trenchipik køn, kuamikwan “pinisaik køntrun cha”. Treekkutri Jeupa Marampurap Marøpik kua kuapelan katøle øsirantrun. Incha Bibliape trenchipik køn, nueve misakmeran katøle øsiranik køncha nui marampurap mariktrawa.

Kan pieje Jeupa nui marampurap marøpikwan trana nui Nusrkai, Jesúswan, nui trak linchipik pip kualøm kuain tsupikwan katøle øsiran karuik køn. Jesúspe, søra kømø, mayelaim misak utu ikwan kenamarik køn (Juan 11:38-48, 53; 12:9, 10).

Ñipe paya mørintrun, ¿kuapelan chincha katøle øsiranik kui, katøle køllirawa kuantrap køpentø? Ikpe ciertonwain køn, incha Biblia maik eshkaiku køremtik køn cierton kuapelane katøle asamik kui, isuiktø kømø, cierton puntrap kuikwan tapik munirap pøntramik tørtø kenamarøpik køn.

Jesús trentaik køn: “Katøle øsiiramiba, øsig kømibabe na kur cha” (Juan 11:25). Jeupape nui Nusrkai, Jesúswan, marampurap marøpikwan trantrun Pirø ørøpa kuapelan katøle øsirantrai. Trektøwai Jesúspe eshkawa pasrik køn: “Kaguende treeg kømig urabe punrrun cha, mayan kwabelø søriilø purrabelø [Cristoi] wamwan møra, truyugurri [wepamtrun cha]” (Juan 5:28, 29). Srø Pirøchiku maya misak kuapelø katøle øsirantrun manakatik øsik kømik tøkakøntrap.

Profeta Isaíaspe katøle øsiramikwaimpurap trentaik køn: ”‏Ñui kuapeløpe øsirantrun. Sørik warapeløpe kutrøntrun. ¡Ñim usrø misrilø warapeløpe, kasraktø traship kutray! Kakentø ñui serenupe, løtsø serenu peni lataik køn, incha pirøpe kuapelø chi martrap kaima warapelan katøle øsirantrai martrun [cha]” (Isaías 26:19).

Øsiramikwaimpurap latrø tapchik køn. Kuapeløpe esekain putran, kan usri patsø kuantriku unø esekaik wap latawai. Jeupawai isupikukucha trektøwai putran chipik køn (Lucas 20:37, 38). Møiløma kan unø srøikchik kal-lantrap køpen yaweløpe latrø kasrak utapelø køn, trektøwain køn chipik køn kuapelan Srø Pirøchiku latrø kasrak utøntrap køncha. Treekkutri møikkøpen kuainkucha tapik attrapikwan muniramtik køn.

¿Tapik attrapikwan muniraikpe namun mantø purukuntreira?

Apóstol Pablope nu kusrenanik køn tapik attrapikwan muniramikwaimpurap. Nøpe trentaik køn, tapik attrapikwan muniramikpe kan tsantsøn casco lataik køncha (1 Tesalonicenses 5:8). Tru tsantsøn cascoma turwan køtrinchimøntrai øsik kømikwan trupishimøntraimpa purukupik kuik kuintrun. Chikøpen kailø pupen namui isupikwan mentra isui inchimua kullaaramøntrai purukupik køn. Maya misakmera tapik attrapikwan muniramik palailø køn.

Pablope katøkan kemesra wamintik køn, tapik attrapikwan muniramikwaimpurap trentaik køn: “Ik tapik attrapikwan muniraikpe kan ancla barcoyu piu umpu ulsrømøntrai purukupik lataik køn cha” (Hebreos 6:19, TNM). Apóstol Pablope tørtø nepua ashipik kuik køn, kakentø kan pieji barco piu umpu ulsrøpen nø truyu wawa øsik wepatrua tørtø nepua asik køn latrø nuwai kui. Marinerospe purø trømpøik namap isik ichip atrupen anclane pinøkuchipelø køn, tru barco minchimøwai piu umpu ulsrømøwai inchai.

Tius martrap misrikwan nam tapik attrapikwan munirapene, chikøpen kalø puintøkucha kullaaramø awantawa ampamtik køntrun. Jeupape martrap misrik køn, yu Pirau misakmeran mintishipelan patsøkøntrap cha, por ejemplo, kuayailø, kiship waramikwan, kuamikwanpa (nøørø tarømarikwan ash página 10yu). Ikwan kørewa pøntrøpene, namun purukuntrun yu misakmera trømpøik mariløyu kape namkucha kekøtrømøntrai.

Jeupa latrø tapelø martrap misrikwan ñikucha tøkakøntrun. Srøtøkutri Jeupape ñun kasrak uñchai intik køn. Nøpe maya misakmeran kaikyukutri wesrailø køntrai intan. ¿Truyukutrimpe mantø wesrailø køntreira? Tru nui newan ciertonikwan nepua asamik køncha (1 Timoteo 2:4). Ik kilkawan pørøpeløpe miaik køn manakatik øsik kømikwan ñikucha tøkakøntrai. Biblia mantø kusrenanøpikwan nepua ashchai, tapik attrapikwan muniramik Tius tranikpe latrø nuik køn, yu Pirauelø misakmera tranik lataik køn kømø.

Tapik attrapik munirap pøntraik tøkape nampe kullaaramumik køn, kakentø Tiuspe nam nepua martrap misrilan, Jeupa nun tap kui ashape nøpe namune purukuntraptøwai pasran (2 Corintios 4:7; Filipenses 4:13). Ik tapik attrapik muniramikwan palailø ker. Tapik attrapikwan munirap pasraikwan trupishape kullaaramøta ñi lawape wetøtramtik køntrun.

[Pisik incha nøørø tarømarik]

¿Chincha tapik attrapikwan muniramik kø?

Pinaku Bibliayukutri pørilø tapik attrapikwan muniramik namun purukuntrun:

◼ Tiuspe wentøsrø latrø tapik martrap misrik køn.

Tiuswai Wampe trenchipik køn, Pirø ørøpa latrø tapchik køntrun cha, misakmerape kanpalatø kasraktø pishintø warøntrun chipik køn (Salmo 37:11, 29; Isaías 25:8; Apocalipsis 21:3, 4).

◼ Tiuspe manaken isa waminchimíik køn.

Tiuspe isa wamintilan latrø tsalik køn. Jeupape newan latrø chishchik kuikkutri manaken isa waminchimíik køn (Proverbios 6:16-19; Isaías 6:2, 3; Tito 1:2; Hebreos 6:18).

◼ Tiuspe Marampurap Marøpik køn.

Jeupatøwain køn Marampurap Marøpik, nø martrap misrikwan nepua maramikpe chikucha søtøkatøntrapikpe kaakøn (Éxodo 15:11; Isaías 40:25, 26).

◼ Tiuspe misakmeran manasrønkatik øsik amøñintrai isupik køn.

(Juan 3:16; 1 Timoteo 2:3, 4).

◼ Tius nam tapik martrai munirapik køn.

Tiuspe nam tapik tøkakuilan, tapik marilantø ashipik køn, nam kalø marilan kømøwai kape kalø tøkakuikwan kømøwain køn (Salmo 103:12-14; 130:3; Hebreos 6:10). Nøpe nam tapik martrai munirapik kua, nam tapikwan marene nøpe latrø køtrø kasrarapik køn (Proverbios 27:11).

◼ Tiuspe nam nepua martrap isuilan nøpe namun purukuntraptøwai pasrapik køn.

Tiuswai misakmerape namtø pøntrømøn kakentø nøpe espíritu santo namun tranøpik køn, kullaaramøntrai purukuntrap isun (Filipenses 4:13).

◼ Tapik kui kenamarene nø martrap misrikwan nampe muniramtik køn.

Tiuspe chu urastøkucha sølkantø marøpik kua nø martrap misrikwane martrun (Salmo 25:3).

[Yu pisikpe]

Tsantsøn cascoma turwan køtrinchimøntrai purukupik køn trektøwai tapik attrapikwan muniraikpe mentra isua kullaaramøntrai purukuntrun

[Yu pisikpe]

Anclama barco mekampua piu umpu latøkushmøntrai purukupik køn trektøwai tapik munirap pøntraikpe mur pasrøntrai purukuntrun

[Mu marik]

Courtesy René Seindal/Su concessione del Museo Archeologico Regionale A. Salinas di Palermo