“Kan Ellmarøpik existipik kui kørewa pasrar”

¿Unøkutri kan religión tøkakuik kuita?

Tøkakuik køn. Nai usrimpe católica kuik køn, inchentø cruzadaswaimpurap, inquisiciónwaimpurap leikkutri latrø trømpøik kui asha, religiónwaimpurappe chikucha nepua ashik kømuik køn. Katøkan religiónmera cristianas kømelankucha lepen treeløtøwain kui nepua asik køn. 14 pilamera tøkaik kua, tru religiónmera latrø trømpøik marøpelø kuikwan nepua asikkutri, Tiuspe existimíik kui isuik køn. Kusrenanik yau evoluciónwaimpurap kusreikkutri øsik amønaikpe kaakatø pølpasrik kui isup mentik køn.

¿Chincha cienciaimpurap kusrep mentik kø?

Siete pilamera tøkaik køpen, kan microscopio ketikkutri latrø nu kustaik intik køn. Pølømmeran ashipik kuik køn, por ejemplo, pøñinkaumeran latrø tapik kuik køn.

¿Øsik kømikpe mantø pølpasrik kuikwan nepua ashchap mana isup mentik kø?

22 pilamera tøkaik kua, kan científica Jeupawaiwan waminchipikwan nepua asik køn. Nøpe kan Ellmarøpik existipik kui kørepik kuikkutri, nø isuikpe køremkeik kuik køn. Nape nø pella isup pasraik kenamartrap intinkucha, na paílan tørkantø kenamarik køn. Inchawai, misakmera chincha Tiuswan kørepelø kuikwan nepua ashik kuik køn.

Pølmera puraipen, katøkan Jeupawaiwan waminchipik medicinaimpurap nu ashipikwan nepua asik køn. Nø køreilan nan eshkapen nape mørik køn, kakentø nøpe pella isup pasraik kenamartrap intikkutri.

¿Pella isup pasraik kenamartitru?

Kak, kaimaik køn. Øsik kømikpe mantø pølpasrik kuikwan trurø trawaship menta, møilø latrø nu kusrepelø ikpurap chi isupelø kuikwan kuara asha køtrømisrik køn: kan lamø célulachik latrø nuik kui yu Pirau kaakatø kenamisrmuik kuintrun. Møiløpe srømpalasrønkutri atrik kuitamap isupelø køn. Inchawai, øsik amønaikpe mantø pølpasrik kuikwaimpurappe chi acuerdo kaapik køn.

¿Chiyu acuerdo køtrømisrøpelø kø?

Yam científicosmera treek isupelø køn, tru øsik amønaikpe kaakatø pølpasrik kømøn cha. Inchawai nape isuik køn, tru nømpe kan Ellmarøpik chi kaakui isupelø køn, inchentø tru øsik amønaikpe kaakatø wepatrik kui nøm isuikwan tør kenamartrap kaimapelø køn. Treekkutri, Bibliayu øsik amønaik maik pølpasrik kuikwan lentrap isuik køn.

¿Biblian leikkutri ikpurap chi isuik kø?

Biblian lep yaik maitø ciertonik kui tør køtrømisrik køn. Mariktø científicosmerape nepua asik køn, tru srømpalawanpa Pirøwanpa kan Ellmarøpik marik kui. Inchentø, ikwantøwai Bibliayupe 3.500 pilamera wentausrø chap eshkaik kuik køn. Srøtø pølpasrøpyu trenchipik køn: “Ke srøtø chigucha chigaaben, Tiusbe srømbalameranba, pirøwanba marig køn cha”a. Trektøwai nepua asik køn, tru científicosmera maik wetøkøtrilan Bibliayu trektøwai eshkapik kui, incha Bibliayu cienciapurap maik eshkaikpe científicosmera maik wetøkøtrilø trektøwain kui.

Ñipe cienciapurap latrø nu nepua ashipik kuikkutri, ¿Tiuswan køremik mur kuik kuita?

Treek kømuik køn, universidadyu cienciapurap kusrep uña pøn pila puraipen Tius existipik kui nepua asik køn. Møyankatik, chi øsik køpikwan maik kui nepua aship yaik maitø, más tørtø køtrømisrik køn kan Ellmarøpik kui.

Kan purayaikwan eshkau

Medicamentospa, toxinasmerapa chi øsik køpelan mantø mintishipik kuikwan trawashipik kur. Naimpurappe, namui asr umpu kan sistema tøkakuikkutri kuara asha køtrømisrik køn. Ikpe namui cerebroyu bacteriasmera, chikøpen kailø pumøntrai purømisrøpik køn. Ikpe kan søtøkatapik lataik køn, tru animpa, células cerebralesmerapa katiamøntrai purukupik.

¿Chincha kuara asamtik kø?

100 pilamera wentausrø nu kusrepeløpe nepua asik køn, tru aniyu kan mø keren tru ik møpe namui asr umpu chishtø luløpik kui, inchentø cerebroyupa médula espinalyupape pumíik kui. Ikpe latrø nuik køn: kakentø animpe cerebroyu célulasmerasrø puntrap luløppe red de vasos sanguíneospurap ipik køn, pinømørøp trektøwai oxígeno tranøp, inchentø trusrø puppe tru ik søtøkatapikpe cerebroyu pumøntrai purømisrøpik køn. Inchentø, ¿mantø puraipik kø? Latrø yam pilamera ikwane nepua ashmuik køn.

¿Ik søtøkatapikpe chi marøpik kø?

Tubos de plásticomerape umpu chi luløpikwan wepimøntrai purukupik køn, inchentø namui asru vasos capilaresmerape treek kømøn, kakentø nui mentauwane célulasmera køn, célulasmerape ampumay imay microbiosmera, sustanciasmera wetruntrai kepamtrai marøpik køn. Inchen cerebroyu vasos sanguíneosmerape pekmaylø køn, kakentø cerebroyupe mentawan célulasmera pøntrapeløpe latrø mur kemesrailø pøntrapik køn. Tru célulasmerape køremkeik kemesrailø pøntrapelø køn. Kan sistema køn, aniyukutri cerebrosrønkatik ampumay imay oxígeno køpen, dióxido de carbono, glucosa, katøkaneløkucha sruaipik. Inchentø, proteínasmeran aniyu célulasmerane puraipashmíik køn. Tru aniyukutri cerebro maik katapikpe, truik chikøpen latrø shushchelan puraipashmíik køn, por ejemplo físico, químico, eléctricomay. Nai asimpe, ik sistemape evolucionaik kømøwai kaakatø wepatrik kømuintrun.