KUSRENANIK 26
¿Chincha trømpøik kiship waramik pup pasra?
Latrø trømpøilø pupen, “¿chincha øyeek pup pasraira? Cha”, misakmerape paya mørøpelø køn. Biblia tru paíkwan løtapik kui nepua ashene latrø tap køpik køn.
1. ¿Øyeek trømpøik pup pasrøntraimpe Satanáspe chi marik kø?
Kuaimantsik, tru Satanáspe, katøkanelan nø asha karuntrap isup menta, Jeupawan søtøpasramisra, Adánwanpa Evankucha Tiuswan søtøpøntramisrtrai marik køn. Isa wamincha, Evan kepenøsrkaik køn (Génesis 3:1-5). Satanáspe Evan Jeupa tapikwan sørap pasraik kørentrai marik køn. Satanáspe trenchippe tru “Jeupawan møra marmupene mas kasraktø amøñintrap køn cha” kenamarik køn. Satanáspe Evan “kuamøntrap køn cha” taikpa isa waminchip pølpasrik køn. Treek kua, Bibliape tør eshkapik køn: Tru Satanáspe “purø isaptiig køn cha. Incha nøbe isa wamindigwei møskain køn cha” (Juan 8:44).
2. ¿Adánpa Evapa chi isua marik kø?
Jeupape Adánwanpa Evanpa latrø nu mamikmera tøkakøntrai trana, kan tusryuikwantø mamøntrai karuik køn (Génesis 2:15-17). Nømpe latrø nu mamikmera tøkarkuinkucha, Eva “tru tusryu mamigwan nemørøb, maptinchibig køn”. Inchape, Adánwankucha “srørren, truikkucha mabig køn” (Génesis 3:6). Treek mariktøka Tiuswan møra marmuik køn. Nømpe sølkantelø kuikkutri tap isua martraptelø kuinkucha, kalø kui ashentø, Jeupawan møra marmuik køn. Treek mariktøka Jeupa nømun chikucha manchimøntrai marikkutri, nømun mur kualømmera pup mentik køn (Génesis 3:16-19).
3. ¿Adánpa Evapa øyeek isua marikpe namun chi puik kø?
Adánpa Evapa Tiuswan mørmuikkutri sølkantelø kømup pølpasrøp mentik køn. Trektøwai nømuinukkutri amtruik køppe sølkantelø kømer. Adánwaimpurø Bibliape trenchipik køn: “Kaig mariima kan møkkurrindø yu pirau kebarruben, kwamibe tru kaig marikkurri arrig købene, øyeetøwei tru kwamibe maya misagwan puraarrub arrig køn [cha]” (Romanos 5:12).
Trupe, ¿namun chincha kiship waramik pupik kø? Kanmaywane, namtøwai tap isua marmuik kutrinkøn. Kape katøkanelø tap isua marmuikkutri. Katøkanpurappe, chi isumø køpen chikøpen pupen (leu Eclesiastés 9:11).
MAS NEPUA KUSREU
Yu pirau trømpøik puntrai marøpikpe chincha Tius kømuikwan ashkun, trektøwai nam kiship amøñipen Tiuspe maik mørørai inchipik kuikwan.
4. ¿Namun trømpøik puntrai marøpikpe mu kera?
Misakmera møiløpe “yu Pirau Tius aship pasrapik køn cha” isupelø køn. Pero, ¿treek kø chintera? VIDEUN asay.
Ley Santiago 1:13 incha 1 Juan 5:19, yu leinuk pinaku paíkwan waminchap:
¿Kiship amøñintrai kape trømpøik puntrai marøpikpe Tius kø chintera?
5. ¿Yu Pirau Satanás karup pasraikkutri chi pup pasra?
Ley Génesis 3:1-6, yu leinuk pinaku paílan waminchap:
¿Satanás chi isa wamintik kø? (Versículos 4n incha 5n asay).
Satanás trentaik køn Jeupape misakmeran latrø tapikwan merap pasraik. ¿Treekwan mantø kørenkaruik kø?
Misakmera cierton kasrakelø køntrap Jeupa maik karuikwan møra maramik køn. Pero, ¿trupurap Satanás maik isupik kø?
Ley Eclesiastés 8:9, yu leinuk pinaku paíkwan waminchap:
¿Jeupa yu Pirau aship pasrømuikkutri chi pui pasra?
Adánpa Evapa latrø tap pirøchiku warap sølkantelø kuik køn, inchentø Satanáswan møra marikkutri Jeupawan tarømisrik køn.
Jeupawan tarømisrikkutri mayelan kuamik, isui kiship amønamik pui pasran.
Misakmerape katøle sølkantelø misra, latrø tap pirøchiku warøntrun, kakentø Jeupape kalø marikwanpa kuamikwanpa pinishintrap køn.
6. Jeupape trupa isui inchipik køn nam isui amøñipen
Nam trupa isui kiship amøñipen, ¿Tiuspe isupik kø chintera? Davidpa apóstol Pedropa mantaikwan ash. Ley Salmo 31:7 incha 1 Pedro 5:7, yu leinuk pinaku paíkwan waminchap:
¿Jeupa namun isupik kui nepua ashape ñun maik mørørankarupik kø?
7. Tiuspe nam isui amøñintrai marøpikwan patsøkøntrun
Ley Isaías 65:17 incha Apocalipsis 21:3, 4, yu leinuk pinaku paíkwan waminchap:
Jeupa namun kiship warøntrai marøpikwan patsøkøntrap køtrømisra wan, incha kutike mintisaikwan katøle tamartrun. ¿Ikpe ñun mentra isumøntrai purukuntrauta? ¿Chincha?
¿Nepua asha køtitru?
Satanás isa wamintikkutri Jeupawai munchin chillikintik køn, kakentø tap aship karupik kømuik namuinuk isumíik kui isuntrai marikkutri. Jeupape nam kiship amønaikwan patsøka, nui munchin chish martrun, Nui Aship Karup Waik latrø tapik kui kenamarøp. Inchawai, mayelø Jeupawai munchin chish maramik latrø nuik køn (Mateo 6:9, 10).
MØILØPE TREEK ISUPELØ KØN: “Tius namun marøppe trupa isui kiship amøñintrai marik køn cha”.
¿Ñipe manchipsruku?
¿CHI KUSREKU?
Tru Satanás, Adán, Evakutrimpa trømpøik pui pasran. Namune øyeek pui pasraikkutri Jeupape trupa isui inchipik køn. Nøpe nam kiship amøñintrai marøpikwan patsøkøntrun.
Kusreikwan katøle isuntrap
¿Kuaimantsikpe Evan chi isa wamintik kø?
¿Adán Evapakutrintø namun chi pui pasra?
¿Nam kiship amøñipen Jeupa isui inchipik kui mantø nepua asha kø?
MAS NEPUA ASH
Kaik marikwaimpurø Biblia manchipik kuikwan ash.
Ellmarin tulsrø, Edén taiksrø, Satanás chi isuntrai marikwan mas nepua ash.
“¿Kiship waramikwan chincha Tius pupasa?” (Asha Eshkapik, 1 enero 2014wai)
Ik paíkwaimpurap Biblia manchipik kuikwan ash. Mentra isui inchimøntrai purukuntrun.
Kan møk mur kualømmera puraip mekapik chi kusreikwan ash.