KUSRENANIK 19

¿Jeupawaiwan waminchipeløpe cierton Cristoi wentautø ampupelø kø chintera?

Edición impresa

Nam Jeupawaiwan waminchipelø cierton Cristoi wentautø ampupelø kui asha pøntrer. Namui køreilan, chincha øyeek wamapelø kuikwan ashkun. Katøkanpurappe, nam mantø untak kenamarøpelø kuikwan ashkun.

1. ¿Jeupawaiwan waminchipelai køreiløpe chukutri atrupik kø?

Jesús Tiuswan trentaik køn: “Ñui wambe tru newan ciertonig køn cha” (Juan 17:17). Nam Jeupawaiwan waminchipelø Jesús latawai Bibliayukutri kusrenanøpelø ker. Møi kualømmerasrø Jeupawaiwam waminchipelø maik pølpasrikwan ash. 1870 pilasrø, Biblian kusrepeløpe Tiuswai Wampe chi kusrenanøpik kuikwan aship pølpasrik køn. Iglesiasmera søtøpøntramisrinkucha, nøm køreiløpe Bibliayukutri atrup chi kusreikwan katøkaneløpa waminchip inchipelø kuik køn.a

2. ¿Nampe chincha Jeupawaiwan waminchipelø cha wamapelø køpra?

Jeupawaiwan waminchipelan Jeupape nui misak kui nepua ashipik køn kakentø ciertonikwan nuimpurap waminchipelø køn (Hebreos 11:4–12:1). Kan ejemplo ashchap, metrapsrøma Tiuspe nui misakmeran trentaik køn: “Naimpurap waminchipelø køn cha” (leu Isaías 43:10). Jesúswanma treek wamapelø køn, “nøbe waminchippe, maig kuigwan eshkabig” køn cha (Apocalipsis 1:5). Treekkutri 1931waimpe nampe munchin utik køn Jeupawaiwan waminchipelø. Inchakutri nampe ik munchin sruampup pøntrappe latrø kasrak pøntrer.

3. ¿Jeupawaiwan waminchipeløpe Jesús latawai mantø untakwan kenamara?

Jesúspe latrø untarapik kuik køn nui pera unilan kakentø nui yawelø latailø kuik køn (leu Marcos 3:35). Nam Jeupawaiwan waminchipeløpe, kan yawelø latailø køn Pirø mupa kuimpurap. Inchakutri nampe “nuchalø” cha wamapelø ker (Filemón 1, 2). Trektøwai, karuik mørøpelø ker: Tru maya “nunelan” untaramik kui (1 Pedro 2:17). Nam Jeupawaiwan waminchipeløpe mømaykøpen untarapelø ker; purukupelø ker namui nunelø nuchalø murik puin pøntrøpen.

MAS NEPUA KUSREU

Jeupawaiwan waminchipelaimpurap mas nepua ashchun chukutri amtrupelø kuikwan. Yu nepua ashchun cierton Cristoi wentautø ampupelø kui.

CollagePisilø: Jeupawaiwan waminchipelø katøkanelan kusrenanøpkøn. 1. Kan nuchak kan ishukpa Biblian kusrepkøn. 2. Kan nunek exhibidoryu kan møkwan kusrenanøp pasran. — Cierton Cristoi wentautø ampupeløpe namui køreiløpe Bibliayukutri atrup, katøkanelan Bibliayukutri kusrenanen.

4. Nam køreiløpe Bibliayukutri atrupik køn

Metrapsrøwai Jeupape chap eshkaik køn cierton Biblian tør nepua ashchap kui. Ley Daniel 12:4, yu leinuk pinaku paíkwan waminchap:

¿Tiuswai misakmera Biblian kusrep ampinuk chi mastre nemisrøp intrap “kuik kø”?

Yu ashchap møilø Tiuswai Wamwan kusrep pølpasrikwan, uyu Charles Russell tøkakuik køn. VIDEUN asay, yu videu asinuk pinaku paíkwan waminchap:

VIDEU: Biblia kusrenanikwan tør nepua asik køn (7:45)

Videu asinukma, ¿Tiuswai Wamwan mantø nepua kusrepelø kuik kø Charles Russell katøkanelø Biblian kusrep amøñipeløpa?

¿Nepua asha køtitru?

Kanmaype nam køreilan mas tør marik køn. ¿Chincha? Kakentø Tiuspe nui Wamwan tsøntatø tsøntatø mas tør nepua ashchai purukupik køn, tørtrap latawai tsøntatø tsøntatø chi køpikwan nepua asamik (ley Proverbios 4:18). Treekkutri, Biblia yunømarmuinkucha inchentø nam mas nepua asinuk namui køreikwan tør marøpelø ker.

5. Nampe Jeupawaiwan waminchip amøñipelø ker

¿Nampe chincha Jeupawaiwan waminchipelø ker cha wamapelø køpra? VIDEUN asay, yu videu asinuk pinaku paíkwan waminchap:

VIDEU: Namun Jeupawaiwan waminchipelø wamilø ker (2:40)

¿Chinchakutri Jeupawaiwan waminchipelai munchipe tapik kø?

¿Jeupape chinchatre lawa wesruik kø misakmeran nuimpurø waminchai? Kakentø, Jeupawaimpurap latrø nøtrø misakmera isa wamintikkutri. Nui misakmera lawa wesruiløpe cierton Jeupa mu kuikwan waminchipelø køn. Par isa wamintilan nepua ashkun.

Møilø religionesmerape kusrenanøpelø køn Tiuspe tap kui ashipik kui imágenesmeran inchentø, ¿cierton kø chintera? Ley Levítico 26:1, yu leinuk pinaku paíkwan waminchap:

¿Tiuspe imágeneswaimpurap chi isupik kø? ¿Mømay tør marøpik kø ik versículo?

Møilø religionesmerape kusrenanøpelø køn Jesúspe Tius køn chip, inchentø ¿cierton kø chinta? Ley Juan 20:17, yu leinuk pinaku paílan waminchap:

¿Tiuspa Jesúspa kantø kø chinta? ¿Mømay tør marøpik kø ik versiculo?
¿Ñipe maik mørøraik inchipik kuku Jeupa nui misakmeran ciertonikwan nuimpurappa Jesúswaimpurappa kusrenantrai ørikkutri?

6. Ampukutri ikkutri untak kenamarøpelø ker

Bibliape Cristoi wentautø ampupelan kan asrtø kui lataik eshkan. Ley 1 Corintios 12:25, 26, yu leinuk pinaku paílan waminchap:

¿Cierton Cristoi wentautø ampupeløpe nuchalø mur kualømmera puraampup meløpen chi maramik kø?
¿Ñi asinuk Jeupawaiwan waminchipeløpe mantø untak kenamarøpelø kø?

Chukøpen Jeupawaiwan waminchipelan trømpøik pupen, nømui nuchaløpe purukuntrap amtraptøwai pøntrapelø køn. Kan purayaikwan ashchap, VIDEUN asay. Yu videu asinuk pinaku paíkwan waminchap:

VIDEU: Haitísrø trømpøik mur isik ichip pupen (5:29)

¿Latrø trømpøik pupen Jeupawaiwan waminchipeløpe mantø untak kenamarøpelø kø?

Latrø trømpøik puraipen par nuchalø kan nuchakwan nui unankucha purukup pøntran: cobijatøka puløpkøn trektøwai pi tranøp. — Cierton Cristoi wentautø ampupeløpe purukuntrai palai meløpen untaktøka purukupelø køn.

MØILØPE TREEK ISUPELØ KØN: “Jeupawaiwan waminchipeløpe isa kusrenanøpelø køn cha”.

¿Ñipe manchipsruku?

¿CHI KUSREKU?

Jeupawaiwan waminchipeløpe cierton Cristoi wentautø ampupelø køn. Chuiløkøpentø kuinkucha yawelø ker Tiuswan adorap, køreiløpe Bibliayukutri atrup, Jeupawaimpurap ciertonikwan kusrenanøpelø køn.