Pin’ileŋɔ

28 Ti Isaak yi Yakob na kã bo en ge tɔɣɛ bo en yeti: “Da di pɔɣa Kanaan pugeto wa poan. 2 Keŋɛ Padan-Aram, ho ma sɔ Betuel yire poan ta di ho ma suɔ Laban bipugeto la ayima ti a dɛna ho pɔɣa. 3 Naayinɛ, Paŋa Za’adaana la wan kã bo ho ge basɛ ti ho wi’ɛ zo’e zo’e. Ho yizuo nɛreba wan zo’e. 4 A wan dekɛ Abraham kã’a la bo hon la ho yaasi la za’a. La wan eŋɛ se’em ti ho ta’an soe sɔna tinsɛka ti Naayinɛ dekɛ bo Abraham ti ho dɛna saana bɔna bim la.” 5 Bala, Isaak keese Yakob mɛ ti a keŋɛ Padan-Aram, Aram nɛra Betuel dayɔa Laban zɛ’an. Eŋa n de Yakob la Esau ma tãya la. 6 Esau nyɛ mɛ ti Isaak kã bo Yakob mɛ ge keese en ti a kenɛ Padan-Aram ta di pɔɣa bilam ge daa kã bo en ge yele en yeti: “Da di pɔɣa Kanaan pugeto wa poan.” 7 A kelum baŋɛ ti Yakob daa doose a sɔ la a ma nɔɔrɛ mɛ ge keŋɛ Padan-Aram. 8 Esau daa nyaa bɔkɛ ti a sɔ Isaak puurɛ daa ka pee la Kanaan pugeto la, 9 bala la, Esau daa keŋɛ la Abraham dayɔa Ismael zɛ’an ta di a bipugela Mahalat n de Nebaiot tãya la pa’asɛ pɔɣese’ese ti a puɣum tara la poan. 10 Yakob daa ze’ele la Beerseba kɔ’ɔn kena yɛ’a Haran. 11 A daa ta paɛ la zɛ’an ge maasum ti a gã’arɛ bilam yu’uŋo la, se’ere n sɔi la yintule daa lui mɛ. A daa dekɛ la kugere bilam kuɣelɛ a zuo ge gã’arɛ bilam. 12 A daa zaasum mɛ nyɛ kura n daa ze’ele tingɔŋɔ wa zuo wɔɣɛ paɛ saazuo sa; ti Naayinɛ malesi kena kura la zuo zɔna ge sigera. 13 Bisɛ! Yehowa n daa zĩ ka zuin sa ge tɔɣɛ yeti: “Mam dela ho sɔ Abraham Naayinɛ la Isaak Naayinɛ, tinsɛka ti ho gã’a ka poan la, n wan dekɛ bo hon la ho yaaŋa. 14 Ho yaaŋa wan ta ana wuu tingɔŋɔ wa puusego la. Ge ti ho wi’ɛ paɛ zaɣenɔya la dapɔya bɔba ta paɛ saazuo bɔba la tiŋa nɔɔrɛ bɔba, tingɔŋɔ wa yizuto la za’a wan nyɛ kã’a doose la hon la ho yaaŋa la poan. 15 Mam boi mɛ la ho ge me wan tɛ’ɛla hɔ zɛsɛka woo ti ho yɛ’ɛsa ge tara ho lebe tiŋa wa poan na. N kan basɛ hɔ ta paɛ se’em ma’a ti n tum sɛla ti n pu’ulum bo ho la.” 16 Ti Yakob niɛ goom poan ge yeti: “Yelemɛŋɛrɛ, Yehowa sirum boi zɛ’an wa poan mɛ ge ti mam ka mina.” 17 Ti dabeem nyɔkɛ en ti a yeti: “Bisɛ zɛ’an wa n tari dabeem se’em! Zɛ’an wa sirum dela Naayinɛ yire, zɛkaŋa wa n de saazuo yaŋa.” 18 Ti Yakob isige bulika asubaa ge dekɛ kugere la ti a dekɛ kuɣelɛ a zuo la sɛ ze’ele tiŋa ge ka’ɛ kaam yeele ka zuo. 19 A daa siɣɛ zɛ’an la yu’urɛ yeti Betel. Ge zɛ’an la yu’urɛ yuun dela Luz. 20 Ti Yakob daa nyaa biŋe nɔɔrɛ yeti: “Naayinɛ san bɔna la mam ge tɛ’ɛla mam n sarɔɔ wa zuo ge bɔ’ɔra mam dia ti n dita la lɔɣɔrɔ ti yɛɛra 21 ge ti mam lebe n sɔ yire la suma’asum, bala wan pa’alɛ ti Yehowa sirum dela mam Naayinɛ. 22 Ge ti kugere wa ti mam dekɛ sɛ ze’ele wa, wan lebege Naayinɛ yire ge mam wan dekɛ sɛla woo ti ho dekɛ bo mam la pia poregerɛ bo ho.”