Pin’ileŋɔ

31 Pooren ti Yakob wum Laban dayɔɔsi la ti ba tɔɣera yeti: “Yakob n to’e tomam sɔ lɔɣɔrɔ la za’a, a to’e la tomam sɔ lɔɣɔrɔ nyaa dɛna buntata.” 2 Yakob nyaa san ni bisɛ Laban nɛŋa, a ni baŋɛ ti a itigɔ la tee mɛ la eŋa n daa ani la en se’em la. 3 Pooren ti Yehowa nyaa yele Yakob yeti: “Lebe kule ho sɔdoma tiŋa la poan ta bɔna la ho yire nɛreba la ge n wan kɔ’ɔn bɔna la ho.” 4 Ti Yakob nyaa soolum nɛra yeti, a ta yi Arakel la Lea ti ba wa’an a dusi la n boi zɛ’an bɔ̃’ɔ la poan, 5 nyaa daa yele ba yeti: “Mam nyɛ ti, ya sɔ nɛŋa tee mɛ la mam ge mam sɔ Naayinɛ la boi mɛ la mam. 6 Yamam yamea sirum mi ti mam dekɛ la n paŋa za’a tum bo ya sɔ. 7 Ya sɔ daa boti a fã mam mɛ ge tee mam yɔɔrɛ sugumnɔɔrɛ pia; ge Naayinɛ ka bo en sore ti a daam mam. 8 A daa san ni yele mam yeti, ‘Dunse’ese n ani pɔ̃ra pɔ̃ra la n wan dɛna ho denɛ,’ dusi la za’a ni kɔ’ɔn dɔɣera la dunse’a n ani pɔ̃ra pɔ̃ra; ge a daa san ni yeti, ‘Dunse’ese n ani lasalasa la n wan dɛna ho denɛ,’ dusi la za’a ni kɔ’ɔn dɔɣera la dunse’a n ani lasalasa. 9 Bala la, Naayinɛ daa kɔ’ɔn tara ya sɔ dusi la bɔ’ɔra la mam. 10 Saŋa busebo ti dusi la daa boi bini zukera la, mam daa nyɛ la zaaseŋɔ poan ti butelesi la daa duura dunsɛba n ani lasalasa, pɔ̃ra pɔ̃ra ge tɛ̃’ɛsɛ la. 11 Ti yelemɛŋɛrɛ Naayinɛ tɔɣɛ bo mam zaaseŋɔ la poan yeti: ‘Yakob!’ ti mam lebese en yeti, ‘Mam n wana.’ 12 Ti a yele mam yeti, ‘Soso goregɛ ho zuo bisɛ, butelesi la za’a n duure buse’a la ani la lasalasa, pɔ̃ra pɔ̃ra ge tɛ̃’ɛsɛ, se’ere n sɔi la mam nyɛti sɛla woo ti Laban ita ho la mɛ. 13 Mam n de yelemɛŋɛrɛ Naayinɛ se’em n daa niɛ amea Betel poan la, zɛsɛka ti ho daa eŋɛ kaam yeele kugeri zuo ge daa biŋe nɔɔrɛ la mam la, nananawa isige tiŋa wa poan ge lebe tinsɛka ti ba dɔɣɛ ho la poan.’” 14 Bala ti Arakel la Lea yele en yeti: “Sɛla kelum bɔna tomam sɔ yire la poan dɛna tomam tɔ̃tɛ? 15 A ka bisɛ ti tomam dela saama? Daɣɛ eŋa n koose tomam tisɛ ge tara tomam lɔɣɔrɔ la ita eŋa n boti se’em? 16 Lɔɣɔrɔ la woo ti Naayinɛ dekɛ tomam sɔ zɛ’an la nyaa dela tomam la to kɔma denɛ. Bala zuo la, eŋɛ sɛla woo ti Naayinɛ yeti ho eŋɛ la.” 17 Ti Yakob isige ge basɛ ti a kɔma la a pɔɣeba la zom yuɣema la zuo, 18 a daa pe’e a dusi la za’a mɛ ge dekɛ a lɔɣɔrɔ la woo ti a nyɛ la, la dusi la woo ti a tara la ze’ele Padan Aram tiŋa nyaa yɛ’ɛsa a sɔ Isaak yire, Kanaan tiŋa poan. 19 Daandendaarɛ la, Laban daa keŋɛ ti a ta sie la a piisi kɔberɔ, ti Arakel daa zũ a sɔ terafim baga la. 20 Leyɛ’ɛsa Yakob daa ka keese Aram tiŋa nɛra Laban, se’ere n sɔi la, a daa li’isɛ mɛ. 21 A daa dekɛ sɛla woo ti a tara la zɔ yakɛ la kulega la. A daa le dekɛ a nɛŋa tɔ la Gilead zɔya bɔba la. 22 Dabesa atã daarɛ ti ba yele Laban yeti, Yakob zɔ fɔregɛ mɛ. 23 Ti a laɣum la a suurɔ la diɣe en paɛ dabesa ayopɔi nyaa ta paɛ en Gilead zɔya bɔba la. 24 Ti Naayinɛ niɛ amea pa’alɛ Aram nɛra Laban zaaseŋɔ poan ge yele en yeti: “Bisɛ homea soŋa la hon maasum ti ho yele Yakob sɛla la, la san dɛna som bii be’em.” 25 Ti Laban paɛ Yakob zɛ’an, Yakob daa tĩ a tɛnti la zoore la zuo ge ti Laban la a suurɔ la me daa bɔna Gilead zɔya bɔba. 26 Ti Laban daa yele Yakob yeti: “Ho eŋɛ la bem n bala wa? Beni n sɔi ti ho li’isɛ mam ge tari mam bipɔgeto keŋɛ wuu ba dela yamesi ti nɛra wa’ana zabɛ fã ba keŋɛ? 27 Beni n sɔi ti ho li’isɛ zɔ ge ka yele mam? Ho san yele ni mam, mam ta’an basɛ ni ti ba ŋmɛ ni yuuma la sinyaɣa la kɔ̃lɔ keese ho ti ho puurɛ pee. 28 Ge ho ka bo mam yɔ’ɔ ti n mɔɣɛ n yaasi wa la n bipugeto wa nɔya. Ho tum la gberen tuuma. 29 Mam tari paŋa n wan ta’an eŋɛ ho mam n boti se’em ge ho sɔ Naayinɛ la daa tɔɣɛ bo mam mɛ yu’uŋɔ yeti, ‘Bisɛ homea soŋa la hon maasum ti ho yele Yakob sɛla la, la san dɛna som bii be’em.’ 30 La san dɛna ti ho kɔ’ɔn ani la lɛɛ ti la ho lebe ho sɔ yire, beni n sɔi ti ho zu n yina la?” 31 Ti Yakob yele Laban yeti: “Se’ere n sɔi la dabeem n tari mam, ti mam yele n mea yeti, ‘Ho ta’an pɛregɛ to’e ho bipugeto wa n zɛ’an.’ 32 Mina woo ti ho nyɛ baɣa wa a zɛ’an la kan vɔna. To suurɔ wa nɛŋan, bisɛ mam n tari sɛla ge dekɛ ho denɛ.” Ge Yakob ka baŋɛ ti Arakel n daa zu ba. 33 Ti Laban kɛ̃ Yakob la Lea la pɔɣesɔɔrɔ bayi la tɛntidoma poan ge a daa ka nyɛ sɛsɛla. A daa ze’ele la Lea tɛnti la poan nyaa kɛ̃ Arakel tɛnti la poan. 34 Ge Arakel daa dekɛ terafim baɣa wa eŋɛ la pɔɣesi pi’ɔ la poan ti ba ni dekɛ dɔɣelɛ yɔɣenɛ zuo la, sankaŋa za’a la, a daa zi la ba zuo. Laban daa ɛ tɛnti la poan za’a mɛ ge ka nyɛ ba. 35 Ti Arakel daa yele a sɔ yeti: “N sɔ, da basɛ ti ho sunsɔa nyie, mam kan ta’an isige ze’ele ho nɛŋan se’ere n sɔi la, sɛla n iti pɔɣesi la n iti mam wa. Bala la, a daa ma’ɛ amea bisɛ mɛ ge a daa ka nyɛ terafim baɣa la. 36 Ti Yakob sunsɔa nyie ti a pɔsɛ zɛregera Laban. Yakob yele Laban yeti: “N taalɛ dela deni, bem be’em ti n eŋɛ hɔ ti ho kɔ’ɔn tabela mam bala? 37 Hon nyaa bisɛ n lɔɣɔrɔ wa woo ta ba’asɛ la, ho yire lɔɣekuni ti ho nyɛ bim? Ho san nyɛ sɛla, dekɛ de pa’alɛ ho suurɔ la mam suurɔ wa za’a ti ba gãkɛ mam la hon. 38 Mam daa boi la ho zɛ’an yuuma pisiyi, ho piisi la ho buusi daa ka makɛ dɔɣɛ basɛ. Ho pesigo nɛŋɔ ka makɛ kalum mam nɔɔrɛ. 39 Goo duŋa ka makɛ ku ho dusi la ayina me. Bala san eŋɛ, mam mea n ni yɔ. Ba san zũ ho duŋa wuntɛɛŋa bii yu’uŋɔ woo ho ni basɛ ti mam yɔ mɛ. 40 Wuntɛɛŋa ni sigera mam zuo la bala ti ɔɔrɔ kɛ̃’ɛra mam yu’uŋɔ ti mam ni koŋe guum. 41 Mam kɛ̃ ho yire paɛ la yuuma pisiyi. Mam tum la yuun pia la anaasi bo ho, ho bipugeto bayi wa zuo ge dekɛ yuuma ayoobe bisa ho dusi la ge ti ho kɔ’ɔn tɛɛra mam yɔɔrɛ sugumnɔɔrɛ pia. 42 Mam sɔ Naayinɛ n de Abraham Naayinɛ ge dɛna mina ti Isaak zɔta la san ka boi ni mam pooren, ho wan basɛ ti mam lebe ni la nubeele. Naayinɛ nyɛ mam namesegɔ mɛ la mam n wɔbegɛ muregere se’em mɛ, bala n sɔi ti a zɛregɛ hɔ zaam yu’uŋɔ la.” 43 Ti Laban yele Yakob yeti: “Pɔɣesi la dela mam bipugeto ti kɔma la dɛna mam kɔma ti dusi la me dɛna mam dusi, sɛla woo ti ho kɔ’ɔn bisera wa dela mam la n bipugeto la denɛ. Mam wan eŋɛ la bem giisɛ ba bii giisɛ ba kɔma la ti ba dɔɣɛ la? 44 Soso basɛ ti mam la hon biŋe nɔɔrɛ la taaba ti la dɛna sɛɛra bɔ’ɔra tɔ.” 45 Ti Yakob dekɛ kugere sɛ de ze’ele. 46 Ti Yakob yele a suurɔ la yeti: “Gbɛ ya kuga na!” Ti ba dekɛ kuga la kuge dɔgelɛ taaba zuto. Bala pooren ti ba di kuga la ti ba dekɛ dɔgelɛ taaba la zuo. 47 Ti Laban daa pɔsɛ yi’ira ka yu’urɛ yeti, Yegar-Sahaduta ge Yakob daa yi’iri ka yeti Galeed. 48 Ti Laban nyaa yeti: “Kuga wa ti to kuge biŋe wa dela mam la hon sɛɛradaana zina wa.” Bala n sɔi ti a siɣɛ ka yu’urɛ yeti, Galeed 49 la Pigera Zontua, se’ere n sɔi la a yeti: “Mam la hon san ka le ta nyɛta taaba, Yehowa wan bisera tɔ. 50 Ho san ta mugesa mam bipugeto wa ge nyaa dita pɔɣeba pa’asa mam bipugeto wa poan, la boi bim ti nɛra ka boi to zɛ’an ge tɛ̃ra ti Naayinɛ n wan dɛna mam la hon sɛɛradaana.” 51 Laban kelum tɔɣɛ bo Yakob yeti: “Kuga n wana kuge gã’a, kugere n wana me ti mam dekɛ sɛ ze’ele mam la hon tiŋasuka. 52 Kuga wa n kuge gã’a wa dela sɛɛradaana ge ti kugere wa n sɛ ze’a wa dela sɛɛra pa’alɛ ti, mam kan zɔɛ kuga wa n kuge gã’a wa wa’ana daam hɔ ti ho me kan zɔɛ kuga wa n kuge gã’a wa la kugere wa n sɛ ze’a wa wa’ana daam mam. 53 Basɛ ti Abraham Naayinɛ, la Nahor Naayinɛ n de ba sɔ Naayinɛ la gãkɛ mam la hon.” Ti Yakob dekɛ Naayinɛ se’em ti a sɔ Isaak zɔta la yu’urɛ biŋe nɔɔrɛ. 54 Bala pooren ti Yakob eŋɛ kaabegɔ zoore la zuo ge yele a suurɔ la ti ba wa’ana di. Ti ba di ge gã’arɛ zoore la zuo yu’uŋɔ la. 55 Ti Laban daa isige bulika asubaa mɔɣɛ a yaasi la, la a bipugeto la nɔya ge kã bo ba. Ti Laban kɔkɛ sore lebe kule.