Yob

1 Buraa ayima n yuun boi Uz tiŋa poan ti a yu’urɛ dɛna Yob. A yuun dela tontɔɔdaana n de birikina; zɔta Naayinɛ ge yaɛ be’em. 2 A daa tari la dayɔɔsi siyopɔi la pɔyɔɔsi sitã. 3 A daa tari la piisi tusa ayopɔi (7,000), yuɣema tusa atã (3,000), lɔlesi tusere (1,000) la bosi kɔbesi senuu (500), la tuuntuneba zo’e zo’e, bala zuo a daa dela nɛrezure gana nɛresɛba woo n boi Dapɔya bɔba la. 4 A dayɔɔsi la ni eŋɛ la deeŋo bamea yɛa poan, mina woo la a dabeseri. Dabeseri woo san paɛ, ba ni beem la ba tãpa batã la ti ba wa’ana laɣum di ge nyu. 5 Ba de’eŋo dabesa la za’a san ba’asɛ, Yob ni yi ba mɛ wa’ana ti a basɛ ti ba ana filam. A nyaa ni isige la bulika asubaa kaabɛ kaabegɔ bo a kɔma la woo. Se’ere n sɔi la, Yob ni yeti: “Daanse’ere mam dayɔɔsi la tue mɛ ge pɔ bo Naayinɛ ba suuren.” Saŋa woo, Yob ni iti la bala. 6 Nananawa daarɛ deyima ti yelemɛŋɛrɛ Naayinɛ kɔma la laɣesɛ ti ba ze’ele Yehowa nɛŋan, ti Sitaana me laɣum wa’ana pa’asɛ ba poan. 7 Ti Yehowa yele Sitaana yeti: “Ho ze’ele la bɛsa na?” Sitaana lebese Yehowa yeti: “Mam eeri la tingɔŋɔ wa zuo ge kena ka poan.” 8 Ti Yehowa yele Sitaana yeti: “Hon ti’isɛ mam yameŋa Yob yele me bii? Nɛra ka boi ana wuu eŋa tingɔŋɔ la zuo. A dela tontɔɔdaana n de birikina, zɔta Naayinɛ ge yaɛ be’em.” 9 Bala ti Sitaana lebese Yehowa yeti: “Hon ti’isɛ ti Yob zoti Naayinɛ la zaŋa? 10 Hon ka mɛ la sɛla kaɛ en ti la gu’ura eŋa la a yire la sɛla woo ti a tara? Ho kã bo a nu’o tuuma mɛ ge ti a dusi me kɔ’ɔn pirɛ tiŋa la poan. 11 Ge ho san bɔta ti ho nyɛ teere, tiɛ ho nu’o sa’am sɛla woo ti a tara la ti a wan yaalɛ hɔ ho nɛŋan.” 12 Ti Yehowa yele Sitaana yeti: “Bisɛ! Sɛla woo ti a tara boi la ho nu’usin. Da dekɛ ho nu’o kalam buraa la mea!” Ti Sitaana fɔregɛ Yehowa nɛŋan. 13 Nananawa daarɛ deyima ti a dayɔɔsi la a bipugeto daa dita ge nyuura daam ba keema yire, 14 ti tuuntuna ayima daa wa’an Yob zɛ’an na yele en ti: “Nii la boi bim kɔɔri ni mɛ ge ti bũsi la me oberi ni yaama ba zɛ’an 15 ti Sabeadoma wa’ana faaɛ ba keŋɛ ge ku tuuntuneba la la ba sɔ’ɔsi. Mam ma’a n nyaŋɛ pĩɛ wa’ana ti n yele ho wa.” 16 Eŋa n daa boi bim tɔɣera la, ti ayima me wa’ana yeti: “Bugum n ze’ele Naayinɛ zɛ’an sige na di piisi la yamesi la! Mam ma’a n nyaŋɛ pĩɛ wa’ana ti n yele ho wa.” 17 Eŋa n daa boi bim tɔɣera la, ti ayima me wa’ana yeti: “Kaldeadoma n daa pu bamesi sugumnɔɔrɛ butã wa’ana faaɛ yuɣema la ge ku yamesi la me la ba sɔ’ɔsi. Mam ma’a n nyaŋɛ pĩɛ wa’ana ti n yele ho wa.” 18 Eŋa n daa boi bim tɔɣera la, ti ayima me wa’ana yeti: “Ho dayɔɔsi la ho bipugeto la boi bim dita mɛ ge nyuura daam ba keema yire. 19 Bilam bilam ti kusebekãtɛ ze’ele goo poan na vuke yire la ti la lui kɔma la zuo ti ba ki. Mam ma’a n nyaŋɛ pĩɛ wa’ana ti n yele ho wa.” 20 Bala ti Yob isige ãasum a fuo ge sie a zuo; nyaa lui tiŋa kũ’ure 21 ge yeti: “Mam ze’ele la beele yese n ma puuren na, N me wan lebe la beele. Yehowa n bo, Yehowa n le to’e. Basɛ ti Yehowa yu’urɛ nyɛ pɛ̃ka.” 22 Wana wa za’a poan la, Yob ka tum be’em bii tɔɣɛ giisɛ Naayinɛ ti a tum la be’em.