2 Nadoma

21 Manase yuun dela yuun pia la ayi ge dɛna naba, a me daa di na’am la yuun piwɛi la anuu Yerusalem tiŋa poan. A ma yu’urɛ daa dela Hefsiba. 2 A daa tum la be’em Yehowa nɛŋan ge tinse’a ti Yehowa daa sa’ɛ ba Israel poan la a daa tɔɣeseri la ba tuunfɛ’ɛsa la tuna. 3 Zɔya zuto kãabegɔ zɛ’ɛsi ti a sɔ Hezekia daa gbi basɛ la, a daa le malum mɛ ba mɛ ge tee mɛ Kãabegɔ bimbina bo Baal ge me maalɛ bagerɛ dɔɔ wuu Israel naba Ahab n daa eŋɛ se’em la. Ge me daa ku’usa tiŋa na’asa saazuo lɔɣɔrɔ la za’a. 4 A me daa mɛ la kãabegɔ bimbina Yehowa yire la poan, zɛsɛka ti Yehowa yeti: “Yerusalam poan ti mam wan basɛ ti n yu’urɛ bɔna.” 5 A me daa kelum mɛ la kãabegɔ bimbina ze’ele zinzaɣesi siyi la n boi Yehowa yire la poan la bo saazuo lɔɣɔrɔ la za’a. 6 Ge me daa dekɛ amea dayɔa eŋɛ buɣum poan kãabɛ; ge tuna tiimtooma, ɛɛra bakolo ge me loe baɣabibisidoma la bakolebuɣeriba bo amea. A daa tum la tuunfɛ’ɛsa zo’e zo’e Yehowa nɛŋan dekɛ sa’am a suure. 7 A daa dekɛ la tuulum dɔɔrɔ maalɛ baɣerɛ ta biŋe yire la ti Yehowa daa tɔɣɛ de yele bo David la a dayɔa Solomon yeti: “Yire wa la Yerusalem ti mam loe israel yizuto la woo poan ti n basɛ ti n yu’urɛ bɔna bilam daarewoo. 8 Israeldoma la san eŋɛ yelese’a ti mam yele ba la za’a, la Lɔɔ la ti mam yameŋa Moses daa dekɛ bo ba ti ba dɔla la, n kan le makɛ basɛ ti ba yese tinsɛka ti n dekɛ bo ba sɔyaabedoma la poan ta ɛɛra nyaara.” 9 Ge ba daa ka kelese, ti Manase daa kelum basɛ ti ba tuna be’em hali gana tinse’a n daa boi Israel ti Yehowa daa sa’am la. 10 Yehowa kelum tɔɣera dɔla a yamesi nɔdɛ’ɛseba la poan yeti: 11 Yuda naba Manase daa tum la tuunfɛ’ɛsa. A daa kɔ’ɔn tuna la be’em ti la gana Amondoma n yuun boi a nɛŋa la ge me basɛ ti Yudadoma galum la a baɣa la. 12 Bala la Yehowa, Israel Naayinɛ la n yele se’eem n wana: “N yeti n tari la sa’aŋɔ paɛ Yerusalem la Yuda, bala ti mina woo n wum la tuberɛ bayi la za’a wan ana waam. 13 N wan dekɛ misɛka ti ba dekɛ makɛ Samaria, la mɛa lɔkɔ la ti ba dekɛ makɛ Ahab yizuo la makɛ Yerusalem; Mam wan pee Yerusalem ti de ana filam wuu ba ni pee laa ti de ana filam ge tuluge de vuge se’em la. 14 N wan tamɛ n nɛresɛba n gee la yele ge dekɛ ba eŋɛ ba dindoma la nu’usin ti ba fã ba tari ba keŋɛ la ba lɔɣɔrɔ za’a 15 se’ere n sɔi la, ba tum la be’em mam nɛŋan ge me kelum nyiira mam sunsɔa kɔ’ɔn pɔsɛ daanse’ere daarɛ ti ba sɔyaabedoma yese Egypt tiŋa ta paɛ zina wa.’”