Luke
3 Kaezar Tiberius na’am bisega yuun pia la anuu poan, se’em ma’a ti Pontius Pilate yuun dɛna Yudea gɔmena la, Herod me yuun dela Galilee tiŋa bisegadaana ti a suɔ Filip dɛna Ituraea la Trakonitis tisi bisegadaana ti Lisanias me dɛna Abilene bisegadaana, 2 malema nɛŋadaana Annas la Kaiafas saŋa la ti Naayinɛ tɔɣɛ bo Zekaria dayɔa Yon pɔɣetia la poan. 3 Ti a keŋɛ tiŋa la za’a waabi n kaɛ Yordan la, mɔɔla ti ko’om musega n pa’ali ti nɛreba iti teere ge ta’an nyɛta be’em sugeri dia, 4 wuu nɔdɛ’ɛsa Isaiah yetɔɣum la n gulesɛ bɔna gɔŋɔ la poan n yeti: “Nɛra n tɔɣeri pɔɣetia poan basa na yeti: ‘Maalɛ ya Yehowa sore la! Maalɛ ya a sore la ti la tɔ tontɔɔ. 5 Bɔ̃’ɔ woo wan pirɛ, ti zoore la kunkune woo palesɛ; sarɔɔ ŋmɛlema la wan tɔ tontɔɔ, ti sarɔtɔ seto n sa’am la ana soŋa; 6 ti nɛra woo wan nyɛ Naayinɛ nyɔvore faarɛ la.’” 7 Bala la a daa pɔsɛ yɛta nɛrekuuŋɔ la n keni a zɛ’an na ti ba muse ko’om la yeti: “Kanpiisii kɔma wa, ani n kaɣɛ ya ti zɔ fɔ̃regɛ sunsɔkiilega la n ye na la poan? 8 Bala zuo la, tum ya tuuma n pa’alɛ ti ya tee mɛ. Da pɔsɛ yɛta yamea ti, ‘Tomam sɔ dela Abraham.’ Se’ere n sɔi la mam yeti ya mɛ ti Naayinɛ ta’an basɛ ti kuga wa lebege Abraham kɔma. 9 Yelemɛŋɛrɛ, lia la puɣum deŋɛ gã’a la tiisi la nyɛga. Tisɛka n ka wɔni wɔla soma dela ba kɛ en basɛ ge dekɛ de basɛ bugum poan.” 10 Ti nɛrekuuŋɔ la sɔkera en yeti: “Bem n nyaa nari ti to eŋɛ?” 11 Ti a lebese ba yeti: “Basɛ ti nɛresɛka n tari lɔɣeyɛɛtɔ bayi loe bo nɛresɛka n ka tari sɛsɛla la ge ti se’em n tari sɛla n wan di la me eŋɛ bala nɔɔ.” 12 Hali lampo tɔ’ɔseriba daa wa’an a zɛ’an mɛ ti ba muse ko’om ge daa yele en yeti: “Pa’ala, bem n nari ti to eŋɛ?” 13 A yele ba yeti: “Da to’e ya sɛla n gani lampo laɣehɔ la.” 14 Leyɛ’ɛsa, sɛba n tuni soogɛa tuuma la daa sokeri en yeti: “Bem n nari ti to eŋɛ?” Ti a yele ba yeti: “Da daani ya nɛnɛra bii ya parum yele bo nɛra ge basɛ ya ti sɛla ti ya tɔ’ɔsa la seke ya.” 15 Nananawa nɛreba la daa kɔ’ɔn gura mɛ ge ti ba za’a daa ti’isa Yon yele ba suuren ti , “Daanse’ere eŋa n de Krista la bii?” 16 Yon bo lebesego la mɛ, yɛta ba za’a yeti: “Mam nɔɔri, mam museri ya la ko’om ge se’emdaana paŋa n gani mam la ye me na, se’em ti mam puɣum ka nara ti n ta’an lorege a taɣera mi’a. Eŋa wan dekɛ la zilam vo’osum la bugum muse ya ko’om. 17 A yeelego lɔkɔ la boi la a nu’usin, a me wan piisɛ a tɔa zɛ’an la soŋa soŋa ge laɣesɛ a witiwiti la biŋe bãarɛ poan ge a wan nyɔ urego la bugum seko poan n kan malum kiŋe.” 18 A daa kelum ka’am nɛreba mɛ yɛla zo’e zo’e ge kɔ’ɔn mɔɔla yelesoma la bɔ’ɔra nɛreba la. 19 Yon daa zɛregɛ Herod n de sɔ’ɔlum la bisegadaana la mɛ la eŋa n dekɛ Herodias n de amea suɔ pɔɣa, la tuunfɛ̃’ɛsa la woo ti a tum la. 20 Bala zuo la, Herod n daa le tum sɛla pa’asɛ dela: A daa paɣɛ Yon la paka deo poan. 21 Se’em ma’a ti nɛreba la za’a daa muse ko’om ba’asɛ la, Yezu me daa muse ko’om mɛ. Eŋa n daa boi bim zusera la, saazuo daa yu’ɛ mɛ, 22 ti zilam vo’osum la sige a zuo na ana wuu dawene la ti kɔ̃a ze’ele saazuo tɔɣɛ basɛ na ti: “Hon de mam Dayɔa, se’em ti n nɔŋɛ; ge sakɛ bo ho.” 23 Se’em ma’a ti Yezu yuun pɔsɛ a tuuma la, a yuun de wuu yuuma pitã, ti nɛreba yuun ti’isa ti a dela Yosef dayɔa, Heli dayɔa, 24 Matat dayɔa, Levi dayɔa, Melki dayɔa, Yannai dayɔa, Yosef dayɔa 25 Matatias dayɔa, Amos dayɔa, Nahum dayɔa, Esli dayɔa, Nagai dayɔa, 26 Maat dayɔa, Matatias dayɔa, Semein dayɔa, Yosek dayɔa, Yoda dayɔa, 27 Yoanan dayɔa, Resa dayɔa, Zerubabel dayɔa, Sealtiel dayɔa, Neri dayɔa, 28 Melki dayɔa, Adi dayɔa, Kosam dayɔa, Elmadam dayɔa, Er dayɔa, 29 Yezu dayɔa, Eliezer dayɔa, Yorim dayɔa, Matat dayɔa, Levi dayɔa, 30 Simeon dayɔa, Yudas dayɔa, Yosef dayɔa, Yonam dayɔa, Eliakim dayɔa, 31 Melea dayɔa, Menna dayɔa, Matata dayɔa, Natan dayɔa, David dayɔa, 32 Yesse dayɔa, Obed dayɔa, Boaz dayɔa, Salmon dayɔa, Nason dayɔa, 33 Aminadab dayɔa, Arni dayɔa, Hezron dayɔa, Perez dayɔa, Yuda dayɔa, 34 Yakob dayɔa, Isaak dayɔa, Abraham dayɔa, Tera dayɔa, Nahor dayɔa, 35 Serug dayɔa, Reu dayɔa, Peleg dayɔa, Eber dayɔa, Sela dayɔa, 36 Kainan dayɔa, Arpaksad dayɔa, Sem dayɔa, Noah dayɔa, Lamek dayɔa, 37 Metusela dayɔa, Enok dayɔa, Yared dayɔa, Mahalaleel dayɔa, Kainan dayɔa, 38 Enos dayɔa, Set dayɔa, Adam dayɔa, Naayinɛ dayɔa.