Luke

2 Nananawa dabesa aŋa poan ti Kaezar Augustus bo nɔɔrɛ ti ba gulesɛ nɛra woo n boi tingɔŋɔ wa zuo yu’ura. 2 (Ba yuun pɔsɛ gulesɛ nɛreba yu’ura wa la se’em ma’a ti Kuirinius yuun dɛna Siria gɔmena la.) 3 Ti nɛreba la za’a keŋɛ ti ba gulesɛ ba yu’ura, nɛra woo keŋɛ la amea tiŋa. 4 Deni poan ti Yosef ze’ele Nazaret tiŋa n boi Galilee tiŋa poan la, keŋɛ Betlehem tiŋa n boi Yudea tiŋa la se’ere n sɔi la, a daa dela David yire la a yizuo poan nɛra. 5 A daa doose la Mary keŋɛ ti ba ta gulesɛ ba yu’ura, ba daa dekɛ en elese en mɛ ti la daa ka yue la a dɔɣɛ. 6 Se’em ma’a ti ba daa bɔna bim la, a dɔɣum saŋa daa paɛ mɛ. 7 Ti a dɔɣɛ budibila, a bikeenma ge daa dekɛ tanɛ n pɔ̃resɛ pĩ en ge dekɛ en gã’arɛ dusi zɔ̃ŋɔ poan se’ere n sɔi la deo daa ka boi ba kɛ̃’a zɛ’an la. 8 Zɛkaŋa mea nɔɔ poan, dunkeenma n daa boi yiŋa ge bisera ba dusi yu’uŋɔ 9 Ti Yehowa maleka yuun ze’ele ba zɛ’an yelema, Yehowa gilema la niɛ kaɛ ba ti dabeem saaɛ ba. 10 Ge maleka la yele ba yeti: “Da zoti ya dabeem ge bisɛ ya! Mam mɔɔli la yelesoma n wan bo nɛra woo pupeelum zo’e zo’e. 11 Se’ere n sɔi la, David tiŋa poan ba dɔɣɛ ya fãara, se’em n de Krista to Daana la. 12 Ya wan nyɛ sɛla n wana: Ya wan nyɛ bilia ti ba dekɛ tanɛ n pɔ̃resɛ pĩ en ti a gã’a dusi zɔ̃ŋɔ poan.” 13 Ti bilam bilam nɔɔ ti saazuo malesi la zo’e zo’e wa’ana pa’asɛ maleka la poan pɛɣera Naayinɛ yeti: 14 “Gilema bɔna saazuo sa bɔ’ɔra Naayinɛ ti tingɔŋɔ wa zuo suma’asum bɔna la nɛresɛba ti a nam bo la.” 15 Se’em ma’a ti malesi la daa basɛ ba ge lebe saazuo la, dunkeenma la daa tɔɣeri bɔ’ɔra taaba yeti: “Basɛ ya ti to tiregɛ keŋɛ Betlehem ge nyɛ sɛla n eŋɛ ti Yehowa basɛ ti to baŋɛ wa.” 16 Ti ba keŋɛ kalam ta nyɛ Mary la Yosef la bilia la n gã dusi zɔ̃ŋɔ la poan. 17 Se’em ma’a ti ba nyɛ wana la, ba tɔɣɛ sɛla ti ba wum doose bia la yele mɛ. 18 Ti sɛba woo n daa wum la daa ya la nɔɔrɛ la dunkeenma la n yele ba sɛla la 19 ge Mary daa tɛ̃ri yɛla wa mɛ ge bɔkera yɛla a suuren. 20 Ti dunkeenma la lebe ta na’asa ge pɛɣera Naayinɛ la sɛla woo ti ba wum ge nyɛ la, wuu bamam n puɣum wum ni se’em la. 21 Dabesa anuu pooren, se’em ma’a ti saŋa la daa paɛ ti ba ŋma en la, ba daa siɣɛ a yu’urɛ la Yezu, yuse’ere ti maleka la daa pa’alɛ ge ti ba nyaa nyɔkɛ a puurɛ la. 22 Leyɛ’ɛsa saŋa la n daa paɛ ti ba eŋɛ bamesi filam wuu Moses Lɔɔ la n pa’alɛ se’em la, ba daa tari en wa’an la Yerusalem na ti ba dekɛ en pa’alɛ Yehowa, 23 wuu la puɣum gulesɛ se’em bɔna Yehowa Lɔɔ la poan la: “Bikeenma woo n de budibila ba wan yi’ira en la Yehowa zilam bunɔ.” 24 Ti ba eŋɛ wuu Yehowa Lɔɔ la n yele se’em la: “nadoma dawɛma ayi bii zambalɔɔra ayi.” 25 Ge bisɛ! buraa ayima n daa boi Yerusalem ti a yu’urɛ dɛna Simeon, buraa wa dela tontɔɔ nɛra nɔŋɛ Naayinɛ pu’usegɔ ge gura Israel subuɣelegɔ, ti zilam vo’osum la bɔna a zuo. 26 Leyɛ’ɛsa Naayinɛ daa doose la zilam vo’osum la poan niɛ pa’alɛ en yeti, a kan ki san daɣena a nyɛ la Krista se’em ti Yehowa tum la. 27 Vo’osum la n yuun basɛ ti Simeon wa’an pu’usegɔ deo la poan na, se’em ma’a ti Yezu dɔɣereba tari en wa’ana ti ba tum doose la malema la n boi Lɔɔ la poan n pa’alɛ se’em la, 28 a daa to’e bia la mɛ zãla a nu’usin ge daa pɛɣɛ Naayinɛ yeti: 29 “Nananawa Sɔ’ɔlum Za’adaana, ho basɛ ti ho yameŋa yɛ’a la suma’asum wuu hon tɔɣɛ se’em la, 30 Se’ere n sɔi la mam nini nyɛ se’em ti ho wan doose a poan tari faarɛ wa’ana 31 ti ho maasum nɛreba woo ninin la, 32 nɛɛsum seko n wan pilege se’em n pĩ tisi la dɛna gilema bɔ’ɔra ho nɛreba Israel la.” 33 Ti la kɔ’ɔn eŋɛ bia la sɔ la a ma la pakerɛ, la eŋa n tɔɣeri a yele se’em la. 34 Leyɛ’ɛsa, Simeon kã bo en mɛ ge yele Mary n de bia la ma yeti: “Bisɛ! Ba loe bia wa mɛ ti nɛreba zo’e zo’e n boi Israel luta bii ba le isige ge me dɛna daalegɔ bunɔ ti ba tɔɣera giisa 35 (yelemɛŋɛrɛ, su’a woko wan doose ho poan tole), la wan eŋɛ se’em ti nɛreba zo’e zo’e n ti’iseri sɛla ba suuren la wan niɛ peelum.” 36 Nananawa, pɔka ayima n daa boi dɛna nɔdɛ’ɛsa ti a yu’urɛ dɛna Anna n de Fanuel bipugela n ze’ele Aser buuri la poan. Pɔka wa daa kuregɛ mɛ. Se’em ma’a ti a yuun ele la, eŋa la a sira yuun naɛ taaba bɔna la yuuma ayopɔi ma’a 37 ge a daa nyaa dela pɔkɔ̃ɔrɛ n de yuuma pinii la anaasi, a daa ka vi’iri pu’usegɔ deo la poan, kɔ’ɔn tuna pu’usegɔ tuuma yu’uŋɔ la bulika ge luta nɔɔrɛ ge me zusera. 38 Sankaŋa mea nɔɔ ti a keŋɛ lɛm na ge pɛɣera Naayinɛ ge me tɔɣera bia la yele bɔ’ɔra sɛba woo n daa kɔ’ɔn gura Yerusalem faarɛ la. 39 Se’em ma’a ti ba yuun eŋɛ sɛla woo ti Yehowa Lɔɔ la pa’alɛ la ba’asɛ la, ba yuun lebe la Galilee, bamea tiŋa, Nazaret. 40 Ge ti bia la kɔ’ɔn zɔ’ɔra, tara paŋa la yɛm zo’e zo’e ge ti Naayinɛ zo’osego la bɔna la en. 41 Nananawa, yuunɛ woo a dɔɣereba la nɔŋɛ ba kena la Yerusalem ta dita Azɔɔtole de’eŋo la. 42 Ge eŋa n yuun ta dɛna yuun pia la ayi la, ba yuun keŋɛ ta di de’eŋo wa mɛ wuu ba ni puɣum ita se’em la. 43 De’eŋo la saŋa n daa ta ba’asɛ la ti ba daa lɛbera kula la, Yezu n de bia la yee la Yerusalem ge ti a dɔɣereba la ka baŋɛ. 44 Ba daa ti’isɛ ti a laɣum la nɛrekuuŋɔ la kena. Ba daa keŋɛ la dabemuunɛ ge nyaa daa pɔsɛ ɛɛra en ba suurɔ zɛ’an la sɛba ti ba mina zɛ’an. 45 Ge ba daa ka nyɛ en ge nyaa lebe Yerusalem ta ɛ en soŋa soŋa. 46 Aatɔ dabesa atã pooren la, ba daa nyɛ en la pu’usegɔ deo la poan ti a zi’a pa’alegɔdoma la tiŋasuka kɛlesa ba ge sɔkera ba yɛla. 47 Ge sɛba woo n daa keleseri en la daa ya la nɔɔrɛ la eŋa n bɔkeri yɛla se’em ge lɛbesa yɛla se’em la. 48 Nananawa se’em ma’a ti a dɔɣereba daa nyɛ en la ba daa ya la nɔɔrɛ, ti a ma yele en yeti: “N bia, beni n sɔi ti ho eŋɛ to wana? Ho sɔ la mam kɔ’ɔn mɔ’ɛ la nini ɛɛra hɔ.” 49 Ge a yele ba yeti: “Beni n sɔi ti ya eeri ni mam, yamam ka mi ti la nari ti n bɔna la n Sɔ yire poan?” 50 Ge ba daa ka bɔkɛ sɛla ti a tɔɣera bɔ’ɔra ba la. 51 Ti a nyaa doose ba lebe Nazaret ge daa kɔ’ɔn siregera amea bɔ’ɔra ba. Leyɛ’ɛsa a ma daa ma’ɛ la amea basɛ ti yele ana wa za’a bɔna a suuren. 52 Ti Yezu kɔ’ɔn zɔ’ɔra ge me tara yɛm zo’e zo’e ti Naayinɛ la nɛreba nɔŋɛ en.