Amos

1 Amos, se’em n laɣum ugera piisi Tekoa tiŋa poan la yelesum n wana. A nyɛ yele wa la sansɛka ti a nyɛ liligere poan sɛla n wan paɛ Israel la. A nyɛ de la Yuda tiŋa Naba Uzia la Yehoas dayɔa Yeroboam n de Israel naba la saŋa la poan, yuuma ayi ge ti tiŋa la wan miim la. 2 A yeti: “Yehowa ze la Zion Zoore la zuo tãsera na, a kunkore ze’eti la Yerusalem tiŋa na, ti bɔ̃’ɔ yaama woo ku’e, Ti Karmel zoore zuo mɔɔ za’a ku’e.” 3 “Yehowa n yele se’em n wana, “Damaskus be’em sugumnɔɔrɛ butã la bunaasi la zuo, mam kan gu sɛla n wan paɛ de la, Sɛla n sɔi la ba dekɛ la kuto tanduŋa n ane nyaresa nyaresa tɔ Gilead. 4 Bala, mam wan basɛ ti bugum sige Hazael yire la poan, Ti bu di Ben Hadad pɛɛntɛɛnreba bɔŋa zɛ’ɛsi lalesi la za’a saɣum.