Pin’ileŋɔ

26 Ti kom daa sige tiŋa la poan. Bu ganɛ kom sebo n daa lui Abraham dabesa la poan la mɛ. Bala ti Isaak daa keŋɛ Filistidoma naba Abimelek zɛ’an Gerar tiŋa poan. 2 Ti Yehowa niɛ amea pa’alɛ en ge yeti: “Da makɛ keŋɛ Egypt tiŋa. Bɔna tinsɛka ti mam pa’alɛ ho ti ho bɔna la. 3 Kɛ̃’ɛra tiŋa wa poan woo ho dela saana la ge n wan kelum bɔna la hɔ ge kã bo ho se’ere n sɔi la, n wan dekɛ tisi ana wa bo la hon la ho bia. N wan tum nɔbiŋere seko ti n daa biŋe la ho sɔ Abraham la: 4 ‘N wan basɛ ti ho buutɛ wiɛ wuu ŋmarebɛa n boi saazuo la; n wan dekɛ tisi ana wa za’a bo ho buutɛ la; tisi woo n boi tingɔnɔ wa zuo wan doose la ho buutɛ wa poan nyɛ kã’a bo bamesi,’ 5 se’ere n sɔi la Abraham kelese mam kua mɛ ge dɔla mam nɔya la n pa’alegɔ la n lɔɔ.” 6 Ti Esau kelum kɛ̃’ɛra Gerar tiŋa. 7 Tiŋa la nɛreba n daa ni sokera en ti ba baŋɛ a pɔɣa la, a ni yele ba yeti: “A dela mam tãya.” Dabeem n daa ni tara en ti a yeti, “A dela mam pɔɣa” se’ere n sɔi la, a daa yeti, “tiŋa wa nɛreba wan ku mam Arebeka zuo” se’ere n sɔi la, a daa som mɛ. 8 Saŋa n daa tole wana maɣa la, Filistidoma naba Abimeleka daa ze la a takole poan bisera ge daa nyɛ Isaak la a pɔɣa Arebeka n sareni. 9 Bilam bilam ti Abimelek yi Isaak soke en yeti: “Pɔka wa dela ho pɔɣa! Beni n sɔi ti ho yeti, ‘A dela mam tãya’?” Bala ti Isaak yele en yeti: “Sɛla n sɔi ti mam daa yele bala dela, dabeem n daa tara mam ti ba ta’an ko mam a zuo.” 10 Ge Abimelek daa le yeti: “Ho eŋɛ to la wani n bala? Nɛreba la ayima daa ta’an gã’arɛ ni ho pɔɣa la mɛ, ho wan basɛ ti tomam galum ni!” 11 Ti Abimelek bo nɛreba la za’a nɔɔrɛ yeti: “Se’emdaana n kalum buraa wa la a pɔɣa la, wan ba’asum ki!” 12 Ti Isaak burɛ bumbuura tiŋa la poan, yuun denɛ mea poan a daa kɛ la eŋa n burɛ sɛla la sugumnɔɔrɛ kɔbega se’ere n sɔi la, Yehowa n daa kã’ari bɔ’ɔra en. 13 Buraa wa daa lebege la buntata ge daa kelum kɔ’ɔn nyɛta lɔɣɔrɔ ta paɛ se’em ma’a ti a taresum la daa zo’e gaŋɛ. 14 A daa tari la piisi la nii la yamesi zo’e zo’e, ti Filistidoma la nini daa pɔsɛ tɛ̃ta la en. 15 Bala zuo, Filistidoma la daa dekɛ la tintɔnɔ lĩ lɔɔsi la za’a ti a sɔ yamesi la daa tũ Abraham saŋa la. 16 Ti Abimelek ta yele Isaak yeti: “Isige fɔregɛ tomam tiŋa wa, se’ere n sɔi la ho nyaa kpe’em gaŋɛ tomam mɛ.” 17 Bala ti Isaak isige bilam keŋɛ Gerar bũ’ɔ la poan nyaa ta zĩ’ire bilam. 18 Ti Isaak le tũ lɔɔsi seto ti ba daa tũ a sɔ Abraham saŋa la ge ti Filistidoma la daa lĩ ba Abraham kum pooren la. Yuse’a ti a sɔ daa dekɛ siɣɛ lɔɔsi la, yu’ura aŋa nɔɔ ti a daa tara yi’ira ba. 19 Isaak yamesi la n daa boi bim tũ’ura lua bɔ̃’ɔ la poan la, ba daa tũ ta be’e la kosomɔ. 20 Ti Gerar dunkeema la daa pɔsɛ ŋmɛ’ɛra nɔpke’ene la Isaak dunkeema la ge tɔɣera yeti: “Tomam n sɔi ko’om la!” Bala n sɔi ti a siɣɛ lua la yu’urɛ ti Esek, se’ere n sɔi la ba daa ŋmɛ la nɔpke’ene la en. 21 Ti ba le pɔsɛ tũ’ura lua ayima ti nɛreba la le pɔsɛ zabera la ba. Ti a siɣɛ ka yu’urɛ ti Sitna. 22 Pooren a daa isige bilam mɛ keŋɛ ta tũ lua kayima ge ba daa ka ŋmɛ nɔkpe’ene la en lua la zuo. Bala n sɔi ti a siɣɛ lua la yu’urɛ yeti Arehobot ge yeti: “La dela Yehowa n bo to zɛsoŋa ge me basɛ ti to wi’ɛ tiŋa la poan.” 23 A daa nyaa ze’ele bilam keŋɛ la Beeseba. 24 Yu’unkuŋɔ la Yehowa daa niɛ amea pa’alɛ en mɛ ge yele en yeti: “Mam n de ho sɔ Abraham Naayinɛ la. Da zɔta dabeem, mam boi me la hɔ. N me wan kã bo ho ge basɛ ti ho yaasi la wi’ɛ, mam yameŋa Abraham zuo.” 25 Bala ti a mɛ kaabegɔ bimbine bilam ge daa yi Yehowa yu’urɛ. Isaak daa tĩ a tɛnti la bilam ge ti a yamesi la me daa tũ lua bim. 26 Pooren Abimelek la a ka’ana la yu’urɛ n de Ahuzat la a pɛɛntɛɛreba nɛŋadaana yu’urɛ n de Pikol daa ze’ele Gerar wa’an a zɛ’an na. 27 Ti Isaak nyaa yele ba yeti: “Ya wa’an mam zɛ’an ti n eŋɛ la bim daɣɛ yamam n daa yaɛ mam ge sa’ɛ mam ya tiŋa poan?” 28 Bala ti ba yeti: “Tomam sirum nyɛ ti Yehowa n kɔ’ɔn bɔna la hɔ. Bala n sɔi ti tomam ti’isɛ ti, ‘Soso basɛ ti to pɔ ti to wan soŋera taaba ge biŋe nɔɔrɛ la taaba, 29 ti ho kan eŋɛ tomam be’em wuu tomam n ka daam ho se’em la, ho mi ti tomam daa eŋɛ ho la som ma’a se’ere n sɔi la to daa basɛ ti ho keŋɛ mɛ la suma’asum. Ho dela mina ti Yehowa kã bo ho.’” 30 Bala pooren, a daa eŋɛ la dia na bo ba ti ba di ge nyu. 31 Beere n daa yelegɛ la, ba daa te’ele isige mɛ ge daa biŋe nɔɔrɛ la taaba. Bala pooren ti Isaak keese ba ge basɛ ba sore ti ba ze’ele a zɛ’an lebe la suma’asum. 32 Daandindaarɛ la, Isaak yamesi la daa wa’ana yele lua la ti ba tũ la yele bo en, ba daa yele en yeti: “To paɛ ko’om mɛ!” 33 Ti a siɣɛ ka yu’urɛ Siba. Bala zuo ti ba yi’ira tiŋa la yu’urɛ yeti Beerseba ta paɛ zina. 34 Se’em ma’a ti Esau yuun dɛna yuun pinaasi la, a yuun di la Hiti nɛra yu’urɛ n de Beeri bipugela Yudit la Hiti nɛra ayima me yu’urɛ n de Elon bipugela Basemat. 35 Ba yuun dekɛ la suure kɛ̃’ɛsɛ Isaak la Arebeka paa.