Pin’ileŋɔ

33 Pooren ti Yakob daa gorege zuo bisɛ nyɛ Esau la buraasi kɔbesinaasi ti ba kena na. Ti a pu kɔma la bo Lea la Arakel la pɔɣesɔɔrɔ bayi la. 2 A daa basɛ ti pɔɣesɔɔrɔ la, la ba kɔma la deŋɛ nɛŋa nyaa taɣela Lea la a kɔma ge ti Arakel la Yosef bɔna ba poore. 3 Ti amea nyaa tole ba nɛŋa ge kũ’uta tiŋa sugumnɔɔrɛ buyopɔi ta paɛ a suɔ la nɛŋan. 4 Ge Esau daa zɔ mɛ ta tu’usɛ en ge kɔkɛ en ge mɔɣɛ a nɔɔrɛ ti bamam bayi la za’a kaasa. 5 Se’em ma’a ti a daa gorege zuo nyɛ pɔɣesi la kɔma la, a daa soke yeti: “Nɛreba wa n doli ho poore wa dela bani?” ti a yeti: “Ba dela kɔnsɛba ti Naayinɛ zu’usɛ ho yameŋa wa dekɛ bo en la.” 6 Ti pɔɣesɔɔrɔ la, la ba kɔma la daa wa’ana kũ’ure tiŋa, 7 Ti Lea me la a kɔma la daa wa’ana kũ’ure tiŋa. Ti Yosef la Arakel nyaa wa’ana kũ’ure tiŋa. 8 Ti Esau soke yeti: “Nɛrebana woo ti mam tu’usɛ ba wa, la vuurɛ dela bem?” Ti a lebese yeti: “Mam eŋɛ bala ti n daana ta’an zɔ n nimbɔ̃’ɔ.” 9 Ti Esau yeti: “N suɔ wa, mam tari nutatum zo’e zo’e mɛ. Tara ho lɔɣɔrɔ.” 10 Ge Yakob daa yeti: “Aayi, n beleni ho mɛ. Ho san sirum zɔ mam nimbɔ̃’ɔ, la dela ho to’e n bo’olum wa se’ere n sɔi la mam tari de wa’an me na, la wan eŋɛ se’em ti n ta’an nyɛ ho nɛŋa. Mam me n nyɛ ho nɛŋa wa, la ani wuu mam nyɛ la Naayinɛ nɛŋa la se’ere n sɔi la, ho puurɛ pee mɛ la mam. 11 Soso to’e bo’olum wa n de mam kã’a ti mam tari na bo ho wa se’ere n sɔi la, Naayinɛ zu’usɛ mam mɛ ge bo mam sɛla woo n pakɛ mam.” A daa kɔ’ɔn bɛlena en la bala ti a nyaa to’e.