Yɛhega
32 Ge nɛreba la daa bisɛ ti Moses yuuri mɛ kelum ka ze’ele zoore la zuo sige na. Ti nɛreba la wa’an Aaron zɛ’an na ge yele en yeti: “Isige, maalɛ yinɛ bo to ti a ta’an bɔna to nɛŋa, se’ere n sɔi la to ka mi sɛla n eŋɛ Moses wa, burasɛka n tari to ze’ele Egypt tiŋa yese na la.” 2 Bala poan ti Aaron yele ba yeti: “Foe ya salema tubekayulesi n boi ya pɔɣeba la ya dayɔɔsi la ya bipugeto tuba poan tari na bo mam.” 3 Ti nɛreba la za’a pɔsɛ yulesa tubekayulesi la n boi ba tuba poan la tara kena bɔ’ɔra Aaron. 4 Ti a to’e salema la ba zɛ’an ge dekɛ lɔkɔ ti ba tara kuta nyaa maalɛ salema naɣebila. Ba daa nyaa tɔɣeri yeti: “O Israel, ho Naayinɛ n wana, se’em n tari ho ze’ele Egypt tiŋa yese na la.” 5 Aaron n daa nyɛ wana wa la, a daa mɛ la kaabegɔ bimbine ze’ele ka nɛŋan. Aaron nyaa yeti: “To wan eŋɛ kibisi bo Yehowa beere.” 6 Ti ba isige kalam bulika ge pɔsɛ kaabera nyɔ̃’a kaabegɔ la suma’asum kaabegɔ. Bala pooren la nɛreba la daa zi’ire mɛ di ge nyu. Ge nyaa daa isige de’em. 7 Yehowa nyaa yele Moses yeti: “Sige, keŋɛ, se’ere n sɔi la ho nɛreba la, sɛba ti ho tari ba ze’ele Egypt tiŋa poan yese na la, kɔ’ɔn gãlum la bamesi. 8 Ba pilum tamɛ mam n bo ba nɔɔrɛ ti ba ita se’em mɛ. Ba maalɛ la salema naɣebila bo bamesi ge kɔ’ɔn kũ’uta tiŋa bɔ’ɔra ka ge kaabera ka ge me tɔɣera yeti: “O Israel, ho Naayinɛ la n wana, se’em n tari ho ze’ele Egypt tiŋa yese na la.’” 33 Ge Yehowa yele Moses yeti: “Se’em n tum be’em giisɛ mam la, n wan saalum a yu’urɛ mam gɔŋɔ la poan.