2 Nadoma

8 Daarɛ deyima ti Elisa keŋɛ Sunem. Pɔka ayima n daa boi bilam dɛna nɛrezure ge daa yele Elisa yeti, a wa’an a yire na di. Bala a san ni dɔla bilam yɛ’ɛsa, a ni keŋɛ mɛ ta di bilam. 9 Ti a yele a sira yeti: “Mam mi ti burasɛka n ni dɔla kalam tɔla wa dela Naayinɛ zilam nɛra. 10 Soso, basɛ ti to maalɛ bɔpika saazuo bɔ’ɔ la poan ge dekɛ gɔrɔgɔ, teebule, kuka la kania ze’ele bim. Ti a san ni wa’an to zɛ’an na, a ta’an gã’arɛ bilam. 16 Ti a yele en yeti: “Yuunɛ wana ma’a, ti ho tari la budibela.” Ge pɔka la lebese en yeti: “Aayi, n daana, yelemɛŋɛrɛ Naayinɛ nɛra wa! Da pã’asɛ ho yameŋa.” 17 Ge, pɔka wa sirum ta nyɔkɛ la poore dɔɣɛ budibela yuunse’ere n taɣelɛ la poan sankaŋa mea nɔɔ, wuu Elisa n daa yele en se’em la. 32 Elisa n daa ta paɛ yire la poan la, ti bia la puɣum ki mɛ gã’a a gɔrɔgɔ zuo. 33 Ti a kɛ̃ bɔ’ɔ la poan ge yu bamam bayi la lebese na ge nyaa zusɛ Yehowa. 34 Ti a daa zom gɔrɔgɔ la zuo, uma bia la zuo ge dekɛ a nɔɔrɛ tɔ bia la nɔɔrɛ, dekɛ a nini tɔ bia la nini ge me dekɛ a nu’usi me paɣelɛ bia la nu’usin. A daa uma bia la zuo bala la, ti bia la inya nyaa pɔsɛ ana wam. 35 Elisa keŋɛ kaɛ yire la mɛ ge lebe gɔrɔgɔ la zuo ta uma bia la zuo. Ti bia la sɛ̃som sugumnɔɔrɛ buyopɔi ge nyaa pike a nini. 36 Elisa nyaa yi Gehazi yele en yeti: “Yi Sunem pɔka la na.” Ti a yi pɔka la kɛ̃ na. Ti Elisa yele en yeti: “Nyɔkɛ ho bia la.” 37 Ti pɔka la kɛ̃ na dɔ̃belɛ Elisa naman, kũ’ure tiŋa ge nyaa nyɔkɛ a bia la yese. 38 Elisa n lebe Gilgal la, kom n daa sige tiŋa la poan. Nɔdɛ’ɛsadoma dayɔɔsi la daa zĩ la a nɛŋan ti a yele a tuuntuna la yeti: “Dekɛ duɣekãtɛ duɣɛ zɛɛrɔ bo nɔdɛ’ɛsadoma dayɔɔsi la.”