2 Nadoma

9 Nɔdɛ’ɛsa Elisa daa yi nɔdɛ’ɛseba la dayɔa ayima yele en yeti: “Dekɛ ho fuo lo ho sia ge eŋɛ kalam dekɛ kaam dugela wa keŋɛ Ramot Gilead tiŋa. 2 Ho san ta paɛ, ɛ ya Nimsi dayɔa Yehosapat me dayɔa Yehu; kɛ ya a yiri la poan, welege en fɔregɛ a suurɔ la poan tari en keŋɛ saraa la poan. 3 Nyaa dekɛ dugela la kaɛ yeele a zuo yeti, Yehowa n yele se’em n wana: “Mam loe ho ti ho dɛna Israel Naba.” Ge yu’ɛ koleŋa la zɔ, da gu’una.” 4 Bala ti nɔdɛ’ɛsa tuuntuna la daa nyaa keŋɛ Ramot-Gilead tiŋa. 5 N paɛ la ti zaberɛ nɛŋadoma daa zi bim mɛ. Ti a yele ba yeti: O nɛŋadaana, n tari la sɔɔleŋa ti n bo ya. Ti Yehu soke en yeti: “To poan ani?” Ti a lebese yeti: O Naba, hon.” 6 Ti Yehu isige kɛ yire la poan, ti tuuntuna la kaɛ kaam la yeele a zuo ge yele en yeti: “Yehowa Israel Naayinɛ la n yele se’em n wana: ‘Mam loe ho mɛ ti ho dɛna naba sɔna Yehowa nɛreba bisera Israel poan.’ 7 Ho nari ti ho ku ho daana Ahab yizuo nɛreba la za’a ge n wan lerege mam nɔdɛ’ɛseba la za’a n ki Yesebel nu’usin la sanɛ. 8 Ahab yizuo la za’a wan suɛ; ge ti n me wan ku Ahab yizuo buraasi la za’a la sɛba n ka tari paŋa ge dɛna tarendoma la za’a. 9 N wan sa’am Ahab yire wuu mam sa’am Nebat dayɔa Yerobeom yire, la Ahiya dayɔa Ba’asa yire se’em la. 10 Ge baasi n wan obe Yesebel Yezreel samanɛ zuo, ti nɛnɛra kan laa en.’” Eŋa n yele bala la a yu’ɛ koleŋa la mɛ zɔ. 11 Se’em ma’a ti Yehu daa lebe a daana yamesi la zɛ’an la, ba soke en yeti: “Sɛla woo keŋɛ soŋa? Beni n sɔi ti zɔlegɔ wa wa’an ho zɛ’an?” Ti a lebese ba yeti: “Yamea mi buraa wa la eŋa n tɔɣeri se’em.” 12 Ge ba lebese en yeti: “La daɣɛ yelemɛŋɛrɛ! Soso yele to.” Ti a nyaa yeti: “Eŋa n yele ma se’em n wana ge le yeti, ‘Yehowa n yele se’em n wana: “Mam loe ho mɛ ti ho dɛna naba sɔna Israel bisera.”’” 13 N yele wana wa la, nɛrawoo eŋɛ la kalam yɛɛ a fuo dekɛ biŋe kura la zuo ge peebe tintanɛ ge yeti: “Yehu nyaa dela naba!” 14 Ti Nimsi dayɔa Yehosafat me dayɔa Yehu maasum ti a zabɛ la Yehoram. Bala ma’a ti Yehoram la Israeldoma daa maasum mɛ bɔna Aramoth Gilead, Aram Naba Hazael zuo. 16 Bala ti Yehu isige bã a yiiri torogo keŋɛ Yesreel se’ere n sɔi la, Yehoran pɔɣelum mɛ bɔna bilam, ti Yuda Naba Ahazia me keŋɛ bim ti a ta bisɛ Yehoram. 22 Yehoram n kɔ’ɔn nyɛ Yehu la, a yele en mɛ yeti: “Yehu, ho tari la suma’asum kena na yoi?” Ti eŋa me yeti: “suma’asum wan eŋɛ la wani ta’an bɔna se’em ma’a ti ho ma Yezebel yalumtuuma la tiim tuuma la kɔ’ɔn pirɛ zɛ’an woo la?” 23 Bilam bilam, Yehoram ŋmɛregɛ a yiiri torogo la mɛ ti a zɔ ge yele Ahazia yeti: “Ahazia, Ba pã’asɛ to mɛ!” 24 Ti Yehu dekɛ tãhɔ tɛ̃ Yehoram pooren ti pɛɛhɔ la lo yese a suure poan na ti a lui a zaberɛ toroko la poan. 30 Sansɛka ti Yehu ta paɛ Yezreel tiŋa poan la, Yezebel wum mɛ. Bala ti a nyaa dekɛ mu’unsabega kɔkɛ a nini ge maalɛ a zuo nyaa veese takole poan bisa tiŋa. 31 Yehu n ta paara tiŋa la nayaŋa la, ti Yezebel yeti: “Zimri n daa ku a daana la, la keŋɛ soŋa bo en me yoi?” 32 Ti a me gorege bisɛ takole la zuin sa soke yeti: “Ani n boi la mam? Ani?” Bilam bilam ti nayire kpɛ’ɛndoma bayi bii batã suuri bisɛ en na. 33 Ti a yele ba yeti nyɔkɛ ya en basɛ tiŋa na. Bala ti ba nyɔkɛ en lobe basɛ tiŋa ti a ziim la ɛ̃ɣɛ miisi dangoone la, la yiiri la zuto ge ti a nɛ a zuo.