2 Nadoma

7 Ti Elisa nyaa yeti, “Kelese ya Yehowa yelesum wa. Yehowa n yele sɛla n wana: ‘Beere wana ma’a Samaria da’a poan, zombãala seah ayima wan dɛna la shekel, ti mui seah buyi me dɛna shekel ayima.’” 2 Bala poan ti soŋera la ti naba dekɛ amea delum en la yele yelemɛŋɛrɛ Naayinɛ nɛra la yeti: “Yehowa san puɣum yu’ɛ saazuo yasi, yele wa wan ta’an tum?” Bala ti a yele en yeti, “Homea nini wan nyɛ ge ho kan vɛ̃kɛ.” 3 Kunkɔma banaasi n daa ni bɔna tiŋa la yaŋa nɔɔrɛn, nyaa yele taaba yeti: “Beni n sɔi ti to wan zĩ’a kalam yoo ta ki? 4 To san yeti, ‘To kɛ̃ ya tiŋa la poan’ ge ti kom kelum bɔna bim, to wan ki bilam. To me san zĩ’a kalam, to wan kelum ki mɛ nɔɔ. Bala la, basɛ ya ti to isige keŋɛ Siriadoma tiiseŋɔ la zɛ’an. Ba san ka ku tɔ to vɔna ge ba me san ku tɔ, lan bala.” 5 Ba daa nyaa isige mɛ nyu’uŋɔ keŋɛ kɛ̃ Siriadoma tiiseŋɔ la poan. Ban daa ta pɔ̃ra Siriadoma la tiiseŋɔ la poan la, ba daa ka nyɛ nɛnɛra bim. 6 Se’ere n sɔi la, Yehowa basɛ ti Siria nɛreba la wum la zaberɛ toroto la yiiri la soogɛpa dameŋɔ, ti ba yele bamea yeti: “Bisɛ ya! Israel naba dekɛ la Hiti nadoma la Egypt nadoma kena na ti ba zabɛ la tɔ!” 7 Ti ba vaɛ isige kalam zaanɔɔrɛ nyu’uŋɔ zɔ, ge basɛ ba tɛntidoma, yiiri, bũsi ge ka dekɛ sɛsɛla ge zɔ ba vom zuo. 8 Kunkɔma wa n daa ta paɛ tiiseŋɔ la bɔba la, ba kɛ̃ la tiiseŋɔ deyima poan ta di ge nyu. Ba daa dekɛ la salenpɛɛlesi, salema la ba lɔɣɔyɛɛtɔ keŋɛ ta suɣɛ. Ge nyaa lebe kɛ̃ tiiseŋɔ ayima me poan ta vaɛ lɔɣɔrɔ bilam me keŋɛ ta suɣɛ. 9 Ba daa nyaa yele taaba yeti: “Ton iti sɛla wa ka nari. Zina dela pupeelum dabeserɛ! To san ka eŋɛ kalam ge gura ta paɛ beere yilegerɛ, to wan nara ti ba dɔlegɛ to tuba. Basɛ ya ti to keŋɛ naba yire nananawa ta yele en yelese’a woo n eŋɛ la.” 10 Bala ti ba daa keŋɛ tiŋa la yaŋa gu’ureba la zɛ’an ta yele ba yeti: “To daa keŋɛ la Siriadoma tiiseŋɔ la poan ge nɛnɛra ka boi ni bim, to me ka wum voole. Yiiri la bũsi ma’a ti ba lu ba ze’ele ge ti nɛnɛra ka bɔna tɛntidoma la poan.” 11 Bilam nɔɔ ti yaŋa gu’ureba la yi na, ti ba tari keŋɛ naba yire ta yele. 12 Bilam bilam ti naba la isige yu’unkuŋɔ yele a yamesi la yeti: “Soso, basɛ ti n yele ya Siriadoma la n eŋɛ to sɛla. Ba mi ti to kom n duni, bala la ba basɛ ba kɛ̃’a zɛ’an la mɛ ge suɣɛ mɔɔ poan ge yeti, ‘Ba wan ze’ele ba tiŋa la poan yese na ti to nyɔɣɛ ba voto ge kɛ̃ ba tiŋa la poan.’” 13 Ti a yameŋa la ayima yele en yeti: “Soso, basɛ ti buraasi basɛba dekɛ yiiri banuu la n gee bɔna tiŋa la poan la. Bisɛ! Ba ba’asegɔ wan ana wuu Israeldoma la n gee bɔna kalam la. Bisɛ! Ba ba’asegɔ wan ana wuu Israeldoma n ki se’em la. Basɛ ya ti to tum ba ti ba ta bisɛ.” 14 Bala, ba daa dekɛ la toroto toyi la yiiri, ti naba la tum ba Siriadoma tiiseŋɔ la poan, yeti: “Ta kaɛ ya bisɛ ge lebe na.” 15 Ba daa doose ba mɛ keŋɛ ta paɛ Yordan ge ti sore la za’a daa kɔ’ɔn pirɛ me la Siriadoma futo la ba duka lɔɣɔrɔ ti ba lobe basɛ ge zɔ la. Nɛreba la daa lebe me na yele naba la bamam n nyɛ sɛla. 16 Nɛreba la daa nyaa keŋɛ ta fã Siriadoma la mɛ ti zombãala seah ayima nyaa dɛna shekel ayima, ti mui seah buyi me dɛna shekel ayima wuu Yehowa n tɔɣɛ se’em la. 17 Naba daa loe la soŋera la ti a nana a tuuma la, ti a sɔna yaŋa la bisera ge nɛreba la daa nɛ en mɛ ku yaŋa la nɔɔren, wuu yelemɛŋɛrɛ Naayinɛ nɛra la n daa yele Naba la se’em, eŋa n daa wa’an a zɛ’an na la. 18 La daa kɔ’ɔn tum mɛ wuu yelemɛŋɛrɛ Naayinɛ nɛra la n daa yele Naba la se’em ti: “Beere wana ma’a Samaria da’a poan, mui seah buyi wan dɛna la shekel ayima, ti zombãala seah ayima wan dɛna shekel ayima. 19 Ge soŋera la daa puɣum yele yelemɛŋɛrɛ nɛra la yeti: “Yehowa san puɣum yu’ɛ saazuo yasi la, yele wa wan ta’an eŋɛ?” Elisa me yuun yeti: “Ho nini wan nyɛ ge ho kan vɛ̃kɛ.” 20 Bala n daa sirum paɛ en se’ere n sɔi la, nɛreba la daa nɛ a zuo mɛ ku en yaŋa la nɔɔrɛn.