2 Nadoma
11 Nananawa, sansɛka ti Ahazia ma Ataliah ta baŋɛ ti a dayɔa la ki me la, a isige mɛ ku sɛba woo n wan ta’an di na’am la. 2 Ge Yehoseba n de Naba Yehoram poyɔa la n de Ahazia tã la, zũ Ahazia dayɔa Yehoas yese naba dayɔɔsi sɛba ti ba daa ku la poan tara eŋa la a pɔsɔɔ la kɛ̃ saraa poan. Ba daa nyaŋɛ dekɛ en suɣɛ mɛ yese Ataliah zɛ’an, bala n sɔi ti a yuun ka nyaŋɛ ku en la. 3 A daa boi la pɔka wa zɛ’an yuuma ayoobe, suɣɛ bɔna Yehowa yire la poan, se’em ma’a ti Ataliah daa bisera tiŋa la. 4 Yuuma ayopɔi poan ti Yehoiada yi kpɛ’ɛndoma sɛba n biseri Karia gu’ureba sugumnɔɔrɛ kɔbega woo la, la sɛba n biseri naba yire la ti ba wa’an a zɛ’an na Yehowa yire la poan. Ti a biŋe nɔɔrɛ la ba ge basɛ ti ba ze’ele Yehowa yire la poan pɔ, bilam ti a nyaa pa’alɛ ba naba la dayɔa la. 5 A nyaa bo ba nɔɔrɛ yeti: “Ya wan eŋɛ se’em n wana, ya sugumnɔɔrɛ butã poan ayima n wan tuna Vo’osego Daarɛ la ge bisera naba yire la soŋa, 6 ti ayima me gu’ura ɛ̃berɛ la, bala mea ti ayima me wan gu’ura nayaŋa sɛka n boi gu’ureba la pooren, ya wan bisera yire la sɔɔsena saŋa woo. 7 Ya poan buyi la n ka tuni Vo’osegɔ Daarɛ la, nari ti ya bisa Yehowa yire soŋa ta’an gu’ura naba la. 8 Ya nari ti ya kaɛ naba yire la mum ti nɛra woo zãla a zaberɛ lɔkɔ a nu’usin. Mina woo n kɛ ya zɛ’an na, ya nari ti ya ku en. Kɔ’ɔn bɔna ya la naba la zɛsɛka woo ti a yɛ’ɛsa.” 9 Gu’ureba kɔbesi nɛŋadoma la daa kɔ’ɔn tum sɛla ti Yehoiada yele ba la mɛ. Bala ti sɛba woo n tuni Vo’osegɔ Daarɛ la, la sɛba n ka tuni Vo’osegɔ Daarɛ la laɣum wa’an malemadaana Yehoiada zɛ’an na. 10 Malemadaana la bo gu’ureba nɛŋadoma la tãhɔ la zabetɛ’ɛlesi n daa de naba David dene bɔna Yehowa yire la poan. 11 Sɛba n gu’uri naba yire la ze’ele la ba bɔŋa zɛ’an ti ba woo zãla ba zaberɛ lɔkɔ ba nuusin gu’ura Yehowa yire la zuɔ ta paara gɔbega bɔba, ze’ele kaɛ kãabegɔ bimbine la, la yire la ge bisera naba la. 12 Bala ti Yehoiada tari naba dayɔa la yese na dekɛ muŋa vugele en ge nyaa dekɛ Naayinɛ lɔɔ gɔŋɔ la bo en, sɔ̃ en kaam nyaa bobe en naam. Ti ba nyaa pɔsɛ pa’ara nu’usi yɛta yeti: “Vɔna wuusa naba!” 13 Atalia n daa ta wum nɛreba la n zoti ti la vɔɔla la, a daa yese mɛ kalam keŋɛ Yehowa yire la poan zɛ’an ti nɛreba la bɔna la. 14 A nyaa ta nyɛ ti naba la n bala n ze lɛm piilɛ la zɛ’an wuu ba malema n pa’alɛ se’em la. Nɛŋadoma la tentana pɛɛbereba la daa laɣum zɛ’a me la naba la ge ti tiŋa la nɛreba la za’a nyɛɛna ge pɛɛbera tentana. Ataliah n nyɛ wana wa la, a ãasum la a fuo ge kaasɛ yeti: “Ba eŋɛ la nɔɔrɛ! Ba eŋɛ la nɔɔrɛ! 15 Ge malemadaana Yehoiada yi gu’ureba kɔbesi nɛŋadoma la, la sɛba ti ba loe ti ba bisera soogɛpa la ge yele ba yeti: “Tari ya en yese nɛreba la poan ge ti se’em woo n doose en la, dekɛ ya su’a ku en!” Se’ere n sɔi la malemadaana la yele yeti: “Da ku ya en Yehowa yire la poan.” 16 Bala la, ba daa nyɔkɛ en mɛ, ge ban daa tari en ta paɛ zɛsɛka ti yiiri la dɔla kɛ̃’ɛra naba yira la poan la, bilam ti ba daa ku en.