2 Nadoma

16 Yosia n daa ŋmɛregɛ nyɛ yɔɔrɔ la n boi zoore zuo la, a daa basɛ ti ba tu yɔɔrɔ la mɛ nyɔ̃ kɔ̃ba la kaabegɔ bimbine la zuo, ti ba kan nyaŋɛ tara de pu’usa, wuu yelemɛŋɛrɛ Naayinɛ nɛra la n puɣum tɔɣɛ yelese’a biŋe ti de wan eŋɛ la. 17 Ti a yeti: “Yɔɔ sɛka ti mam nyɛta wa dela ani yɔɔ?” Ti tiŋa la nɛreba yele en yeti: “La dela yelemɛŋɛrɛ Naayinɛ nɛra la n ze’ele Yuda la, se’em n tɔɣɛ yelese’a ti ho eŋɛ giisɛ Betel kaabegɔ bimbine wa biŋe la yɔɔ n bala.” 18 Ti a nyaa yeti: “Basɛ ti a vo’ose. Da basɛ ti nɛra daam a kɔ̃ba la.” Bala la, ba daa basɛ eŋa la nɔdɛ’ɛsa la n ze’ele Samaria wa’ana la yɔɔrɔ la mɛ ge ka guruge ba kɔ̃ba. 19 Yosia daa le gbi pu’usegɔ deto la n boi kaabegɔ zɛ’ɛsi la ti Israel nadoma daa mɛ Samaria tiŋa poan ti ba nyie Naayinɛ sunsɔa la basɛ mɛ, a daa eŋɛ ba mɛ wuu eŋa n daa eŋɛ Betel dene se’em la. 20 Bala, malemadoma la n daa boi kaabegɔ zɛ’ɛsi la, a daa ku ba mɛ kaabegɔ bimbina la zuto ge nyɔ̃ nɛresaala kɔ̃ba ba zuo. Bala pooren ti a nyaa lebe Yerusalem tiŋa. 21 Naba la tɔɣɛ bo nɛreba la za’a yeti: “Maasum ya Azɔɔtole De’eŋo bo Yehowa ya Naayinɛ wuu lan gulesɛ bɔna nɔbiŋere gɔŋɔ la poan se’em la.” 22 Kemadoma la n pɔsɛ gãkɛ Israel daarɛ bii Yuda la Israel nadoma saŋa la za’a, ba ka tabelɛ eŋɛ Azɔɔtole De’eŋo wuu dena wa. 23 Ge Naba Yosia na’am bisega a da pia la anii daarɛ la, ba daa eŋɛ Azɔɔtole De’eŋo la Yerusalem bo Yehowa. 24 Yosia me daa sa’am baɣabibisidoma, bakolebuɣeriba, terafim baɣarɛ, baɣa la yelefɛ̃’ɛsa za’a n wa’an Yuda la Yerusalem tisi poan la mɛ, la wan eŋɛ se’em ti yelese’a n boi Lɔɔ gɔŋɔ la poan ti malemadaana Hilkia daa nyɛ Yehowa yire la poan tum tuuma. 25 Nadoma la woo n daa deŋɛ a nɛŋan la, se’em ka boi n daa ani wuu eŋa n ŋmɛregɛ lebe Yehowa zɛ’an la a suure za’a, la a sia za’a la a paŋa za’a, wuu Moses Lɔɔ la n yele se’em la; a pooren nɛra ka boi n ani wuu eŋa.