Filipi

4 Bala n suurɔ sɛba ti n nɔŋɛ ge bɔta ti n nyɛ ya wa, mam tari pupeelum mɛ ge ŋmɛ’ɛra nyuɔ ya zuo, N zɔsonɔ wa, kelum ze ya kankaŋɛ Daana la sore dɔlega la poan. 2 Mam kɔ’ɔn belena la Euodia ge belena Sintike ti ya tari ya puti’irɛ yinɛ Daana la poan. 3 Sira, mam beleni ho mɛ wuu hon de n tuuntuna tadaana n tari yelemɛŋɛrɛ la ti ho kɔ’ɔn soŋera pɔɣesi wa n kɔ’ɔn naɛ la mam tuna kpe’eŋo kpe’eŋo yelesoma la zuo la, la Klement me la n tuuntuneba tadaandoma la za’a yu’ura n boi vom gɔŋɔ la poan la. 5 Basɛ ti nɛra woo baŋɛ ti ya tari bɔkerɛ. To Daana la lɛm mɛ. 6 Da fabeli ya sɛsɛla yele ge sɛla woo poan doose ya zusega la beleŋo la pɛ̃ka poan ta’an basɛ ti Naayinɛ baŋɛ ya boti sɛla; 7 ti Naayinɛ suma’asum la n gani asaala woo bɔkera la wan gu ya suya la ya puti’irɛ doose Krista Yezu poan. 8 Ba’asegɔ poan, mabiisi, yelese’a woo n de yelemɛŋɛrɛ, yelese’a woo n de ninmɔ’ɔrɛ yɛla, yelese’a woo n de tontɔɔ, yelese’a woo n ani kasi, yelese’a woo n de nɔŋerɛ yɛla, yelese’a woo ti ba tɔɣera de yele soŋa, yelese’a woo n de sarumsoŋɔ la yelese’a woo ti ba pɛɣera, kɔ’ɔn ti’isa ya yele ana wa. 9 Tari ya sɛla ti ya zamesɛ ge nyɛ mam zɛ’an wa ti la dɛna la n yetɔɣum bii n tuuma poan, tuna. Bala la, suma’asum Naayinɛ la wan bɔna la ya. 12 Mam mi la ani se’em ti n lɔɣɔrɔ pɔɛ ge kelum mina la ani se’em ti n tara lɔɣɔrɔ zo’e zo’e. Sɛla woo poan, la bɔŋa woo poan, mam zamesɛ baŋɛ putiɣerɛ la kom n de sɛla mɛ. Mam mi la ani se’em ti n tara lɔɣɔrɔ zo’e zo’e ge kelum mina mam ni ka tara ti la ani se’em mɛ. 13 Sɛla woo poan mam tari paŋa mɛ doose la se’emdaana n bo’ori mam paŋa la zuo.