Pin’ileŋɔ

30 Arakel n daa ta baŋɛ ti a kelum ka nyaŋɛ dɔɣɛ kɔma bo Yakob la, a pɔsɛ nyuuna mɛ la a yibega la ge nyaa yele Yakob yeti: “Basɛ ti n dɔɣɛ kɔma, san daɣɛ la bala mam wan ki.” 2 Ti Yakob sunsɔa daa nyie la Arakel ti a soke en yeti: “Mam dela Naayinɛ, se’em n gu ti ho ka dɔɣera kɔma wa yoi?” 3 Ti Arakel yeti: “Mam pɔsɔɔ Bilha n wana, naɛ la en gã’arɛ ti a dɔɣɛ kɔma bo mam. Doose eŋa poan ti mam me ta’an tara kɔma.” 4 Bala la, a yuun dekɛ a pɔsɔɔ Bilha bo Yakob mɛ ti a dɛna a pɔɣa, ti Yakob naɛ la en gã’arɛ. 5 Ti Bilha nyɔkɛ puurɛ ge dɔɣɛ budibila bo Yakob. 6 Ti Arakel yeti: “Naayinɛ eŋɛ pa’alɛ ti eŋa n de mam gãkeredaana ge kelese mam kɔ̃a. Bala n sɔi ti a basɛ ti mam nyɛ dayɔa.” Bala zuo n sɔi ti a siɣɛ a yu’urɛ yeti Dan. 7 Arakel pɔsɔɔ Bilha le nyɔkɛ puurɛ le dɔɣɛ budibela n pa’asɛ buyi bo Yakob. 8 Ti Arakel yeti: “Mam la n keema mɛ̃ me paa ti mam zabɛ nyaŋɛ!” Bala ti a siɣɛ a yu’urɛ yeti Naftali. 9 Se’em ma’a ti Lea nyɛ ti a dɔɣum ŋmaɛ me la, a daa dekɛ la a pɔsɔɔ Zilpa bo Yakob ti a dɛna a pɔɣa. 10 Ti Lea pɔsɔɔ Zilpa dɔɣɛ budibila bo Yakob. 11 Ti Lea yeti: “Mam zuo lu me la Naayinɛ!” Bala ti a siɣɛ a yu’urɛ yeti Gad. 12 Bala pooren ti Lea pɔsɔɔ Zilpa le dɔɣɛ dayɔa n pa’asɛ buyi bo Yakob. 13 Ti Lea yeti: “Mam puurɛ pee mɛ! Pɔɣesi wan yi mam yu’urɛ yeti pupeelumdaana.” Bala ti a siɣɛ a yu’urɛ yeti Aser. 14 Wiiti wiiti dia kɛ’a saŋa la poan, ti Aruben daa kena ta nyɛ Mandrake bɔ̃’ɔ poan. Ti a tari ba na bo a ma Lea. Ti Arakel yele Lea yeti: “Soso eŋɛ ho dayɔa Mamdrake la bo mam na.” 15 Ti a yele en yeti: “Ho ti’isɛ ti hon fãɛ mam sira la, la dela yelepika? Ho nyaa boti la ho le to’e mam dayɔa mamdrake me?” Bala ti Arakel yeti: “San dɛna bala, a wan naɛ la ho gã’arɛ nyuuŋɔ wa ho dayɔa mamdrake la zuo.” 16 Se’em ma’a ti Yakob daa ze’ele bɔ̃’ɔ la poan kena na la, Lea daa keŋɛ mɛ ta tu’usɛ en ge yeti: “Ho wan naɛ la mam gã’arɛ zina, se’ere n sɔi la mam dekɛ la n dayɔa mandrake la da ho.” Bala la, a daa naɛ la en gã’arɛ mɛ yu’uŋo kaŋa. 17 Ti Naayinɛ kelese Lea, ti a nyɔkɛ puurɛ ge dɔɣɛ budibila n pa’asɛ bunuu bo Yakob. 18 Ti Lea nyaa yeti: “Naayinɛ yɔ mam mɛ se’ere n sɔi la, mam dekɛ la n pɔsɔɔ bo n sira.” Bala n sɔi ti a daa siɣɛ a yu’urɛ yeti, Isakar. 19 Ti Lea le nyɔkɛ puurɛ nyaa dɔɣɛ budibila pa’asɛ buyoobe bo Yakob. 20 Ti Lea nyaa yeti: “Yelemɛŋɛrɛ, Naayinɛ sirum bo mam la bo’olum n ani soŋa, mam sira wan ba’asɛ bɔta n yele se’ere n sɔi la mam dɔɣɛ la budibito bayoobe bo en.” Bala ti a daa siɣɛ a yu’urɛ yeti, Zebulun. 21 Bala pooren la, a daa dɔɣɛ la pugela ge siɣɛ a yu’urɛ yeti Dina. 22 Pooren, Naayinɛ daa tiɛ Arakel yele mɛ. Naayinɛ daa kelese en mɛ ge soŋɛ en ti a nyɔkɛ puurɛ. 23 A daa nyɔkɛ la puurɛ ge dɔɣɛ budibila. A daa yeti: “Naayinɛ yese ɛregerɛ la n boi n zuo la basɛ mɛ!” 24 Bala n sɔi ti a daa siɣɛ a yu’urɛ yeti, Yosef ge yeti: “Yehowa le bo mam la budibila pa’asɛ.” 25 Se’em ma’a ti Arakel dɔɣɛ Yosef ba’asɛ la, bilam bilam ti Yakob daa yele Laban yeti: “Basɛ mam sore ti n lebe kule n tiŋa. 26 Dekɛ n pɔɣeba la n kɔma ti mam tum bo ho ge nyaa nyɛ ba la bo mam. La wan eŋɛ se’em ti n ta’an keŋɛ, se’ere n sɔi la ho mi mam tum se’em bo ho mɛ.” 27 Ti Laban yele en yeti: “Ho puurɛ san pee la mam, naɛ la mam kɛ̃’ɛra se’ere n sɔi la mam nyɛ la yɛla n niɛ peelum pa’ala ti hon zuo ti Naayinɛ kã’ara bɔ’ɔra mam.” 28 A daa le tɔɣɛ pa’alɛ ti: “Pa’alɛ mam hon bo ti n yɔ’ɔra ho se’em ge n wan yɔ hɔ.” 29 Bala ti Yakob yele en yeti: “Ho mi mam tum se’em bo ho mɛ, la ho dusi la ti mam bisɛ ba se’em mɛ; 30 se’em ma’a ti mam daa wa’ana la, ho daa ka tari lɔɣɔrɔ zo’e zo’e ge ho dusi la nyaa zo’e mɛ ge wi’ɛ. Pɔsɛ se’em ma’a ti mam wa’an kalam na, Yehowa kɔ’ɔn kã’ara bɔ’ɔra ho mɛ. Bala la, wani ma’a ti mam wan nyɛ sɛla bo n mea yire?” 31 Ti a soke en yeti: “Ho boti n bo ho la bem?” Ti Yakob yeti: “Da bo mam sɛsɛla! Ho san wan tum yele dena wa bo mam, mam wan bisera ho dusi la. 32 Mam wan doose bisɛ ho duusi la za’a zina wa. Gasɛ peo woo n tɛ̃’ɛsɛ ge ani pɔ̃ra pɔ̃ra la pedaabibisi n de sabesi bɔna piisi la poan, la bunya’asi sɛba n ani pɔ̃ra pɔ̃ra ge tɛ̃’ɛsɛ la. Nana kɔ’ɔn yɛ’ɛsa bamam n wan dɛna mam yɔɔrɛ. 33 Beere sa’am ho san ta wa’ana ti ho bisɛ mam yɔɔrɛ n de sɛla, mam yeremɛŋɛrɛ la n wan bo mam buurɔ; ho san nyɛ bunya’asi n ka tɛ̃’ɛsɛ ge me ka ani pɔ̃ra pɔ̃ra la pedaabibisi n daɣɛ bunsabesi ti ba bɔna mam zɛ’an, la pa’alɛ ti n zũ ba mɛ.” 34 Bala ti Laban yeti: “Bala ani soŋa paa! To eŋɛ wuu hon yele se’em la.” 35 Daandendaarɛ la, a daa gasɛ la butilesi n tɛ̃’ɛsɛ ge ana pɔ̃ra pɔ̃ra la bunyaasi la woo n tɛ̃’ɛsɛ ge ana pɔ̃ra pɔ̃ra la. A daa gasɛ dunsɛka woo ti pɛɛlega bɔna a poan mɛ la pedaabibisi la za’a n ani sabesi la ge daa dekɛ ba bo la a dayɔɔsi ti ba bisera ba. 36 Bala pooren la, a daa basɛ ti eŋa la Yakob zaɛ la taaba paɛ wuu dabesa atã sorekene n wɔɣɛ se’em la. Ti Yakob daa bisera Laban dusi seto n gee la. 37 Ti Yakob daa nyaa kɛ storax tia, almond tia la plane tiisi dɔɔma’asa ge piisɛ dɔɔrɔ la, la wan eŋɛ se’em ti dɔɔrɔ la zɛse’ese n pelege la ta’an nyɛta. 38 Ti a daa dekɛ dɔɔrɔ la ti a piisɛ la biŋe dusi la nɛŋa, a daa dekɛ ba biŋe la dusi la n kene zɛ’an nyuura ko’om la, la wan eŋɛ se’em ti ba san wa’an ti ba nyu ko’om, ba wan duura taaba dɔɔrɔ la nɛŋa. 39 Bala la, dusi la yuun duura la taaba dɔɔrɔ la nɛŋa ge nyaa ni dɔɣɛ dunsɛba n tɛ̃’ɛsɛ ge ani pɔ̃ra pɔ̃ra. 40 Ti Yakob yelege pedaabibisi la ge basɛ ti dusi la ŋmɛregɛ tɔ dunse’ese woo n tɛ̃’ɛsɛ ge ani pɔ̃ra pɔ̃ra n laɣum bɔna Laban dusi la poan la. A daa nyaa yelege la amea dusi la ge ka basɛ ti ba laɣum la Laban dusi la. 41 Se’em ma’a ti dunse’ese n tari paŋa la ni pɔsɛ zukera la, Yakob ni dekɛ la dɔɔrɔ la biŋe dusi la ko’om nyua zɛ’an la ti ba nyɛta, la wan eŋɛ se’em ti ba ta’an zuke dɔɔrɔ la nɛŋa. 42 Ge se’em ma’a ti dusi la dɛna duwɔnɔ la, ani ka dekɛ dɔɔrɔ la biŋe bim. Bala basɛ ti duwɔnɔ la woo dɛna la Laban dene ge ti dunse’ese woo n tari paŋa la dɛna Yakob dene. 43 Ti buraa wa nyɛ lɔɣɔrɔ paa, a daa nyɛ la dusi zo’e zo’e la yamesi n de buraasi la pɔɣesi za’a la yugema la bunsi.