Isaiah

11 Yile pika wan puse Yesse dɔgi’a poan na, Ti sɛla n puse a nyɛɣa poan la wan wɔm wɔla. 2 Ti Yehowa vo’osum la wan bɔna a zuo, Yɛm la bɔkerɛ vo’osum, Ka’aŋɔ la paŋa vo’osum, Mi’ilum la Yehowa zoolum vo’osum. 3 A puurɛ wan pee la eŋa n zoti Yehowa la. A kan bisɛ la a nini n nyɛti sɛla la ta’an gãkɛ, Bii a bo ka’aŋɔ la a tuba n yeen wum sɛla ma’a zuo. 4 A wan gãkɛ tarumdoma la tontɔɔ sore poan Ge bo ka’aŋɔ n de tontɔɔ bɔ’ɔra sirege n meadoma tingɔŋɔ wa zuo. A wan dekɛ a nɔɔrɛ yetɔɣum ŋmɛ tingɔŋɔ wa Ge dekɛ a nɔɔrɛ vo’osum ku putɔpa la. 5 Tontɔɔ tuuma n wan dɛna a siganɛ bɔna a sia, Ti sakerɛ tuuma dɛna siganɛ bɔna a weo zuo. 6 Sãseŋa wan bɔna la pebila wana maɣa, Ti goobaa wan naɛ la bubila gã’a, Ti naɣebila la gbeɣenɛ la dunpole wan laɣum bɔna; Ti bipika tara ba kena. 7 Naahɔ la saseŋa wan naɛ taaba dita, Ti ba kɔma laɣum gã’a. Gbeɣenɛ wan ɔbera yaama wuu lɔlega la. 8 Bia n mɔɣeri wan dɛ’ɛna zankaŋa yoken, Ti bia n go’e bi’isum wan dekɛ a nu’o kɛ̃’ɛsɛ bunsɛla bɛ’a yoken. 9 Ba kan tum be’em Bii sa’am mam zilam zoore la, Se’ere n sɔi la tingɔŋɔ wa wan pirɛ la Yehowa mi’ilum Wuu ko’om n pirɛ ateko poan se’em la. 10 Dadendaarɛ la Yesse nyɛɣerɛ la wan isige ze’ele dɛna dãalesum bɔ’ɔra nɛreba la. Tisi la wan keŋɛ la eŋa zɛ’an ti ba nyɛ pa’alegɔ, Ti a vo’osego zɛ’an wan tara na’asegɔ.