Pin’ileŋɔ

39 Nananawa, ba daa tari Yosef keŋɛ la Egypt tiŋa, ti Potifar se’em n de Faaro Nayire kpɛ’ɛma la ayima ge me dɛna guriba la nɛŋadaana la daa da en Ishmealdoma la zɛ’an. Bamam n tari en wa’an bilam na. 2 Ge Yehowa yuun boi la Yosef mɛ. Bala zuo la, a daa nyɛ la nɛŋa tɔlega ge nyaa sɔna a kpɛ’ɛma la n de Egypt nɛra la yire bisera. 3 Ti a kpɛ’ɛma la nyɛ ti Yehowa boi la en mɛ ge baŋɛ ti Yehowa basɛ ti sɛla woo ti a ita, ita la soŋa. 4 A daa nɔŋɛ Yosef yele mɛ ge nyaa daa basɛ ti a dɛna amea tuuntuna. Bala ti a loe en ti a bisera a yire la ge daa basɛ ti a sɔna sɛla woo ti a tara la bisa. 5 Kɔ’ɔn ze’ele sansɛka ti a loe en ti a bisera a yire la ge sɔna sɛla woo ti a tara la bisa la, Yosef zuo, Yehowa yuun kɔ’ɔn kã’ara bɔ’ɔra Egypt nɛra la yire la me, ti Yehowa kã basɛ sɛla woo n boi yire la poan la samanɛ la zuo. 6 Pooren, a dekɛ sɛla woo ti a tara eŋɛ la Yosef nu’usin ge puɣum ka le ti’isa sɛsɛla yele san daɣena dia la ti a dita la ma’a. Leyɛ’ɛsa, Yosef daa bĩ mɛ ge som. 7 Yele ana wa pooren la, a kpɛ’ɛma la pɔɣa nini daa kɔ’ɔn bɔna la Yosef poan ge nyaa yele en yeti: “Gã’arɛ la mam.” 8 Ge a daa zaɣesɛ mɛ ge yele a kpɛ’ɛma la pɔɣa yeti: “Mam kpɛ’ɛma ka mi mam n iti sɛla yire wa poan, a dekɛ sɛla woo ti a tara eŋɛ la mam nu’usin. 9 Se’em ka boi yire wa poan tara paŋa gana mam, a me ka gu sɛsɛla mam zɛ’an san daɣena hon ma’a se’ere n sɔi la, ho dela a pɔɣa. Mam wan eŋɛ la wani tum be’em kãtɛ wa gãlum Naayinɛ?” 10 Bala la dabeserɛ woo a ni tɔɣɛ bo Yosef mɛ ge a ka malum sakɛ ti a gã’arɛ la en bii a naɛ la a ma’a bɔna. 11 Ge daarɛ deyima ti a daa kɛ̃ yire la poan ti a ta tum a tuuma, yire la poan yamesi la woo daa ka boi yire la poan. 12 Ti a daa gĩ a fuo tara ge yeti: “Gã’arɛ la mam!” Ge a daa zɔ yese mɛ ge basɛ fuo la a nu’usin.