Luke

15 Nananawa lampo tɔ’ɔseriba za’a la be’emdoma daa kɔ’ɔn kena la a zɛ’an ti ba kelese en. 2 Ti Fariseedoma la gɔnguleseriba la daa guɣelena yeti: “Buraa wa sɔseri mɛ la be’emdoma ge naɛ la ba dita.” 3 Ti a nyaa bo ba makerɛ yeti: 4 “Nɛrekani n boi ya poan n tari piisi kɔbega ge ti ayima bɔregɛ, ti a kan basɛ piwɛi la bawɛi la n gee la goo la poan ge keŋɛ ta ɛ se’em n bɔregɛ la ta paɛ se’em ma’a ti a wan nyɛ ka? 5 A me san nyɛ ka, a wan dekɛ ka buke a bɔɣerɔ zuo ge nyɛɛna. 6 A san paɛ yire, a wan yi a zɔdoma la a kpɛ’ɛsi la za’a laɣesɛ taaba ge yele ba yeti, ‘Naɛ ya la mam ti to nyɛɛna, se’ere n sɔi la mam nyɛ n pesego la n bɔregɛ la mɛ.’ 7 Mam yeti ya mɛ ti bala mea nɔɔ poan, pupeelum zo’e zo’e wan bɔna saazuo be’emdaana ayina san tee gana tontɔɔdoma piwɛi la bawɛi n ka nari teere.