2 Nadoma

5 Naaman yuun dela Siria Naba soogɛpa nɛŋadaana. A me yuun dela nɛrezure ti a daana pɛɣera en se’ere n sɔi la Yehowa doose la a poan basɛ ti Siriadoma nyɛta nyaŋerɛ. A yuun dela nɛra n mi zaberɛ ge a yuun dela konkone. 2 Ba zaberɛ deyima poan, Siriadoma yuun nyɔkɛ la bipuɣela ayima Israel tiŋa poan, ti a wa’ana dɛna Naaman pɔɣa pɔsɔɔ. 3 Bipuɣela wa yele a daana pɔɣa wa yeti: “Mam daana wa san sakɛ keŋɛ nɔdɛ’ɛsa la n boi Samaria tiŋa la zɛ’an, a wan tibɛ ni a kunkone wa. 4 Bala la, a yuun keŋɛ ta yele a daana la mɛ Israel puɣela la n yele en sɛla woo la. 5 Ti Siria Naba yele en yeti: “Keŋɛ nananawa! Ge n wan dekɛ gɔŋɔ tum ti ba tari ta bo Israel Naba.” Ti a yuun dekɛ salepɛɛlesi la ligebɔɔre pia, salemkpila tusa ayoobe la futo pia n boi to’ore to’ore keŋɛ. 6 Ti a dekɛ gɔŋɔ la ta bo Israel naba ti la kaalɛ yeti: “Ho san to’e gɔŋɔ wa, mam yameŋa Naaman ti mam tum en ho zɛ’an na la n wan eŋe se’em ti ho tibɛ a konkone la.” 7 Israel Naba n yuun kaalɛ gɔŋɔ la ba’asɛ la, a ãasum a fuo la mɛ buyi ge yeti: “Mam dela Naayinɛ n wan ta’an ku ge bo vom? Ti a tuna buraa wa mam zɛ’an na ti n tibɛ a kunkone! Yamea la nyɛ ti a eeri la mam zaberɛ.” 8 Ge se’em ma’a ti Elisa n de yelemɛŋɛrɛ Naayinɛ nɛra la wum ti Israel naba ãasum a fuo me la, a eŋɛ la kalam tum nɛra naba la zɛ’an ta yele en yeti: “Bem n sɔi ti ho ãasum ho fuo? Soso basɛ ti a wa’an mam zɛ’an na, la wan eŋɛ se’em ti a baŋɛ ti nɔdɛ’ɛsa boi Israel.” 9 Bala la, Naaman yuun keŋɛ mɛ la a zaberɛ toroto ta ze’ele Elisa yire zaɣenɔɔrɛ. 10 Ge Elisa tum la a tuuntuna ti a ta yele en yeti: “Keŋɛ Yordan kolaa la poan ta sɔ sugumnɔɔrɛ buyopɔi ge ho bã’a la wan basɛ ti ho ana filam. 11 Eŋa n yele wana la, Naaman sunsɔa nyie mɛ ti a ŋmɛregɛ lɛbera ge yeti: “Mam ti’isɛ ni ti, ‘A wan yese na ze’ele n nɛŋan ge yi Yehowa a Naayinɛ la yu’urɛ dekɛ a nu’o babelɛ n kunkone wa zuo ti la basɛ.’ 12 Damaskos kolaasi Abana la Parpar ka nyani Israel tiŋa wa ko’om woo? Mam san keŋɛ bilam ta sɔ mam inya kan yese me yoi?” Ti a ŋmɛregɛ lɛbera la sunsɔa. 13 Ti a yamesi la nyaa vurege paɛ en ge yele en yele en yeti: “N sɔ, nɔdɛ’ɛsa wa san yele ni ho yeti, ho eŋɛ sɛla n kpe’em gana wana, ho kan eŋɛ ni? Ge bisɛ eŋa n yeen yele ho yeti, ‘Keŋɛ ta sɔ inya ma’a ge nyɛ tibegɔ la ti ho kan ta’an eŋɛ’?” 14 Naaman sige Yordan kolaa la poan muse ko’om la poan sugumnɔɔrɛ buyopɔi wuu yelemɛŋɛrɛ Naayinɛ nɛra la n pa’alɛ en se’em la. Ti a inya la saalum ana wuu bunbila inya la, ti a nyaa ana filam. 15 Deni pooren ti a lebe keŋɛ yelemɛŋɛrɛ Naayinɛ nɛra la ze’an. Eŋa la a nɛreba la za’a ta ze’ele a nɛŋa yeti: “Mam nyaa baŋɛ ti Naayinɛ ka boi tingɔŋɔ wa zuo ze’an ze’an san daɣena Israel tiŋa wa poan. Bala soso to’e ho yameŋa bo’olum wa.” 16 Ge Elisa yele en yeti: “Yehowa se’em ti mam pu’usa wa n kelum vɔna wa, mam kan sakɛ to’e de.” Ti a pɛregera en ti a to’e ge ti a me kɔ’ɔn zaɣesa.