1 Nadoma

3 Bala poan ti a paleŋa ɛ̃kɛ ti a isige zɔ ti a faaɛ a vom. A daa zɔ paɛ la Beerseba n boi Yuda tiŋa poan ge basɛ ti a tuuntuna la yee bilam. 4 A daa keŋɛ la dabeserɛ muunɛ kɛ̃ pɔɣetia la poan ta zi’ire tia tilin ge belum yeti, eŋa boti a ki mɛ. A daa yeti: “La seke ya! O Yehowa, nananawa ku mam ge mam ka nyanɛ n sɔyaabedoma.” 5 Ti a nyaa gã’arɛ gɔ̃sabega tiŋa zɛɛ gɔɔm. Ti maleka kalum en ge yele en yeti: “Isige di.” 6 Eŋa n bisɛ la, boroboro kilega n paɣɛ bugum kugere zuo la ko’om la linka n ze a zuin bɔba. A nyaa di mɛ ge nyu ge lebe gã’arɛ. 7 Pooren ti Yehowa maleka la lebe buyi poan na kalum en ge yeti: “Isige di ge ho tari la sarɔwoko.” 10 Ti a yeti: “Mam mɔ’ɛ la nini zabɛ bo Yehowa, Pɛɛntɛɛnreba Naayinɛ la, se’ere n sɔe la, Israeldoma wa zaɣesɛ ho nɔbiŋere la mɛ, wɔ̃rɛ ho kãabegɔ zɛ’ɛsi la ge kɔrum ho nɔdɛ’ɛseba la za’a. Mam ma’an n gee, ti ba ziɣera ti ba ko mam me.” 11 Ge a daa yeti: “Yese ta ze’ele zoore la zuo Yehowa nɛŋan.” Ge bisɛ! Yehowa daa ye tɔla mɛ ti kusebekãtɛ n tari paŋa daa basɛ ti zɔya la kuga yirena ge ti tasi la ŋɔta Yehowa nɛŋan ge Yehowa daa ka boi kusebego la poan. Kusebego la n daa lobe ba’asɛ la, tinmi’iŋo n daa miim ge Yehowa daa ka boi tinmi’iŋo la poan. 12 Tinmi’iŋo la n daa ba’asɛ la, bugum n daa wa’ana ge Yehowa daa ka boi bugum la poan. Bugum la pooren la, kũa n daa nyaa tɔɣera wana bãla bãla. 15 Yehowa daa yele en yeti: “Lebe la ho keŋɛ Damaskus pɔɣetia la poan. Ho san paɛ bim, eŋɛ kaam sɔ̃ Hazael ti a dɛna Siria naba. 16 Ho me nari ti ho eŋɛ kaam sɔ̃ Nimsi dayɔa Yehu ti a dɛna Israel naba. La me nari ti ho eŋɛ kaam sɔ̃ Safan dɔyɔa Elisa n ze’ele Abel Mehola la ti a dɛna nɔdɛ’ɛsa ge soe ho naarɛ. 17 Nɛra san puɣum piɛ Hazael sua la, Yehu wan ko en; ti se’em me n piɛ Yehu sua la Elisa wan ko en. 18 Mam kelum tari la nɛreba tusa ayopɔi (7000) n boi Israel poan n ka ku’use tiŋa bo Baal ge me ka dekɛ ba nɔya mɔɣɛ en.” 19 Bala, a ze’ele bilam keŋɛ ta nyɛ la Safan dayɔa Elisa n naɛ la nɛreba n yɔɣɛ lɔlesi bayi bayi sugumnɔɔrɛ pia la bayi kɔɔra. Elisa n daa tari lɔlesɛba n pa’asɛ pia la bayi la yee pooren kɔɔra. Ti Eliya paɛ a zɛ’an ge dekɛ a fuo lobege en. 20 Bilam poan ti a basɛ lɔlesi la ge zɔ tabegɛ Eliya ta yele en yeti: “Soso basɛ ti n keŋɛ ta mɔɣɛ n sɔ la ma nɔɔrɛ yia ge nyaa wa’ana dɔla hɔ.” Ti a yele en yeti: “Keŋɛ ge nyaa lebena; mam gu ho me ti ho da keŋɛ bii?” 21 Ti a nyaa lebe ta dekɛ a lɔlesi bayi la eŋɛ kaabegɔ. A daa wɛɣɛ niikũure la n de dɔɔrɔ la mɛ dekɛ dɔɣɛ nɛnɔ la ge eŋɛ tɔ̃rɛ nɛreba la ti ba obe. Bala pooren ti a sige dɔla Eliya ge dɔla tuna bɔ’ɔra en.