Liligere

12 Ti yelenyalema n ka tari makerɛ niɛ saazuo sa: Pɔka n bo ha yɛ yintule wuu fuo la, ti ŋmarega bɔna a natala pulum. A me vuge la muŋa n tari ŋmarebibisi pia la bayi. 2 A nyɔkɛ la puurɛ. Eŋa n virigiri ti a dɔɣɛ la, a induuma la basɛ mɛ ti a kaasa kpe’eŋo kpe’eŋo. 3 Ti yelenyalema deyina le niɛ saazuo sa. Bisɛ! Seerego kãtɛ n de mɔlega n wana, tara zuto tuyopɔi la iila pia ge ti a vuge muŋa bayopɔi; 5 Pɔka la dɔɣɛ la budibila, buraa, se’em n yeti a dekɛ kurugo doore sɔna tisi la za’a waabi bisera la. Ba fã a bia la mɛ tari en keŋɛ Naayinɛ la a na’am kuka la n boi zɛ’an la. 6 Ti pɔka la me yuun zɔ keŋɛ pɔɣetia poan, zɛsɛka ti Naayinɛ maalɛ bo en ge ti ba wan diisi en dabesa tusere la kɔbeseyi la piyoobe (1,260). 7 Ti zaberɛ kɔ saazuo sa: Mikael la a malesi la zabɛ mɛ la seerego la, ti seerego la la a malesi la me zabɛ 8 ge ba ka nyaŋɛ, ba me ka le tara zɛ’an saazuo sa. 9 Ba sa’ɛ seerego kãtɛ la basɛ me na, bunsɛlekɛka la, mina ti ba yi’ira ti Saɣena la Sitaana, se’em n pã’aseri tingɔŋɔ wa za’a; ba daa sa’ɛ en basɛ la tingɔŋɔ wa zuo na ge daa sa’ɛ a malesi la pa’asɛ a poan basɛ na. 10 Ti mam wum ti kɔ̃a ze’ele saazuo yeti: “Nananawa, nyɔvore faarɛ daarɛ, la kpe’eŋo, la Naayinɛ Naam la, la a Krista paŋa la paɛ ya, se’ere n sɔi la, se’em n sa’ani to suurɔ wa yu’ura la, ba zaɛ en mɛ basɛ tiŋa. Eŋa n sa’ani to suurɔ wa yu’ura wuntɛɛŋa la nyuuŋɔ za’a to Naayinɛ la nɛŋan! 12 Wana wa zuo la, tari ya pupeelum saazuo wa, la yamam sɛba n kɛ̃’ɛri ka poan la! Wuŋerɛ paɛ tingɔŋɔ la, la ateko la, se’ere n sɔi la Saɣena la sige paɛ ya me na ti a sunsɔa nyie paa, se’ere n sɔi la a mi ti a saŋa la pɔ’ɛ mɛ.” 14 Ge ba yuun dekɛ tuhukãtɛ kelumpaɣesi siyi la bo la pɔka la, la wan eŋɛ se’em ti a nyaŋɛ ɛ̃kɛ kɛ̃ a zɛ’an pɔɣetia la poan, zɛsɛka ti ba wan diisi en saŋa, saŋa sugumnɔɔrɛ buyi la saŋa girego fɔ̃regɛ bunsɛla la zɛ’an. 17 Seerego la sunsɔa n daa nyie la pɔka la, ti a keŋɛ ta zabɛ la pɔka la yaasi sɛba n gee la. Bamam n doli Naayinɛ nɔya la ge dita sɛɛra bɔ’ɔra Yezu.