Nehemia

2 Nisan ŋmarega poan, Naba Artasaset yuun pisiyi bisega poan, daam n daa ze a nɛŋan, ti mam daa dekɛ daam la bo naba la wuu mam ni puɣum ita se’em la. Ge mam nɛŋa ka tabelɛ sa’am bala naba la nɛŋan. 4 Ti naba la nyaa soke mam yeti: “Ho boti la bem?” Bilam bilam ti mam zusɛ saazuo Naayinɛ la. 5 Ti mam nyaa yele naba la yeti: “La san wan pee naba la puurɛ ge ti ho nini me tɛɣɛ la ho yameŋa wa, tum mam ti n keŋɛ Yuda, tinsɛka ti ba laɛ n sɔyaabedoma la, la wan eŋɛ se’em ti n ta’an malum mɛ ka.” 6 Ti naba la daa zi’a la a pɔɣenaba la ge daa yele mam yeti: “Ho wan keŋɛ ho sore wa ta yue paɛ la wani ge wani ma’a ti ho wan lebena?” Naba la puurɛ daa pee mɛ, ti mam me daa pa’alɛ n saŋa la. 7 Ti mam nyaa yele naba la yeti: “La san wan pee naba la puurɛ, basɛ ti ba dekɛ gɔnɔ bo Kolega Yakenɛ bɔba sa la gɔmenadoma, ti la ta’an bo mam yɔ’ɔ ti n keŋɛ fai ta paɛ Yuda, 8 Ge me kelum dekɛ gɔŋɔ bo Asaf se’em n biseri Nayire Tiisi la, la wan eŋɛ se’em ti a ta’an bo mam dɔɔrɔ ti n dekɛ maalɛ Pu’usegɔ Deo La Dekara la yasi la tiŋa la lalesi la yise’ere ti n wan keŋɛ la.” Ti naba la dekɛ ba bo mam, se’ere n sɔi la mam Naayinɛ la nu’o n daa bo mam zuo.