Ezra

1 Persia Naba Saarus na’am dia yuunɛ poan la, la wan eŋɛ se’em ti Yehowa yelesum la ti Yeremia tɔɣɛ ti la wan sirum tum tuuma la, Yehowa daa kalum la Persia Naba Saarus suure ti a bo ba nɔɔrɛ a sɔ’ɔlum la poan za’a ge me le basɛ ti ba gulesɛ dɛ yeti: 2 “Persia Naba Saarus n yele se’em n wana, ‘Yehowa n de saazuo Naayinɛ la dekɛ la tingɔŋɔ wa sɔ’ɔlum la za’a bo mam ge bo mam nɔɔrɛ ti n mɛ yiri bo en Yerusalem tiŋa n boi Yuda poan. 3 Se’em woo n pa’asɛ a nɛreba la za’a poan, Naayinɛ wan bɔna la en ge basɛ ti a keŋɛ Yerusalem n boi Yuda poan ta malum mɛ Yehowa n de Israel Naayinɛ yire la. Eŋa n de yelemɛŋɛrɛ Naayinɛ la ti a yire daa bɔna Yerusalem la. 4 Se’em woo n de satina yeen bɔna zɛsɛka de’ene, la nari ti a kpɛ’ɛsi la bo en salenpɛɛlega la salema la lɔɣɔrɔ la dusi, ba me nari ti ba bo en sunma’asum bo’olum ti a tari ta mɛ yelemɛŋɛrɛ Naayinɛ yire la n boi Yerusalem la.’”