Magaha

7 Ti mam n daa bisɛ yɛm pɔ’ɔredoma la, Mam daa nyɛ la burasa’arɛ ayima bunbilipaalesi la poan ti a yɛm pɔ’ɛ. 8 A daa keŋɛ la sore sɛka zuo n doli a sɛ̃ka la poan, Ti a daa kɔ’ɔn tɔ la a yire sore kena 9 Se’em ma’a ti yinɛ luta, zaanɔɔrɛ saŋa la, N de se’em ma’a ti yu’uŋɔ la lika pɔ̃ra la. 10 Ti mam nyɛ ti pɔka tu’usɛ en, Yɛ lɔɣɔrɔ wuu pɔɣeyaaleŋa la, tara nigum nigumtuuma a suuren. 11 A kɔ̃a boi la saazuo ge me ka nana bɔ’ɔra. A ka makɛ zi’ita yire. 12 Fii ti a boi yiŋa, fii ti a boi nɛreba zɛ’an, A kɔ’ɔn ɛɛra la sɛ̃ɣesi woo n boi zɛ’an. 13 A gurɛ en mɛ tara ge mɔɣɛ a nɔɔrɛ; A dekɛ la sukpe’ene yele en yeti: 14 “Mam eŋɛ ni la suma’asum kaabegɔ. Zina ti mam lebese n nɔya la ti n biŋe la. 15 Bala n sɔi ti mam wa’ana ti n seke ho la, Ge ɛ ho zɛ’an, n me nyɛ hɔ! 16 Mam yɛregɛ la fusoŋa n gɔregɔ zuo, Egypt tiŋa fusoŋɔ. 17 Mam dekɛ la mirɛd, aloedoma, la sinamon nyuuŋo soŋɔ miise n gɔregɔ zuo. 18 Wa’ana, ti to pa’alɛ to nɔŋɛ taaba se’em ta paɛ bulika; Basɛ ti to di taaba nyɛlum, 19 Se’ere n sɔi la mam sira ka boi yire; A keŋɛ la sore. 20 A dekɛ la ligeri eŋɛ bɔɔrega poan keŋɛ, A me kan lebena ta paɛ dabese’ere daarɛ ti ŋmaremune wan bɔna.” 21 A pã’asɛ en mɛ la nɔmaalom. A tɔɣeri mɛ bɛlegera. 22 Ti a kɔ’ɔn ta a poore, wuu lɔlega ti ba tara yɛ’a ti ba ta kɔregɛ la, Wuu gberego ti ba yeti ba ba en bãsi dɔlegɛ a tuberɛ, 23 Ta paɛ se’em ma’a ti pɛɛhɔ lu a sunsoleŋo; Wuu niiŋa n kabelɛ yɛ’a bɛ̃regɔ poan, a ka mi ti a yeti a ki mɛ. 24 Nananawa, n dayɔɔsi, kelese ya mam; Kelese ya mam tɔɣeri sɛla wa soŋa soŋa. 25 Da basɛ ti ho suure ti’isa lɛbera a bɔba. Da bɔregɛ ta sige a sɔya zuo, 26 Se’ere n sɔi la a basɛ ti nɛreba zo’e zo’e ki mɛ, Ti sɛba ti a ku la me zo’e mɛ. 27 A yire ye la Yɔɔ poan; La tari ho yɛ’a la kum saraa poan.