Daniel
10 “‘Mam daa gã n gɔregɔ zuo ge ti liligere seto bɔna mam zuo poan n wana, mam daa nyɛ la tia n ze tingɔŋɔ wa tiŋasuka, ka daa wɔɣɛ mɛ ka tana ita. 11 Tia la daa zuo mɛ ge kpe’em, ka daa wɔɣɛ mɛ ta zom saazuo ge ti ba nyɛta ka tingɔŋɔ wa zɛ’an woo. 12 Ka vuurɔ la daa som mɛ ti ka wɔla zo’e. Ka dia daa paari nɛra woo mɛ. Goo dusi la daa gã la ka tilum ɛɛra maasum ti niisi n ɛɣeri saazuo bɔna ka yiila zuo ge ti bunvɔɔsi woo dita ka poan. 13 “‘Mam daa gã n gɔregɔ zuo nyɛta liligere kaŋa n zuo poan la, mam nyɛ la gu’ura n ani zilaam ti a ze’ele saazuo sigera na. 14 A daa tɔɣɛ la kpe’eŋo kpe’eŋo yeti: “Lobe ya tia la, ŋma ya ka yiila, miin ya ka vuurɔ la basɛ ge yɛregɛ ya ka wɔla la! Basɛ ya ti goo dusi la n boi ka tilum ge ti niisi la n boi ka yiila la zuo la ɛ̃ɣɛ. 15 Basɛ ya ka tile la ka nyɛɣa la n boi tiŋa la. dekɛ ya kurugo la nyɔɣum bã ka ti ka bɔna mɔɔ la n boi bũɔ la poan. Basɛ ya ti saazuo mɛɣelum lu ka zuo ti ka ma’ɛ ge basɛ ya ti ka bɔna la goo dusi la n eeri mɔen tingɔŋɔ wa zuo la. 16 Basɛ ti ka suure la da le dɛna a suure ge tee dɛna goo duŋa suure ge basɛ ti saŋa sugumnɔɔrɛ buyopɔi tole ka zuo. 17 Nɔɔrɛ wa ze’ele la pigereba la zɛ’an, ti zusega wa ze’ele zilamdoma la yetɔɣum poan, la wan eŋɛ se’em ti nɛreba n vɔi mina ti Gaŋɛ Za’adaana la n de Bisegadaana asaala na’am poan ge me tara ka bɔ’ɔra mina ti a bɔta, hali basɛ ti se’em n pɔ’ɛ asaala poan sɔna bisera.” 20 “‘Tia la ti ho nyɛ la ti ka karegɛ ge tara paŋa la ge wɔɣɛ du saazuo la ti ba nyɛta ka tingɔŋɔ wa zɛ’an woo la 21 ge tara vuurɔ n som la wɔla zo’e zo’e ti ka dia paara nɛra woo ti goo dusi ga’ata ka tilum ti niisi n ɛ̃geri saazuo bɔna ka yila zuo, 22 la dela hon, O Naba, se’ere n sɔi la ho karegɛ mɛ ge tara paŋa ti ho kpe’eŋo zo’e ta du saazuo sa ti ho bisega la kɔ’ɔn paara tingɔŋɔ wa zɛ’an woo. 23 “‘Ti naba la nyɛ ti pigera, zilamdaana, n ze’ele saazuo sigera na ge tɔɣera yeti: “Lobe ya tia la ge sa’am ka ge basɛ ya ka tile la, la ka nyɛɣa la n sige tiŋa la ge ba ya ka la kuto la nyɔɣum ti ka bɔna muurɔ la n boi bɔ̃’ɔ la poan. Basɛ ya ti saazuo mɛɣelum ma’alɛ ka ge basɛ ya ti ka naɛ la goo dusi la bɔna ta paɛ se’em ma’a ti saŋa sugumnɔɔrɛ buyopɔi tole a zuo.” 24 La vuurɛ n wana, O naba; la dela Gaŋɛ Za’adaana nɔɔrɛ n wan paɛ mam daana naba la. 25 Ba wan sa’ɛ hɔ nɛresaaleba zɛ’an ti ho wan ta naɛ la goo dusi la bɔna, ho me wan ɔbera yaama wuu lɔlega la; ti saazuo mɛɣelum la wan lu ma’alɛ hɔ ti saŋa sugumnɔɔrɛ buyopɔi tole ho zuo ta paɛ se’em ma’a ti ho wan baŋɛ ti Gaŋɛ Za’adaana la n de Bisegadaana asaala sɔ’ɔlum poan ge me tara ka bɔ’ɔra mina ti a bɔta. 26 “‘Ge ba yeti ba basɛ tia la tile la ka nyɛɣa la zuo la, ho wan le nyɛ ho na’am la se’em ma’a ti ho wa’ana baŋɛ ti saazuo la n sɔi bisera. 27 Bala la, O naba, basɛ ti mam ka’aŋɔ wa ana soŋa bɔ’ɔra hɔ. Basɛ ho be’em la ge tuna sɛla n ani soŋa ge me basɛ ho tuunfɛ̃’ɛsa la ge zɔta nasedoma nimbɔ̃’ɔ. Daanse’ere ho wan nyɛ som pa’asɛ.’” 28 Yele ana woo daa paɛ Naba Nebukadnezar mɛ. 29 Ŋmaresi pia la ayi pooren la a yuun boi la Babilon Naba yire gɔsegɔ la zuo kena. 30 Naba la yuun tɔɣeri mɛ ti: “La daɣɛ Babilon Kãtɛ La n wana ti mam mea dekɛ n nutatum la n paŋa mɛ ti de dɛna Naba yire, la wan eŋɛ se’em ti nɛreba baŋɛ mam n tari paŋa se’em ge pɛɣɛ mam la?” 31 Naba la n yuun kelum bɔna bim tɔɣera la ti kunkore ze’ele saazuo tɔɣɛ basɛ na ti: “Hon ti ba tɔɣɛ ho yele biŋe ti, O Naba Nebukadneza, ‘Na’am la piɛ ho nu’usin mɛ, 32 ge ti ba dige ho nɛreba poan. Ho wan ta naɛ la mɔɔ dusi bɔna, ho wan laɣum ɔbera muurɔ wuu lɔlesi la ge ti saŋa sugumnɔɔrɛ buyopɔi la ba’asɛ, bala ti ho wan baŋɛ ti Gaŋɛ Za’adaana la n de Bisegadaana asaala sɔ’ɔlum poan ge me tara ka bɔ’ɔra mina ti a bɔta.’” 33 Bilam bilam ti yelesum wa yuun kɔ’ɔn tum bo Nabukadneza. Ba yuun dige en mɛ nɛreba poan ge ti a me yuun pɔsɛ ɔbera muurɔ wuu lɔlesi ge ti saazuo mɛɣelum la yuun basɛ ti a inya ma’ɛ, ti a zuo zonto zo’e wɔɣɛ wuu tugero kɔberɔ la ti a nu-iisi me ana wuu niisi na-iisi la. 34 “Sankaŋa la n yuun ta ba’asɛ la, mam Nebukadneza yuun gurege bisɛ la saazuo ge ti mam yɛm lebena; ti mam pɛɣɛ Gaŋɛ Za’adaana la ge na’asa Se’em n kɔ’ɔn vɔna wuusa la, se’ere n sɔi la a bisega la dela sɛla n kɔ’ɔn bɔna wuusa ge ti a na’am la me wan bɔna la bala ta paɛ dɔɣepa’asɛ n ka tari ba’asegɔ. 35 Nɛresɛba za’a n boi tingɔŋɔ wa zuo la dela zaŋa ge ti saazuo za’a la nɛresɛba n boi tingɔŋɔ wa zuo la, a iti la eŋa n boti se’em ba poan. Ge ti nɛra me ka boi n wan nyaŋɛ gu en bii a yele en ti ‘Ho eŋɛ la bem n bala?’ 36 “Sankaŋa poan la, mam yɛm yuun lebe me na ge ti mam na’am la na’asegɔ, mam paŋa la mam gilema yuun lebe mam zɛ’an na. Mam kpɛ’ɛndoma la mam nɛrezureba yuun kɔ’ɔn ɛɛra mam mɛ ge ti mam le pɔsɛ dita na’am ge malum nyɛ kpe’eŋo pa’asɛ.