1 Samuel
7 Nananawa, mam wum ti ho boi bim siira la ho piisi. Ho dunkeenma la n daa boi to zɛ’an la, to daa ka daam ba. Ba daa boi Karmel la, ba sɛsɛla daa ka bɔregɛ. 8 Soke ho bunbilipaalesi wa ge ba wan yele ho. Mam bunbilipaalesi wa wan nyɛ yelesonɛ ho zɛ’an se’ere n sɔi la, dabesonɛ ti ba wa’an ho zɛ’an na. Soso, bo ho yamesi la ho dayɔa David hon yeen tara sɛla.’” 9 Bala ti David bunbilipaalesi la daa keŋɛ ta yele Nabal David n yele ba se’em la. Ba daa tɔɣɛ ba’asɛ la, 10 Nabal lebese David yamesi la yeti: “Ani n de David ge ani n de Yesse dayɔa la? Dabesa ana yamesi zo’e zo’e welegeri bamesi mɛ ba daanadoma zɛ’an. 11 Beni ti n wan dekɛ n boroboro la n ko’om la n nɛnɔ sebo ti mam ku ti n bo sɛba n siiri n piisi la bo nɛresɛba ti n puɣum ka mina ba ze’ele zɛ’an na?” 13 Bilam bilam ti David yele a bunbilipaalesi la yeti: “Nɛra woo dekɛ a so’a!” Bala ti ba za’a dekɛ ba sɔ’ɔsi yule ba sɛɛsi ti David me dekɛ a so’a yule a sia, ti buraasi n paɛ wuu kɔbesi naasi doose la David kena yɛ’ɛsa ti buraasi kɔbesi siyi yee gura lɔɣɔrɔ la. 14 Sankaŋa mea nɔɔ poan ti yamesi la ayima yele Nabal pɔɣa Abigail yeti: “Bisɛ! David boi la pɔɣetia la poan ge tum nɛreba ti ba wa’ana pu’usɛ to daana wa ge ba paɛ na la, ti a nyabera ge tuura ba.” 18 Ti Abigail eŋɛ kalam dekɛ boroboro kɔbesi siyi, daam duɣerɔ bunkãra siyi, piisi sinuu ti ba maalɛ a soŋa, ki kiima laasi sinuu, daam tiwɔla n ku’ɛ keki kɔbega la mu’uro keki kɔbesi siyi nyaa dekɛ lɔɣɔrɔ la za’a paɣelɛ busi la zuo. 19 Ti a yele a yamesi la yeti: “Deŋɛ ya nɛŋa; mam wan dɔla ya.” Ge a ka yele a sira Nabal sɛsɛla. 21 Nananawa David daa tɔɣeri yeti: “La dela yoo la mam n daa biseri buraa wa lɔɣɔrɔ goo la poan. A lɔkɔ la ayina me daa ka bɔregɛ ge la bala za’a a dekɛ la be’em yɔ mam eŋɛ en som la. 22 Beere san ta yilegɛ ti mam ka ku a yire buraasi woo, Naayinɛ basɛ ti too paɛ David dindoma ti la wuŋɛ ba gaŋɛ bala.” 25 Soso n daana, da basɛ ti Nabal n ka tari vuurɛ wa yele daam hɔ se’ere n sɔi la a yu’urɛ la a halɛ kɔ’ɔn dɛna la buyina. A yu’urɛ dela Nabal ge me kɔ’ɔn tuna gberentuuma. Ge mam ho pɔɣeyameŋa wa ka nyɛ buraasi la ti n daana tum ba na la. 26 N daana, nananawa, Yehowa la hon n boi wa, la dela Yehowa n gu ho ti ho ka ku nɛra ge me ka lerege sanɛ wa. Ho dindoma la sɛba woo n eeri be’em paɛ mam daana la wan ana wuu Nabal. 27 Nananawa, bo’olum wa ti mam n de ho pɔɣeyameŋa tari na bo n daana wa, dekɛ bo burasa’arɛ la n doli hon n de mam daana wa. 28 Soso di sugeri bo ho yameŋa wa, Yehowa wan basɛ ti mam daana wa yire kɔ’ɔn bɔna wuusa se’ere n sɔi la, mam daana zaberɛ la Yehowa zaberɛ, ho me ka tum tuunfɛ’ɛsa ho vom dabesa za’a. 29 Nɛra san isige ɛɛra ho vom ti a sa’am basɛ, Yehowa ho Naayinɛ la wan dekɛ mam daana wa vom eŋɛ vom tapɔɔ poan soŋa soŋa ge a wan dekɛ ho dindoma vom la lobe basɛ wuu ba tari kalɔbega lɔbera kuga se’em la. 30 Yehowa san eŋɛ yelesoma la woo ti a pu’ulum bo n daana la ge me loe ho ti ho dɛna Israel nɛŋadaana, 31 mam daana wa, da ka’ɛ ziim bii ho lerege sanɛ la wan eŋɛ se’em ti la kan daam ho suure pooren bii ho yeti ho daa san baŋɛ ni. Yehowa san eŋɛ som bo mam daana, tɛ̃ra ho yameŋa wa yele.” 32 Bala ti David yele Abigail yeti: “Pɛka paɛ Yehowa Israel Naayinɛ la, se’em n tum hɔ ti ho wa’ana seke mam wa! 33 Ho wan nyɛ kã’a la hon tari yɛm la! Ho wan nyɛ kã’a la hon gu mam zina wa ti n ka ku nɛra bii dekɛ n nu’o lerege sanɛ la.