Liligere

14 Ti mam nyɛ ge bisɛ! pebila la n ze Zion Zoore zuo la nɛreba tusa kɔbega la tusa pinaasi la tusa anaasi (144,000) n tari a yu’urɛ la a Sɔ la yu’urɛ ti la gulesɛ bɔna ba gbɛ’ɛra zuto. 2 Mam wum la sɛla n dameni saazuo wuu ko’om zo’e zo’e n dameni la ge damena wuu saa n tãseri damena la; ti sɛla n dameni ti mam wuna la wɔ̃ni la yuumyuuneba n ŋmɛ’ɛri ba kɔ̃lɔ. 3 Ti ba yuuna sɛla n wɔ̃ni yuunpaalɛ na’am kuka la nɛŋan la bunvɔɔsi banaasi la keendoma la nɛŋan ti nɛra ka bɔna n wan ta’an yuuna yuunɛ la san daɣɛ nɛreba tusa kɔbega la tusa pinaasi la tusa anaasi (144,000) la, sɛba ti ba da ba tingɔŋɔ wa zuo la. 4 Bamam n bala n ka sa’am bamesi la pɔɣesi; yelemɛŋɛrɛ, ba ka gã’arɛ la pɔɣesi. Bamam n de sɛba n kɔ’ɔn dɔla Pebila la zɛsɛka woo ti a yɛ’a. Bamam ti ba da ba asaala poan ti ba dɛna dideeŋa bo Naayinɛ la Pebila la, 6 Ti mam nyɛ maleka ayima n ɛ̃ɣeri saazuo ge mɔɔla daarewoo yelesoma la bɔ’ɔra sɛba n kɛ̃’ɛri tingɔŋɔ wa zuo, tiŋa woo, buuri woo, yetɔɣum woo la nɛreba woo. 7 A tɔɣeri la kpe’eŋo kpe’eŋo yeti: “Zɔ ya Naayinɛ ge bo en gilema, se’ere n sɔi la a gãkerɛ saŋa la paɛ mɛ, bala zuo pu’useri ya Se’emdaana n naam saazuo la tingɔŋɔ wa la ateko ko’om la, la ko’om n buli zɛ’ɛsi la.” 8 Ti maleka n pa’asɛ buyi dɔla poore yeti: “A lui ya! Babilon Kãtɛ la lui mɛ, eŋa n basɛ ti tisi la za’a nyuura a yalumtuuma kunkoma’asum daam la!” 9 Ti maleka n pa’asɛ butã la tɔɣera kpe’eŋo kpe’eŋo dɔla poore yeti: “Se’em san na’asa goo duŋa la, la ka wɔ̃nɛ la ge san to’e dãalesum ka gbe’ere zuo bii ka nu’o poan, 10 a wan nyu Naayinɛ sunsɔyiisum daam ti ba ka pule ti ba ka’ɛ bo eŋɛ A sunsɔyiinsum wanɛ la poan la, ba wan mɛlesɛ en bugum la sɔfa poan zilam malesi la, la Pebila la nɛŋan. 11 Ti ba mɛlesegɔ la zu’usi wan zɔna saazuo daarewoo, ti sɛba n na’aseri duŋa la, la ka wɔ̃nɛ la, la se’em woo n to’e a yu’urɛ dãalesum la kan ta’an vɔ’ɔsa wuntɛɛŋa la nyu’uŋɔ.