Pin’ileŋɔ

21 Isaak daa kɔ’ɔn bɛlena Yehowa mɛ a pɔɣa wa zuo se’ere n sɔi la, a daa dela kundɔɣerɛ; ti Yehowa kɛlesɛ a zusega la, ti a pɔɣa Rebeka nyɔkɛ puurɛ. 22 Ti kɔma la n boi a puuren la pɔsɛ gbita la taaba, ti a yeti: “La san yeti la ana la wana, mam vom wa vuurɛ?” Bala la, a daa sokɛ la Yehowa ti a baŋɛ. 23 Ti Yehowa yele en yeti: “Tisi siyi n boi ho puuren ge ti yizuto bayi wan yese ho puuren na ge ba wan welese taaba; tiŋa ayima wan tara paŋa gana ayima la ge ti keema la wan tuna bɔ’ɔra yibega la.” 24 Saŋa la n yuun ta paɛ ti a dɔɣɛ la, bisɛ! leeba n daa boi a puuren. 25 Ti keema la yese na kɔ’ɔn mu’ɛ za’a za’a ge dɛna konkɔbegɔdaana, bala n sɔi ti ba sɛɣɛ a yu’urɛ yeti Esau. 26 Bala pooren ti a yibega la me yese la ge ti a nu’o kɔ’ɔn gurɛ Esau kalenka’arɛ, bala n sɔi ti a siɣɛ a yu’urɛ yeti Yakob. Se’em ma’a ti a daa dɔɣɛ ba la, Isaak daa dela yuun piyoobe. 27 Kɔma la daa zɔ’ɔra mɛ, ti Esau dɛna gowɛa ge kena goo, Ge Yakob daa ana la baalam ge kɛ’ɛra tɛnti deo poan. 28 Isaak daa nɔŋɛ la Esua se’ere n sɔi la a daa nyɛti la nɛnɔ ɔbera, ti Arebeka me daa nɔŋɛ Yakob. 29 Daarɛ deyima ti Yakob daa boi bim duɣera a ziirɔ ti Esau ze’ele goo lebena ge taregɛ lɔra. 30 Bilam ti Esau yele Yakob yeti: “Soso eŋɛ kalam la ho eŋɛ ho zimɔlegɔ wa bo mam ge mam kom n ba’ɛ duna!” Bala n sɔi ti a yu’urɛ dɛna Edom la. 31 Bala ti Yakob yeti: “Koose ho kenɔ la bo mam yia!” 32 Ti Esau yeti: “Bisɛ n mam kiiri ge ti ho tɔɣera sɛla! Kenɔ dela bem bɔ’ɔra mam? 33 Ti Yakob yele en yeti: “Pɔ yia!” Bala la, a daa pɔ mɛ a nɛŋan ge koose a kenɔ la bo Yakob. 34 Ti Yakob nyaa eŋɛ boroboro la tɛ ziirɔ bo Esau ti a di ge nyu ge isige keŋɛ. Bala la, Esau daa zaɣesɛ a kenɔ la mɛ.