3 Yon
1 Mam se’em n de keema la guleseri bɔ’ɔra la Gaius, mina ti n suure sukɛ en, ti mam sirum nɔŋɛ la. 2 Se’em ti n nɔŋɛ wa, mam zusega dela sɛla woo kena soŋa bɔ’ɔra hɔ ge ti ho me tara imma’asum, wuu sɛla woo n puɣum kena soŋa bɔ’ɔra ho se’em la. 3 Mam puurɛ daa pee mɛ la mabiisi la n daa wa’ana di sɛɛra la hon tari yelemɛŋɛrɛ la kankaŋi se’em ge me bɔna yelemɛŋɛrɛ la poan la. 5 N zɔsoŋɔ wa, ho pa’alɛ ti ho sirum tari sakerɛ la hon to’e mabiisi la se’em la, la ba daa puɣum dɛna saama ho zɛ’an la. 6 Ba di sɛɛra pa’alɛ hon tari nɔŋerɛ se’em tansugere la poan. Soso basɛ ba sore sose’ere n nari poan Naayinɛ nɛŋan. 7 La dela a yu’urɛ la zuo ti ba tuna, ba ka to’e sɛsɛla sɛba n daɣɛ Yudadoma la zɛ’an. 8 Bala, la dela tomam zugbere yele ti to soŋɛ nɛrebana wa, la wan eŋɛ se’em ti tomam mɛ laɣum pa’asɛ yelemɛŋɛrɛ tuuntuneba la poan 9 Mam gulesɛ la sɛla ta bo tansugere la ge Diotrefes se’em n kɔ’ɔn bɔta a dɛna nɛŋadaana ba poan la ka to’e sɛsɛla to zɛ’an gilema sore poan. 10 Bala zuo, mam san wa’ana, n wan bisɛ eŋa n tuni a tuuma se’em dɔla tɔɣera sa’ana to yu’ura la. Ti bala puɣum ka seke en. A zaɣesɛ ti a kan to’e mabiisi la, la gilema ge ti sɛba me n boti ba to’e ba la, ani gu’uri ba mɛ ge me ni sa’ɛ ba tansugere la poan. 11 N zɔsoŋɔ wa, da tɔɣesa sɛla n de be’em ge tuɣum tɔɣesa sɛla n ani soŋa. Se’em n tuni som dela Naayinɛ nɛra ge se’em n tuni be’em nan ka mi Naayinɛ. 12 Nɛra woo kɔ’ɔn tɔɣera Demetrius yele mɛ soŋa soŋa, ti yelemɛŋɛrɛ la me dita sɛɛra a poan. Sira, tomam me dita sɛɛra a poan mɛ, yamam mea mi ti to sɛɛra dia la dela yelemɛŋɛrɛ. 13 Mam tari la yɛla zo’e zo’e ti n gulesɛ ni bo ho ge mam kɔ’ɔn ka bɛta ti n gulesɛ de gɔŋɔ poan. 14 Ge mam tara puti’irɛ ti, la kan yue mam wan nyɛ ho, ti to zi’iri sɔsɛ bo taaba ge nyɛta taaba nɛsi. Suma’asum bɔna la ho. Zɔdoma la n boi kalam la yeti n pu’usɛ ho. Yi zɔdoma sɛba woo n boi bilam la yu’ura ayima ayima, pu’usɛ ba bo mam.