2 Nadoma

5 Assiria naba daa to’e tisi la woo mɛ ge daa wa’ana kaɛ Samaria tiŋa mum yuuma atã. 6 Hosea na’am bisega yuuma awɛi poan la, Assiria naba daa zabɛ to’e Samaria mɛ. Ge tari Israeldoma la keŋɛ yamenɛ poan Assiria tiŋa. Ge basɛ ti ba kɛ̃’ɛra Hala la Habor n boi Gozan kolaa nɔɔren la Medes tisi poan. 9 Israeldoma la daa iti la yelese’a n ka ani soŋa Yehowa ba Naayinɛ la nɛŋan. Ba kelum mɛta la kãabegɔ bimbina ba tisi la woo poan. Ze’ele ba piɣera zontɔɔsi la zuto ta paɛ ba tinkãra la poan; 10 Ba daa mɛti la tuulum piila la baɣa dɔɔrɔ zɔya woo zuto la tikãra woo tiŋa; 11 ge kãabera nyua bunɔ kãabegɔ bimbina la zuo, ti la ana woo tinsena n daa iti se’em ti Yehowa sa’ɛ ba basɛ yamenɛ poan la. Ba kɔ’ɔn ita la be’em ti la nyiira Yehowa suure. 12 Ba daa kɔ’ɔn kãabɛ la baɣa yaalesi la, sɛla ti Yehowa yele ba yeti: “Ya da makɛ ita ya bala!” 13 Yehowa daa kelum dɔla la a nɔdɛ’ɛseba, la sɛba n nyɛti liligere poan ka’ana Israel la Yuda nɛreba la yeti: “Ŋmɛregɛ yamea yese ya be’em tuuma la poan! Doli ya mam nɔbiŋa la, la mam pa’alegɔ la woo n boi Lɔɔ la poan ti mam daa dekɛ boi ya sɔyaabedoma la ge me kelum dɔla mam nɔdɛ’ɛseba la poan tara bɔ’ɔra ya wa.” 14 Ge ba daa ka kelese ge kɔ‘ɔn kpa tuba wuu ba sɔyaabedoma la n daa ka tari sakerɛ Yehowa ba Naayinɛ la poan se’em la. 18 Bala Yehowa sunsɔa daa nyie me paa la Israeldoma la, ti a zaɣesɛ ba za’a. A daa saɛ ba za’a mɛ ge basɛ Yuda buuri la ma’a. 19 Hali, Yuda daa ka doli Yehowa ba Naayinɛ la nɔya la; ba me daa doli la Israel nadoma la malema. 20 Yehowa daa zaɣesɛ Israel buuri la za’a mɛ basɛ ti vi di ba ge dekɛ ba eŋɛ ba dindoma nu’usin ti ba fã ba lɔɣɔrɔ, ta paɛ se’em ma’a ti a ta dekɛ ba za’a basɛ. 21 A daa yese Israel na’am la mɛ David yizuo la poan ge tee basɛ ti Nebat dayɔa Yeroboam dɛna naba. Ge Yeroboam daa basɛ ti Israeldoma zaɣesɛ Yehowa mɛ ge basɛ ti ba tum be’em n gaŋɛ nu’usi. 22 Be’em sebo woo ti Yeroboam tum la, bala mea nɔɔ ti Israeldoma me tum. Israeldoma wa daa kɔ’ɔn ita la be’em sebo ti Yeroboam daa ita la, ba ka dekɛ basɛ 23 ta paɛ se’em ma’a ti Yehowa zaɣesɛ Israeldoma wuu eŋa n doose a nɔdɛ’ɛseba la za’a poan yele se’em la. Bala, ba daa vaɛ Israeldoma za’a bamea tiŋa la poan keŋɛ la Asiria tiŋa, ti ba bɔna yamenɛ poan ta paɛ zina wa. 24 Ti Assiria naba nyaa daa tari nɛreba ze’ele Babilon la Kuta la Ava la Hamat la Separvaim tisi poan na ti ba kɛ’ɛra Samaria tisi la poan, ba wa’ana tee soe la Isrealdoma la na’arɛ; ba kɔ’ɔn to’e la Samaria tisi la za’a nyaa kɛ’ɛra si poan. 25 Sansɛka ti ba kɛ̃’ɛra tisi la poan la, ba daa ka pu’usa Yehowa. Ti Yehowa me basɛ ti gbɛɣɛma wa’an ba zuo na, ku nɛreba la basɛba. 26 Ti nɛreba keŋɛ ta yele Assiria naba la yeti: “Nɛreba la ti ho tari ba ta basɛ Samaria tisi poan n ka mi tiŋa la Naayinɛ malema la zuo, a basɛ ti gbɛɣɛma kena ba zɛ’an kuura ba mɛ, se’ere n sɔi la ba poan la, se’em sa’am ka boi mina ba pu’useri tiŋa la Naayinɛ la se’em. 27 Bala ti Assiria naba bo nɔɔrɛ yeti: “Basɛ ya ti malemadoma la ti ya vaɛ ba keŋɛ yamenɛ poan la ayima lebena bɔna tiŋa la poan pa’ala ba tiŋa la Naayinɛ malema.” 28 Bala, ba basɛ mɛ ti malemadoma la ti ba tari ba ze’ele Samaria keŋɛ yamenɛ poan la ayima lebena kɛ’ɛra Betel tiŋa nyaa pa’ala ba, ba nari ti ba pu’usa Yehowa se’em. 29 Ge tiŋa woo poan nɛreba daa maalɛ ba tiŋa baɣa mɛ tari ba kena kãabera Samariadoma n daa maalɛ kãabegɔ bimbina se’a la zuo; tisi la woo daa eŋɛ la bala tinse’a ti ba kɛ̃’ɛra a poan la.