1 Timoti

3 Yelesum wa dela yelesonɛ: Buraa san mɔɔra ti a dɛna bisegadaana a boti la tuunsonɛ. 2 Bisegadaana nari ti a dɛna la nɛresɛka n ka tari yele, siresɛka n tari pɔɣeyiŋa, tara halesoma, tara putɛsonɛ, dɔla sɛla woo ma’a ma’a, nɔŋɛ saaŋɔ, ta’an pa’ala, 3 daɣɛ daambugera, ka nɔŋɛ gbiregere, tara bɔkerɛ, ka nɔŋɛ nɔkpe’ene, daɣɛ se’emdaana n nɔŋɛ ligeri, 4 burasɛka n ta’an bisera amea yire soŋa soŋa, ti a kɔma nana en 5 (se’ere n sɔi la buraa san ka ta’an bisera amea yire soŋa soŋa, a wan eŋɛ la wani ta’an bisɛ Naayinɛ tansugere la?), 6 a daɣɛ nɛresɛka n nan kɔ’ɔn baŋɛ yelemɛŋɛrɛ la, la wan eŋɛ se’em ti a kan zɛkɛ amea nyaa ta nyɛ gãkerɛ sɛka n wan paɛ Sitaana la. 7 Leyɛ’ɛsa, la nari ti yiŋadoma tɔɣera a yelesoma la wan eŋɛ se’em ti a kan nyɛ yusa’aŋɔ ti Sitaana me kan nyaŋɛ bɛ̃ri en. 8 Keendoma soŋeredoma me nari ti ba tara la ninmɔ’ɔrɛ, ka pã’asera nɛreba, ka nyuura daam zɔ’ɔra, a ka bɛ ge me ka fãara nɛreba 9 ge dekɛ putɛkeeŋa n ani filam gurɛ sakerɛ la n de suɣelum yele la. 10 Leyɛ’ɛsa, yia la, bisɛ nyaa nɛrebana wa sirum nari; ge basɛ ti ba tuna wuu tuuntuneba la se’ere n sɔi la ba ka tari tuure. 11 Pɔɣesi me nari ti ba nini mɔ’ɛ la tuuma, da sa’ana nɛreba yu’ura, tara halesoma, tara yelemɛŋɛrɛ sɛla woo poan. 12 Basɛ ya ti keendoma soŋeredoma dɛna sireba sɛba n tari pɔɣa ayina, ta’an bisera bamesi kɔma la ba yire soŋa. 13 Se’ere n sɔi la, burasɛba n tuni soŋa soŋa tari la yusonɛ ge me tɔɣera fai fai la ba tari sakerɛ Krista Yezu poan la.