2 Nadoma

20 Dabesa aŋa poan, Hezekia daa bɛ̃’ɛri mɛ kɔ’ɔn pɔ̃ra kum. Nɔdɛ’ɛsa Isaiah n de Amon dayɔa la wa’ana yele en yeti, “Yehowa n yele se’em n wana: ‘Dekɛ pa’alegɔ bo ho yidoma wa ge ho yeti ho ki mɛ; ho kan nyɛ imma’asum.’” 2 Bala ti a ŋmɛregɛ a nɛŋa tɔ dangoone ge pɔsɛ zusera Yehowa yeti: 3 “O Yehowa, soso, tɛ̃ra mam naɛ la hɔ kena se’em yelemɛŋɛrɛ poan, la n suure za’a. Mam kɔ’ɔn ita la sɛla n ani soŋa ho nɛŋan.” Ti Hezekia nyaa pɔsɛ kɛla paa paa. 4 Isaiah daa nan ka yese tiŋasuka zinzaka la ge ti Yehowa yelesum wa’an a zɛ’an na yeti: 5 “Lebe ta yele Hezekia, mam nɛreba la nɛŋadaana la yeti, ‘Yehowa ya sɔyaaba David Naayinɛ la n yele se’em la wana: “Mam wum ho zusega la mɛ. Mam nyɛ ho nintam la mɛ. Nananawa, n yeti n tibɛ ho mɛ. Dabeserɛ n pa’asɛ butã la poan la, ho wan isige keŋɛ Yehowa yire la poan. 6 N wan dekɛ yuuma pia la anuu pa’asɛ ho vom poan ge faaɛ hon la tiŋa wa yese Asiria naba nu’usin. N me wan zabɛ bo tiŋa wa, mam mea yu’urɛ la n yameŋa David yu’urɛ zuo.”’”