Liligere
13 Ti a ta ze’ele ateko tontɔnɔ zuo. Ti mam nyɛ goo duŋa n ze’ele ateko poan yɛsera na. A tari la iila pia la zuto tuyopɔi, ilɛ woo vuge la muŋa ti yu’ura n tuurɛ Naayinɛ gulesɛ bɔna a zuo. 2 Goo duŋa la ti mam nyɛ la ani woo goobaa la ge ka nama ani me woo saseŋa la ti ka nɔɔrɛ ana woo gbɛɣenɛ nuurɛ. Ti seerego la dekɛ ka paŋa la ka na’am kuka, la ka kpe’eŋo kãtɛ la bo goo duŋa la. 3 Mam nyɛ ti zuto la ayima nyɛ la pɔɣeleŋɔ ge nɔtɔ la bi’ɛ mɛ ti tingɔŋɔ la za’a kaɛ dɔla goo duŋa la pooren la pupeelum. 4 Ti ba daa pu’usɛ seerego la se’ere n sɔi la, ka dekɛ kpe’eŋo la bo la goo duŋa la ti ba pu’usa goo duŋa la yeti: “Ani n boi ana woo goo duŋa la, ani n boi n wan ta’an zabɛ la ka?” 5 Ka daa tari la nɔɔrɛ tɔɣera yelekɛɣela ge tuura, ba me daa bo ka la kpe’eŋo ti ka tum paɛ ŋmaresi pinaasi la bayi. 6 Ka yaɛ la ka nɔɔrɛ tuura Naayinɛ ge tuura a yu’urɛ la, la a kɛ’a zɛ’an la hali la sɛba n kɛ’ɛri saazuo la. 7 Ka daa nyɛ yɔ’ɔ mɛ ti ka zabɛ la Naayinɛ zilamdoma la ge nyaŋɛ ba, ka me daa nyɛ la kpe’eŋo ti a sɔna buuri woo la nɛreba woo la yetɔɣum woo la tisi woo bisera. 8 Sɛba za’a n kɛ̃’ɛri tinparɛ wa zuo wan pu’usɛ en. Kɔ’ɔn ze’ele tingɔŋɔ wa pɔsega poan, ba ka gulesɛ ba se’em sa’am yu’urɛ eŋɛ Pebila la ti ba ku la vom gɔnkile la poan. 9 Nɛresɛka n tari tuberɛ, a daana kɛlesa. 10 Hon se’em ti la dɛna la ba nyɔkɛ ho, tari ho keŋɛ yamenɛ poan, ba wan nyɔkɛ ho keŋɛ. Hon se’em me ti la dɛna la ba ku hɔ la su’a, ba wan ku ho la su’a. Wana zuo ti la nari ti zilamdoma la tana ŋmibera ge tara sakerɛ. 11 Ti mam le nyɛ goo duŋa ayima n ze’ele tingɔŋɔ wa poan sa zɔna na. Ka me daa tari la iila ayi wuu pebila la ge ka daa tɔɣeri mɛ wuu seerego la. 12 Ka tari la yia goo duŋa la kpe’eŋo la za’a tuna a nɛŋan. Ka me pɛregɛ tingɔŋɔ la, la nɛresɛba woo n bo ka poan la ti ba pu’usa yia goo duŋa la, sɛka nɔregɔ n bi’ɛ la. 13 Ka me tuni la yelekiresi hali ni basɛ ti bugum ze’ele saazuo sigera tingɔŋɔ wa zuo na ti nɛreba bisera. 14 Kan daa nyɛ yɔɔ tum yelekiresi goo duŋa la nɛŋan la zuo, ka daa pã’asɛ sɛba n boi tingɔŋɔ wa zuo la mɛ ge yele ba yeti, ba maalɛ goo dunsɛka ti ba kɛ̃ ka la su’a ti ka kelum vɔna la wɔ̃nɛ. 15 Ka me daa nyɛ yɔ’ɔ mɛ ti ka dekɛ vo’osum bo goo duŋa la wɔ̃nɛ la, la wan eŋɛ se’em ti goo duŋa la wɔ̃nɛ la ta’an tɔɣera ge me ta’an ku sɛba woo n kan na’asera en la. 16 Ka pɛregeri nɛra woo mɛ, nɛresɛba n pɔ’ɛ la nɛrezureba, buntateba la nasidoma, nɛresɛba n boi fai la yamesi za’a, ti ba tara dãalesum ba zuɔ nuo poan la ba gbɛ’ɛra zuto, 17 ge ti nɛnɛra kan ta’an da sɛla bii koose san daɣena a tari la dãalesum la n de goo duŋa la yu’urɛ bii a yu’urɛ la kãlɛ la.