1 Samuel

20 Ti David zɔ yese Naiot n boi Rama tiŋa. Ge nyaa keŋɛ Yonatan zɛ’an ta yele en yeti: “Mam eŋɛ la bem? N tuure dela deni ge mam tum la bem be’em giisɛ ho sɔ ti a ɛɛra ti a ku mam?” 2 Bala ti Yonatan yele en yeti: “Yɛm ka boi bim! Ho kan ki. Bisɛ! Mam sɔ kan eŋɛ sɛsɛla ge kan yele mam, la de yelepika bii yelekãtɛ woo. Beni n sɔi ti mam sɔ dekɛ yeledena suɣɛ mam? La kan tum.” 12 Ti Yonatan yele David yeti: “Basɛ ti Yehowa, Israel Naayinɛ la dɛna mam sɛɛra ti n wan tɔɣɛ bo n sɔ baŋɛ a puti’irɛ n de se’em beere sa’am wana ma’a bii ta paara dabesa atã daarɛ. A san sirum ti’isa la som bɔ’ɔra hɔ, mam kan basɛ ti ho baŋɛ yoi? 13 Ge mam sɔ san ti’isa la be’em bɔ’ɔra hɔ, basɛ ti Yehowa namesɛ Yonatan n san ka sɔsɛ yele la bo ho ge basɛ ti ho keŋɛ la suma’asum. Yehowa wan bɔna la hɔ wuu eŋa daa boi la mam sɔ se’em la. 15 Da malum tamɛ ho nɔŋerɛ la ti ho tara bɔ’ɔra mam yidoma la hali Yehowa san ta sa’am David dindoma la za’a tingɔŋɔ wa zuo.” 30 Ti Saul sunsɔa nyie la Yonatan ti a yele en yeti: “Tubekpiriga pɔka bia wa, ho ti’isɛ ti mam ka mi ti ho boi la Yesse dayɔa la bɔberɛ ti ho fakɛ homea la ho ma zuo? 31 Yesse dayɔa wa n kelum bɔna tingɔŋɔ wa zuo wa, hon la ho na’am la kan vɔi. Bala la, nananawa tum nɛra ti a keŋɛ ta tari en na bo mam se’ere n sɔi la a nari ti a ki mɛ.” 32 Ge Yonatan lebese a sɔ Saul yeti: “Beni n sɔi ti la nara ti a ki? A eŋɛ la bem?” 42 Yonatan yele David yeti: “Keŋɛ la suma’asum sɛla n sɔi la to pɔ mɛ Yehowa yu’urɛ poan yeti, ‘basɛ ti Yehowa bɔna mam la hon tiŋasuka la ho yaasi la mam yaasi tiŋasuka wuusa.”’ Bala ti David isige keŋɛ ti Yonatan me lebe tiŋa la poan.