To Puurɛ Pee Mɛ La To Baŋɛ Suɣelum Yele La

Nɛra tabelɛ yele ho suɣelum yele?​—a Baabule la tɔɣɛ la suɣelum yele n boi de to’ore. Sɛla n sɔi ti de bɔna de to’ore dela de ze’ele Naayinɛ zɛ’an na. La me dela suɣelum yele sɛla n sɔi la nɛreba ka mi de vɔɔrɛ. Hali malesi yuun boti ba baŋɛ yele wa mɛ. Ho wan bɔta ti ho baŋɛ suɣelum yele wa?—

Yuuman yuuman sa ti Naayinɛ deŋɛ naam buraa la pɔka. Ba yu’ura yuun dela Adama la Awa. Naayinɛ yuun bo ba la zɛsoŋa ti ka yu’urɛ dɛna Eden gaadin. Adama la Awa yuun san nam ni Naayinɛ nɔɔrɛ, bamam la ba kɔma yuun ta’an basɛ ni ti teŋgɔŋɔ wa za’a lebege paradiisi wuu gaadin kaŋa la. Ba me wan boi ni Paradiisi wa poan wuusa. Ge hon tɛri Adama la Awa n yuun eŋɛ sɛla?—

Adama la Awa n yuun zaɣesɛ Naayinɛ nɔɔrɛ la n sɔi ti to ka bɔna paradiisi poan zina wa. Ge Naayinɛ yeti a wan basɛ ti teŋgɔŋɔ wa za’a tee dɛna zɛsoŋa, ti nɛra woo tara pupeelum ge vɔna wuusa. A wan eŋɛ la wani eŋɛ bala? Yuuman yuuman sa, ti nɛreba ka mina yele wa. La dela suɣelum yele.

Yezu n yuun boi teŋgɔŋɔ wa zuo la, a yuun pa’alɛ nɛreba suɣelum yele wa. A yuun yeti yele wa dela Naayinɛ Na’am. Yezu yuun yele nɛreba ti ba pu’usa ti Na’am wa wa’ana. Bu wan basɛ ti teŋgɔŋɔ wa tee dɛna paradiisi.

Ho puurɛ pee ya la hon baŋɛ suɣelum yele wa?​— Tɛra ti sɛba n nani Yehowa ma’a n wan bɔna Paradiisi poan. Baabule la pa’alɛ buraasi la pɔɣesi n tabelɛ nam Yehowa nɔɔrɛ se’em. Ho wan bɔta ti ho baŋɛ ba?​— Basɛ ti to bisɛ ba yuun de nɛresɛba la tomam me n wan eŋɛ se’em ana wuu bamam.