Hon N De Naayinɛ Tuntuna La, Kɔ’ɔn Tɔla Nɛŋa
1. Yuun kɔbesɛka n deŋɛ nɛŋa kristakɔma la yuun eŋɛ la bem ti la pa’alɛ ti la nari ti to tɔla nɛŋa?
1 Kristakɔma nari ti ba nyɛta nɛŋa tɔlega la ba de na’am la tuntuneba la. Bala zuo ti Yezu yuun kumesɛ a podɔleba la na’am tuuma la poan la. (Luke 9:1-5; 10:1-11) Bala mea nɔɔ n sɔi ti Akuila la Prisila yuun tari Apolos ‘kule ba yire ta pa’alɛ en Naayinɛ yɛla malum pa’asɛ la.’ (Tooma 18:24-26) Yele denɛ mea nɔɔ poan ti Paul yuun ka’am Timoti, na’am mɔɔlegɔ daana n yuun tuulegeri la, ti pa’alegɔ seko ti a nyɛ la a ‘dekɛ a puti’irɛ eŋɛ la poan ti nɛreba nyɛ ti a toli nɛŋa.’ (1 Tim. 4:13-15) La ka pakɛ to dekɛ yuuma se’em mɔɔla na’am yelesoma la ge pu’usa to Daana la, la nari ti to kelum tole nɛŋa kumesa tomea na’am mɔɔlegɔ la poan.
2. To wan eŋɛ la wani zamesɛ sɛla basɛba zɛ’an?
2 Zamesɛ Sɛla Basɛba Zɛ’an: Sarɔseko poan ti to wan ta’an kumesɛ tomea dela to zamesɛ sɛla basɛba zɛ’an. (Maga. 27:17) Bala la, ni kɛlesa soŋa mabia san ni tara tuunɛ. Soke sɛba n mi yetɔɣum na’am mɔɔlegɔ poan ge kɛlesa soŋa soŋa ba san pa’ala hɔ. (Mag. 1:5) Ho dela mina n ka mi hon wan eŋɛ se’em lebe ta limese nɛra, pɔsɛ Baabule zamesegɔ bii hon wan doose sarɔseko poan tum na’am tuuma la soŋa? La dela homea soke ho na’am tuuma tigesego bisega daana bii na’am mɔɔlegɔ daana n kumesɛ ti a pa’alɛ hɔ. Tɛra ti Yehowa zilam vo’osum la wan ta’an soŋɛ tɔ, bala la, kɔ’ɔn pu’usa ɛɛra bu tɛm woo.—Luke 11:13.
3. To wan eŋɛ la wani nɛra san ka’am tɔ?
3 Nɛra san yele ho sɛla n nari ti ho eŋɛ, da basɛ ti la dɛna daaŋɔ bo ho. (Pa’a. 7:9) Wuu Apolos n yuun ani se’em la, sirege homea sakɛ ge basɛ ti ho puurɛ pee. Ho san eŋɛ bala, la pa’alɛ ti ho tari yɛm.—Maga. 12:15.
4. Beni ninmɔ’ɔrɛ yele ti Yezu yuun tɔɣɛ pa’alɛ sɛla zuo ti la nara ti to nyɛ nɛŋa tɔlega wuu to de na’am mɔɔlegɔdoma la?
4 To Nɛŋa Tɔlega Tari La Pɛka Bɔ’ɔra Naayinɛ: Doose makerɛ poan, Yezu yuun yele a podɔleba la yeti ba nyɛ nɛŋa tɔlega na’am tuuma la poan. A yuun dekɛ a mea makɛ la tia ge dekɛ loeredoma la me makɛ yila. A yuun yeti, a Sɔ la n yoreseri yila se’a woo n wɔni la, la ‘wan eŋɛ se’em ti ba ana soŋa wɔna zo’e zo’e.’ (Yon 15:2) Wuu nɛra n biseri a tiisi ge bɔta si wɔna soŋa soŋa se’em la, Yehowa me boti to nyɛ nɛŋa tɔlega la bala, la wan eŋɛ se’em ti to ta’an dekɛ “pɛka ti la dɛna kaabegɔ” bo en. (Heb. 13:15) Wuu to de na’am mɔɔlegɔdoma la, beni n wan ze’ele bim yese na to san nyɛ nɛŋa tɔlega? Yezu bo lebesego la yeti: “Ya han tona sɛla te mam Sɔ bɔta, la wan pa’alɛ nɛreba n Sɔ pɛnka n ane se’em.”—Yon 15:8.