Vom La Na’am Tuuma Zamesegɔ Viisegɔ Gɔŋɔ

NOVEMBER 2-8

NAAYINƐ TUULUM YƐLA | YƐHEGA 39-40

“Moses Yuun Doose Pa’alegɔ La Mɛ Nima Nima”

w11-E 9/15 27 ¶13

Yehowa Mi Ho?

Moses yuun dela nɛresɛka “n sigehe a mɛŋa teŋa gana nɛra se’em woo n boe teŋa wa zuo.” (Kan. 12:3) Eŋa n yuun lu a suure dɔla Yehowa pa’alegɔ la, pa’alɛ ti a yuun siregeri la a mea. (Yɛh. 7:6; 40:16) Sɛsɛla ka boi n pa’alɛ ti Moses yuun nyɔni mɛ la Yehowa n tuni a tuuma se’em bii a eŋɛ la sunsua la Yehowa pa’alegɔ. Makerɛ, Yehowa yuun bo ba la nɔɔrɛ pa’ala ba nima nima ba wan mɛ sogorɛ la se’em, n de wuu mu’uŋɔ sɛka ti ba wan dekɛ wuɣɛ tanɛ la, la ba wan zo’e se’em. (Yɛh. 26:1-6) Bisegadaana san bo ho pa’alegɔ n baɛ ana nima nima Naayinɛ tigere la poan, la ta’an basɛ ti ho sunsua nyie. Yehowa dela bisegadaana n di mi’a ge me galesa tuuma bɔ’ɔra a yamesi sɛba ti a nam ba la. A san pa’ala to yɛla nima nima, a mi sɛla zuo n sɔi ti a ita bala. Tɛra soŋa soŋa ti Moses yuun ka eŋɛ sunsua la Yehowa bii a ti’isa ti a zeem en mɛ la pa’alegɔ la bii giŋera en ti a kan ta’an bɔna fai ita sɛla ti a bɔta. Ge Moses yuun tiregɛ mɛ basɛ ti tuuntuneba la tum “sɛla woo” wuu Naayinɛ n pa’alɛ ba se’em la nima nima. (Yɛh. 39:32) Bisɛ eŋa n yuun siregeri a mea se’em! Moses yuun mi soŋa soŋa ti tuunɛ la dela Yehowa tuunɛ ti a bɔta ti a doose a poan basɛ ti ba tum tuunɛ la.

w05-E 7/15 27 ¶3

Hon Tari Yelemɛŋɛrɛ Sɛla Woo Poan?

Wuu Hebru 3:5 n pa’alɛ se’em la, “Moses yuun dela birikina.” Bem n basɛ ti nɔdɛ’ɛsa Moses yuun tara yelemɛŋɛrɛ? Yehowa n yuun pa’alɛ Moses ba wan mɛ ge maalɛ sogorɛ la se’em la, ‘Moses yuun eŋɛ sɛla woo wuu Naayinɛ n bo en nɔɔrɛ se’em la. A yuun kɔ’ɔn eŋɛ la bala mea nɔɔ.’ (Yɛhega 40:16) To de Yehowa yamesi la to san nana en, la pa’alɛ ti to tari la yelemɛŋɛrɛ. Wana wa pa’alɛ ti to wan tara yelemɛŋɛrɛ bɔ’ɔra Yehowa to san puɣum bɔna gurebisɛ bii yaarɛ poan. Ge to san puɣum nyaŋɛ ŋmibe ze’ele gurebisɛ poan la ka pa’alɛ ti to tari yelemɛŋɛrɛ. Yezu yuun yeti: ‘Nɛra san tara yelemɛŋɛrɛ yelepiɣesi poan a wan tara yelemɛŋɛrɛ yɛla kekeko poan ge nɛra san ka dɛna tontɔɔdaana yelepiɣesi poan a kan ta’an dɛna tontɔɔdaana yɛla kekeko poan.’ (Luke 16:10) La nari ti to kɔ’ɔn tara yelemɛŋɛrɛ sɛla woo poan.

Ɛɛra Vo’osum Poan Yɛla

it-2-E 884 ¶3

Ko’naahɔ Ganɛ

Israeldoma La N Yuun Ni Eŋɛ Se’em Nyɛ Ganɛ Wa. Baabule la poan ta’chash san ze’ele bo la ko’naahɔ, sokere la nyaa dela Israeldoma yuun eŋɛ la wani nyɛ ko’naahɔ gana wa. To mi ti ko’nii boi la Arctic la Antarctic tisi poan, basɛba boi la zɛse’esi n ani wam poan. Zina beere wa ko’nii ase’a n de monk seals la boi la Mediterranean Ateko poan la zɛse’esi ko’om n ani wam. Yuuma zo’e zo’e n tole la, nɛreba ku ko’nii wa mɛ zo’e zo’e ge kelum kuura ba nyaa basɛ ti ba gee fii ge Baabule saŋa la daanse’ere ba kɔ’ɔn zo’e mɛ bɔna Mediterranean la Mɔɣemɔlega la poan. Yuunɛ 1832 poan la Calmet’s Dictionary of the Holy Bible Solemiine denɛ la (gɔn. 139) yeti: “Ko’nii boi la Mɔɣemɔlega Islands teŋpiɣesi n kaɛ Sinai peninsula la.”​—Le bisɛ The Tabernacle’s Typical Teaching, ti A. J. Pollock gulesɛ la, London, gɔn. 47.

w15-E 7/15 21 ¶1

Ho Tuuma La Yele Pakɛ Nɛra Me Yoi?

Ba yuun maalɛ sogorɛ la ba’asɛ la ti saŋgbanɛ yuun “pin Sogorɛ la, te Na’ayenɛ na’ahegɔ perɛ ko poan.” (Yɛh. 40:34) Bisɛ Yehowa puurɛ n yuun pee se’em! Hon ti’isɛ ti la yuun wan ana Bezalel la Oholiab la wani? La boi bim ti ba yuun ka gulesɛ ba yu’ura eŋɛ ba tuuma la poan ge ba puurɛ yuun pee mɛ la Naayinɛ n kã bo ba, la ba yuun ãregɛ bamea se’em la. (Mag. 10:22) Yuun se’a n taɣelɛ la, ba puurɛ yuun pee mɛ la ba yuun nyɛ ti Israeldoma la kelum tara lɔɣese’a ti ba maalɛ la tuna Yehowa tuuma la. Nɔkpe’ene kai ti teŋpaalega la poan Bezalel la Oholiab suure wan sukɛ mɛ ba san ta baŋɛ ti Israeldoma la yuun dekɛ sogorɛ la tum tuuma mɛ ta paɛ yuun 500 yelemɛŋɛrɛ pu’usegɔ poan!

NOVEMBER 9-15

NAAYINƐ TUULUM YƐLA | MALEMA 1-3

“Sɛla Zuo Ti Ba Bɔ’ɔra Bo’olum”

it-2-E 525

Bo’olum

Nyɔ’a bo’olum. La nari ti ho nyɔ̃ dunsɛka ti ho bɔta ti ho dekɛ eŋɛ nyɔ’a bo’olum la za’a bo Naayinɛ; la ka nari ti nɛresɛka n tari wa’ana la loe sɛla bim. (Dekɛ makɛ Ke 11:30, 31, 39, 40.) La dela a belum Yehowa ti a to’e a be’em bo’olum la, la gãleŋɔ yelese’a ti la nara ti a maalɛ. Yezu Krista kaabegɔ la dela ‘nyɔ’a bo’olum’ ti a yuun dekɛ a mea za’a bo.

it-2-E 528 ¶4

Bo’olum

Boom bo’olum. Ba yuun ni dekɛ la boom bo’olum la suma’asum bo’olum la nyɔ’a bo’olum la be’em bo’olum eŋɛ kaabegɔ ti la me dɛna ba didiina. Saŋa ase’a ba yuun ni dekɛ la ba poan ayima ma’a bo. (Yɛh 29:40-42; Mlm 23:10-13, 15-18; Kan 15:8, 9, 22-24; 28:9, 10, 20, 26-28; zuo 29) Nɛra yuun ni san dekɛ boom bo’olum bo, la pa’alɛ ti Naayinɛ n kã bo en n sɔi ti a nyɛ dia zo’e zo’e la. Ba yuun ni dekɛ la kaam la digilom pa’asɛ. Boom bo’olum ta’an dɛna zom, ki sĩ’irema, boroboro n ani kilega bii boroboro n ani lama lama ti ba sɛ̃ sarɛ poan bii dekɛ kaam kiim a. Ba yuun ni dekɛ boom bo’olum basɛba biŋe la nyɔ’a kaabegɔ daka bimbine la zuo, ti malemadoma la wan di basɛba ge la san dɛna la suma’asum bo’olum, mina n tari wa’ana la me ni laɣum di basɛba mɛ. (Mlm 6:14-23; 7:11-13; Kan 18:8-11) La ka nari ti boom bo’olum la ti ba wan dekɛ biŋe daka bimbine la zuo tara mi’isum bii “seerum” (n de mu’uro ko’om bii tiwɔla ko’om) n wan ta’an mi’e.​—Mlm 2:1-16.

it-2-E 526 ¶1

Bo’olum

Suma’asum bo’olum (bii pupeelum bo’olum). Suma’asum bo’olum ti Yehowa ni to’e la pa’alɛ ti a tari la suma’asum la en. Nɛra la, la a deodoma ni laɣum mɛ di (sogorɛ la zinzaka la; wuu ba malema yɛla n pa’alɛ se’em la, ba yuun ni tĩ la paɣesi kaɛ tanɛ la zinzaka la poan; ba yuun ni tara la zɛ’an ti ba zi’a dita pu’usegɔ deo la poan). Malemadaana la n yuun ni ita kaabegɔ la yuun ni to’e a tɔ̃tɛ mɛ ge ti malemadoma sɛba n boi bim la me ni to’e ba denɛ. Ba ni nyɔ duŋa kaam la daka bimbine la zuo ti la dɛna nyuuŋo soŋɔ bo Yehowa. Ziim la n ze’ele bo vom la yuun dela la Naayinɛ denɛ. Bala la malemadoma la, la sɛba n yeti ba eŋɛ kaabegɔ la ni laɣum di mɛ ti la pa’alɛ suma’asum n boi bamam la Yehowa teŋasuka se’em. Nɛra la san ka ana fa’a ge di (yelese’a woo n daɣɛ fa’a Lɔɔ la poan la) bii mina n wan dekɛ kaabegɔ nɛŋɔ la biŋe ti la ta zɔɛ malema la saŋa ge ti a di (la san dɛna murigere saŋa la wan pɔsɛ pũ’ura) ba wan ku nɛra kaŋa daana. A daana gãlum dia la mɛ bii daanse’ere a mea n ka ani kasi bii disɛka n ka nari Yehowa Naayinɛ nɛŋan, bala wan ana wuu a ka tari gilema bɔ’ɔra tuulum yɛla.​—Mlm 7:16-21; 19:5-8.

Ɛɛra Vo’osum Poan Yɛla

w04-E 5/15 22 ¶1

Malema Gɔŋɔ La Yelekpina

2:13​—Beni n sɔi ti ba yuun ni dekɛ yaarum laɣum pa’asɛ “bo’olom woo poan”? Ba yuun ka iti bala ti la basɛ ti kaabegɔ la za’asum. Teŋgɔŋɔ wa zɛ’an woo, ba tari yaarum ita la dia poan ti la da sa’am. Daanse’ere ba yuun ni dekɛ pa’asɛ bo’olum la poan ti la basɛ ti bo’olum la da sa’am bii pũ’ɛ.

it-1-E 813

Duŋa Kaam

Sɛla zuo ti a biŋe lɔɔ la. Nɔbiŋere Lɔɔ la poan, ziim la duŋa kaam la yuun dela Yehowa ma’a denɛ. Vom la boi la ziim la poan ti Yehowa dekɛ bo to, bala, la dela eŋa ma’a denɛ. (Mlm 17:11, 14) Duŋa kaam yuun dela sɛla ti ba geele ka ti ka gani nɛŋɔ la ka mea mɛ. Ba yuun san dekɛ duŋa kaam la eŋɛ kaabegɔ bo Yehowa, la pa’alɛ ti ba bo en la zɛ’an n ani soŋa nɛŋɔ la woo poan. Naayinɛ n bo’ori zo’e zo’e la n sɔi ti nɛra puurɛ ni pee ti a bɔta ti a dekɛ sɛla n ani soŋa bo en. La yuun dela sɛla n de daalesum pa’alɛ Israeldoma la n pu’useri Yehowa ma’a se’em. La yuun dela ba nyɔ̃ dɛ daka bimbine la zuo ti la dɛna ‘dia’ la ‘nyuuŋo soŋɔ’ bo en. (Mlm 3:11, 16) La yuun ka nari ti se’em obe duŋa kaam, sɛla n sɔi la, la yuun dela Yehowa ma’a denɛ ti la ka nari ti nɛra dekɛ. Se’em n obe duŋa kaam ba wan ku en. Duŋa yuun san ki bii sɛla n ku ka, ho wan ta’an dekɛ ka kaam la eŋɛ sɛla ge daɣɛ ka ziim la.​—Mlm 7:23-25.

w04-E 5/15 22 ¶2

Malema Gɔŋɔ La Yelekpina

3:17. Duŋa kaam n yuun de sɛla n ani soŋa bɔ’ɔra Yehowa la zuo, la yuun dela kisire bɔ’ɔra Israeldoma la ti ba da obe kaam la ge ba tuɣum dekɛ bo Yehowa. (Pin’ileŋɔ 45:18) Wana wa pa’alɛ ti to nari ti to dekɛ sɛla n di mi’a bo Yehowa.​—Magaha 3:9, 10; Kolose 3:23, 24.

NOVEMBER 16-22

NAAYINƐ TUULUM YƐLA | MALEMA 4-5

“Dekɛ Sɛla N Di Mi’a Bo Yehowa”

it-2-E 527 ¶9

Bo’olum

Tuure bo’olum. Be’em sebo woo ti nɛra yuun san eŋɛ ba ni eŋɛ la tuure bo’olum bo Naayinɛ. Be’em yuun boi la de tɔka la nɛra n tue sɛla poan ti a daana la wan ta’an maalɛ ge le nyɛ yɔ’ɔ sebo ti a nara ti a tara la. La ta’an dɛna tuure sebo n giiseri Yehowa bii a zilam teŋa la. Tuure bo’olum wa yuun nari ti la dɛna sɛla n wan basɛ ti Yehowa puurɛ pee bii la ta’an maalɛ tuure se’a ti a nɛreba la eŋɛ ti la pa’alɛ ti ba sirum tee ya ge ka le tara taalɛ.​—Dekɛ makɛ Isa 53:10.

w09-E 6/1 26 ¶3

A Mi To Paŋa Tɛka Beene Mɛ

Lɔɔ la tɔɣɛ Yehowa giile yele ti: “A daana han kan ta’an bo pehego, a tare dayɛma ayi’ bii nadoma dayɛma ayi, na bo Na’ayenɛ.” (kaalegɔ zɛ’an 7) Yelebire la n de “a daana han kan ta’an bo” ta’an le pa’alɛ ti “a han ka tara.” Israel nɛra yuun san kan ta’an bo pesego ge tara la dayɛma ayi bii nadoma dayɛma ayi, Naayinɛ puurɛ wan pee.

w09-E 6/1 26 ¶4

A Mi To Paŋa Tɛka Beene Mɛ

Ge nɛra la san kan ta’an bo dayɛma bayi me? Lɔɔ la yeti; “a tare kisoma zom somɔ wola me’en [wola zom sugumnɔɔrɛ bunii bii buwai] te la dɛna be’em bo’olom.” (kaalegɔ zɛ’an 11) Sɛba n yuun de nasedoma la, Yehowa yuun bo yɔ’ɔ ti ba wan ta’an dekɛ sɛla n ka tari ziim bo bo’olum. Israel teŋa poan, nɛra yuun san dɛna nasa la ka pa’alɛ ti a kan ta’an nyɛ Naayinɛ kã’a bii a tara suma’asum la en.

Ɛɛra Vo’osum Poan Yɛla

w16.02-E 30 ¶14

Zamesɛ Sɛla Yehowa Yelemɛŋɛrɛ Yamesi Zɛ’an

Itisoŋɔ wan ta’an soŋɛ hɔ ti ho tara yelemɛŋɛrɛ. Makerɛ, ho ta’an mina ho Krista tadaana n tum be’em n de ninmɔ’ɔrɛ paa. Ho ta’an kelum bɔta ti ya teŋasuka ana soŋa yele yele wuu a san dɛna la ho suɔ bii ho zɔ. Ge ho san bɔta ti ho suɣɛ a be’em la, la wan pa’alɛ ti ho ka tari yelemɛŋɛrɛ bɔ’ɔra Naayinɛ. Nɔkpe’ene kai ti ho boti la Yehowa dɛna mina ti ho wan tara yelemɛŋɛrɛ bɔ’ɔra en yia. Wuu Natan la, tara itisoŋɔ ge da suɣɛ be’em. Kpemese ho zɔ la bii ho suɔ la giila ti a keŋɛ ta nyɛ keendoma la ti ba soŋɛ en. Ho san bisɛ ti a ka boti a yele keendoma la, hon tari yelemɛŋɛrɛ bɔ’ɔra Naayinɛ la zuo, homea wan ta’an dekɛ yele la biŋe keendoma la nɛŋan. Ho san eŋɛ bala, ho tari la yelemɛŋɛrɛ bɔ’ɔra Yehowa ge me tara itisoŋɔ bɔ’ɔra ho zɔ la bii ho suɔ la. Keendoma la wan soŋɛ en ti a malum ze’ele soŋa.​—Kaalɛ Malema 5:1; Galatia 6:1.

it-1-E 1130 ¶2

Zilam

Dusi La Boom. Naahɔ, pesego la bua san dɔɣɛ dundeeŋa n de bundɔɔ, la yuun dela Yehowa denɛ. Ba yuun ni kaabɛ ba mɛ bo Naayinɛ ge ti malemadoma la me ni to’e basɛba. (Kan 18:17-19) Dideeŋa la pia poregerɛ bo’olum dela zilam bo Naayinɛ wuu dusi kaabegɔ woo la bo’olum woo ti ba yuun ni tara bɔ’ɔra Naayinɛ sogorɛ la poan la. (Yɛh 28:38) Sɛla woo n yuun de Yehowa denɛ dela tuulum ge ti la ka nara ti ba dekɛ eŋɛ sɛla n ka nari. Makerɛ dela lɔɔ la n tɔɣeri pia poregerɛ yele la. Nɛra yuun ni san loe a ki pia poregerɛ biŋe ge ti a yire nɛra san ka mina ge loe eŋɛ sɛla, a daana tari la taalɛ la Naayinɛ bo’olum wa. Lɔɔ la yeti nɛra san eŋɛ bala, a yɔ pia poregerɛ la za’a ge me le yɔ kɔbega poan 20 pa’asɛ. Nɛrekaŋadaana nari ti a le dekɛ peraa n ani kasi kaabɛ bo Naayinɛ. Bala n sɔi ti ba yuun tara zoolum bɔ’ɔra Yehowa zilam bo’olum la.​—Mlm 5:14-16.

NOVEMBER 23-29

NAAYINƐ TUULUM YƐLA | MALEMA 6-7

“Farafara Bɔ’a”

w19.11-E 22 ¶9

To Wan Ta’an Zamesɛ Sɛla Malema Gɔŋɔ La Poan

Zaseŋɔ buyi: To puurɛ pee mɛ la Yehowa n bo to yɔ’ɔ ti to pu’usa en la. La wan eŋɛ se’em ti to ta’an bɔkɛ yele wa la, to wan geele suma’asum bo’olum yele n yuun pakɛ se’em yelemɛŋɛrɛ pu’usegɔ poan Israeldoma saŋa la. Malema gɔŋɔ la poan, to baŋɛ ti Israel nɛra yuun ta’an dekɛ suma’asum bo’olum eŋɛ kaabegɔ ti la pa’alɛ ti la dela “farafara bɔ’a.” (Mal. 7:11-13, 16-18) A yuun dekɛ bo’olum wa bo mɛ daɣɛ la a tari me zuo ge la dela sɛla n nari ti a eŋɛ. Ba yuun tari nɔŋerɛ bɔ’ɔra ba Naayinɛ Yehowa la zuo n sɔi ti ba yuun yese ba suure poan bo bo’olum la. Se’em daana n bo’ori bo’olum la, la a deodoma la malemadoma la wan laɣum di. Ge duŋa la bɔba ase’a yuun dela Yehowa ma’a denɛ. Duŋa la bɛ bɔba n de Yehowa denɛ?

w00-E 8/15 15 ¶15

Bo’olum Se’a N Peeri Naayinɛ Puurɛ

Leyɛ’ɛsa Malema gɔŋɔ la a zuo 3 la tɔɣɛ pupeelum bo’olum wa yele mɛ. Yu’urɛ wa ta’an le dɛna “Sunma’ahom bo’olom.” Hebru yetɔɣum poan, yelebire la n de “Sunma’ahom” la pa’alɛ la nɛra n ka yeen bɔna fai ti zaberɛ bii daaŋɔ ka paara en ma’a. “Baabule la poan, la pa’alɛ la hon wan tara suma’asum la Naayinɛ, nyaŋerɛ la pupeelum wuu Studies in the Mosaic Institutions gɔŋɔ la n pa’alɛ se’em la. Bala la, ba yuun ka bo’ori bo’olum ti la basɛ ti ba tara suma’asum la Naayinɛ ti la ana wuu yeledaaŋɔ n boi ti ba bɛlena en ge ba ni eŋɛ pa’alɛ ti ba puurɛ pee mɛ la ba tari suma’asum la Naayinɛ la eŋa n nam bo ba la zuo. Ba yuun ni san dekɛ ziim la duŋa kaam bo Yehowa, malemadoma la, la mina n bo’ori bo’olum la ni laɣum di kaabegɔ dia la mɛ. (Malema 3:17; 7:16-21; 19:5-8) Wɔ̃sum poan, se’em n bo’ori bo’olum la malemadoma la, ta’an ni laɣum di mɛ ti la pa’alɛ suma’asum sɛka n boi bamam la Yehowa teŋasuka se’em.

w00-E 8/15 19 ¶8

Bo’olum Se’a N Peeri Naayinɛ Puurɛ

Ge se’em n bo’ori bo’olum la me? Lɔɔ la yeti se’em woo n ye Yehowa zɛ’an nari ti a ana fa’a ge me ka gãlum. Se’em san gãlum, yia la, la nari ti a dekɛ be’em duusego bii tuure bo’olum bo ti la basɛ ti a le tara bɔnsoŋa la Yehowa la wan eŋɛ se’em ti A nam a nyɔ’a bo’olum la bii suma’asum bo’olum la. (Malema 5:1-6, 15, 17) To nini tiɣɛ ya la to wan basɛ ti tomam la Yehowa teŋasuka bɔŋa la dɛna ninmɔ’ɔrɛ bɔ’ɔra tɔ saŋa woo? To san bɔta ti Naayinɛ nam to pu’usegɔ la, to nari to basɛ ti Naayinɛ kisa la dɛmesa tɔ. La nari ti to ni eŋɛ kalam sakɛ Naayinɛ soŋerɛ la n de—“lagaŋɔ zuodoma” la, la “Yesu Krista kum la zuo te Yenɛ wan ta’an bahɛ to yelebe’ero bo to” la soŋɛ tɔ.​—Yames 5:14; 1 Yon 2:1, 2.

Ɛɛra Vo’osum Poan Yɛla

it-1-E 833 ¶1

Bugum

La yuun boi sogorɛ la, la pu’usegɔ deo la poan se’em. Ba yuun dekɛ bugum tum tuuma se’em sogorɛ la poan ge nyaa le dekɛ dɛ tum tuuma se’em pu’usegɔ deo la poan. Bulika la zaanɔɔrɛ woo, malema nɛŋadaana la ni nyɔ̃ la ko’ɛnka daka bimbine la zuo. (Yɛh 30:7, 8) Naayinɛ lɔɔ la yuun pa’alɛ ti bugum la n boi daka bimbine la zuo la nari ti la kɔ’ɔn dita saŋa woo. (Mlm 6:12, 13) Yudadoma yɛla yeti Naayinɛ ni doose la yelenyãlema sore poan basɛ ti bugum la laŋɛ. La boi bim ti nɛreba zo’e zo’e sakɛ la bala ge Baabule la ka yele bala. Yehowa n yuun dekɛ pa’alegɔ wa bo Moses la, Aron dayɔɔsi la yuun nari ti ba “toorɛ bugum daka la zuo, maalɛ dɔɔrɔ pagalɛ bo zuo” ge nyaa dekɛ bo’olum la biŋe daka bimbine la zuo. (Mlm 1:7, 8) Ba yuun loe Aron buuri ti ba dɛna malemadoma la ba’asɛ la, bilam ti ba yuun eŋɛ kaabegɔ bo Yehowa. Bugum sebo n yuun ze’ele Yehowa zɛ’an la ze’ele la sagbana poan sige na di sɛla ti ba kaabɛ la daka bimbine la zuo. Wana wa zuo, ti nyãlema bugum la yuun sige na ge daɣɛ ti la sige na dita la dɔɔrɔ la n boi kaabegɔ daka bimbine zuo la ge la dela eŋa n yuun basɛ “te bugum ze’ele Na’ayenɛ zen’en na di nyɔ’an bo’olom nɛnɔ la n pagɛ kaabegɔ daka la zuo la.” Bugum la n yuun boi daka la zuo dita la, yuun dela Naayinɛ bugum la n yuun sige na gɛregɛ la bugum sebo n boi daka bimbine la zuo dita la. (Mlm 8:14–9:24) Bala mea ti, Solomon n yuun kã pu’usegɔ deo la ba’asɛ la, bilam bilam ti nyãlema bugum yuun ze’ele Yehowa zɛ’an na di kaabegɔ la.​—2Ye 7:1; le bisɛ Ke 6:21; 1Na 18:21-39; 1Ye 21:26 makerɛ ase’a n pa’alɛ Yehowa n dekɛ nyãlema bugum wa tum tuuma se’em ti la niɛ peelum ti a nam a yamesi la kaabegɔ mɛ.

si-E 27 ¶15

Baabule Gɔŋɔ N Pa’asɛ 3​—Malema

(3) Nɛra yuun san ka mina ge tum be’em la nari ti a eŋɛ be’em kaabegɔ. Dunsɛka ti a wan dekɛ eŋɛ kaabegɔ la wan pa’alɛ la se’em n tum be’em la,la dela malemadaana, nɛreba la za’a, nabia bii la yeen dɛna la nɛra se’em deene. Nɛra yuun san tum be’em la yuun dela pɛregerɛ ti a eŋɛ be’em kaabegɔ ge la kan ana wuu suma’asum kaabegɔ la.​—4:1-35; 6:24-30.

NOVEMBER 30–DECEMBER 6

NAAYINƐ TUULUM YƐLA | MALEMA 8-9

“La Pa’alɛ La Yehowa Kã’a”

it-1-E 1207

Loe Malemadoma

Moses yuun sɔ Aron la a dayɔɔsi Nadab, Abihu, Eleazar la Itamar (bii a yuun yele ba ti ba pee bamesi) nyɔɣum laa la poan n boi zinzakan la ge nyaa dekɛ malema nɛŋadaana futo la yɛ Aron. (Kan 3:2, 3) Ba yuun dekɛ la lɔɣesoma baɣɛ Aron ti la pa’alɛ la halisoma la zugbere tuunse’ere ti a yuun tara. Moses nyaa yuun kã basɛ kaanbegɔ daka la zuo la lɔɣese’a woo ti ba tara tuna tuuma, la butolela la, la ka lɔɣɔrɔ la za’a la ko’ɛnka daka la, la ka lɔɣɔrɔ la za’a. Lɔɣɔtuna wa yuun nyaa wan dɛna la zilam lɔɣɔrɔ ti ba wan tara a tuna bɔ’ɔra Naayinɛ ma’a. Ba’asegɔ la, Moses nyaa yuun kã basɛ Aron zuo ge ka’ɛ kaam eŋɛ a zuo.​—Mlm 8:6-12; Yɛh 30:22-33; Ym 133:2.

it-1-E 1208 ¶8

Loe Malemadoma

Ba pɔsega poan dabesa anii daarɛ la, ti ba yuun maasum ba ge kumesɛ ba ba’asɛ la, ba yuun pɔsɛ malemadoma tuuma la mɛ (ti Moses ka soŋɛ ba.) Ba yuun eŋɛ la be’em duusego malema bo Israeldoma la daɣɛ la ba ka di mi’a la zuo ge ba daa nan kɔ’ɔn eŋɛ tubekirega yaɣebɛ salema nagebila ti Yehowa sunsɔa nyie la ba la. (Mlm 9:1-7;Yɛh 32:1-10) Malemadoma la n yuun tum tuunɛ wa ba’asɛ la, Yehowa yuun basɛ ti bugum n ani wuu sangbanɛ la sige sogorɛ la poan na di kaabegɔ bo’olum la bimbine la zuo ti la pa’alɛ ti a nam ba tuuma la mɛ ge ti a puurɛ me pee.​—Mlm 9:23, 24.

w19.11-E 23 ¶13

To Wan Ta’an Zamesɛ Sɛla Malema Gɔŋɔ La Poan

Zaseŋɔ bunaasi: Yehowa kã’ari bɔ’ɔra a tigere bɔbese’ere n boi teŋgɔŋɔ wa zuo la mɛ. Tɛra sɛla n yuun eŋɛ 1512 G.Y.B. se’em ma’a ti ba yuun maalɛ sogorɛ la Sinai Zoore la tilin la. (Yɛh. 40:17) Moses n yuun bisɛ ti ba loe Aron la a dayɔɔsi la ti ba dɛna malemadoma. Israeldoma la yuun laɣesɛ mɛ ti ba bisɛ ba tari dusi ita kaabegɔ se’em. (Mal. 9:1-5) Yehowa yuun eŋɛ la wani pa’alɛ ti a nam malemadoma la ti ba nan kɔ’ɔn loe ba la? Aron la Moses n yuun kã bo nɛreba la ba’asɛ la, Yehowa yuun basɛ mɛ ti bugum sige na di kaabegɔ la bimbine la zuo.​—Kaalɛ Malema 9:23, 24.

Ɛɛra Vo’osum Poan Yɛla

w14-E 11/15 9 ¶6

Sɛla N Sɔi Ti La Nara Ti To Dɛna Zilam

Yehowa n yuun boti ti Israel malemadoma la dɛna kasi iŋganɛ poan la dela sɛla yele n pakɛ a nɛreba zina beere wa. Sɛba ti to zamesa ba Baabule la nyɛti to ani filam se’em to lɔɣɔrɔ yɛa poan la to pu’usegɔ zɛ’ɛsi. Leyɛ’ɛsa me, malemadoma la n yuun de zilam la soŋɛ to mɛ ti to baŋɛ ti sɛba woo n boi Yehowa pu’usegɔ poan la, nari ti “ba sunya pelege.” (Kaalɛ Yooma 24:3, 4; Isa. 2:2, 3.) To san wan ta’an dekɛ pu’usegɔ n di mi’a bo Naayinɛ, la nari ti to puti’irɛ la to suure la to inya ana filam. Wana wa pa’alɛ ti, to viisa to mea bisɛ zɛ’an yele n pakɛ ti to wan ta’an eŋɛ teere ana filam. (2 Ko. 13:5) Makerɛ, nɛra n muse ko’om san mina fii ge bisera yalum fɔɔra nari ti a soke a mea yeti, ‘mam iti pa’ala ti n ani filam?’ Bala la, la nari ti ba soŋɛ en ti a ta’an basɛ sarum be’o wa.​—Yam. 5:14.

it-2-E 437 ¶3

Moses

Naayinɛ yuun doose la Moses poan dekɛ nɔbiŋere Lɔɔ la bo Israeldoma la yɔ’ɔ seko ti nɛra nan ka tabelɛ nyɛ san daɣena la Yezu Krista ma’a n de nɔbiŋere paalega la Teŋasukadaana la. Moses yuun nyaa dekɛ duŋa la ziim miise nɔbiŋere gɔŋɔ la n ze’ele bo Yehowa n de “bɔberɛ deyima” la, la nɛreba la woo teŋasuka (nɔkpe’ene kai ti bunkureba) la n ze’ele bo “bɔberɛ deyima” la me. A nyaa ni kaalɛ nɔbiŋere gɔŋɔ la bo nɛreba la mɛ ti ba yeti, “Na’ayenɛ n yele to sɛla woo la, te wan eŋɛ.” (Yɛh 24:3-8; Heb 9:19) Moses n de ba teŋasukadaana la tari yɔ’ɔ ti a bisɛ ti ba maalɛ sogorɛ la, la ka lɔɣɔrɔ wuu Naayinɛ n dekɛ pa’alegɔ bo ba se’em la. A me le loe malemadoma la ge nyaa kã basɛ sogorɛ la zuo, la Aron n de malema nɛŋadaana la zuo. A yuun nyaa pɔsɛ bisɛ la tuunse’ere n deŋɛ nɛŋa ti malemadoma la nara ti ba tum la.​—Yɛh zuo 25-29; Mlm zuo 8 la 9.