Bem N Wan Soŋɛ Mam Ti N Tara Beere Sa’am Puti’irɛ?

Baabule la lebesego

Baabule la yeti Naayinɛ boti la a ‘basɛ ti la beere ta ana soŋa bɔ’ɔra tɔ.’a (Yeremia 29:11) Yele deyima zuo ti Naayinɛ dekɛ Baabule la bo to dela, la wan eŋɛ se’em ti doose “la subuɣelegɔ la n boi Gulesegɔ la poan la, to wan tara beere sa’am puti’irɛ.” (Arom 15:4) To wan baŋɛ ti Baabule ka’aŋɔ ta’an basɛ ti to tara putɛsonɛ, la ka pakɛ la daaŋɔ seto n paari tɔ. Baabule la kelum pu’ulumbiŋe ti beere sa’am wan ta ana soŋa.

Sɛla n boi

Baabule la soŋeri tɔ ti to tara beere sa’am puti’irɛ la wani?

Baabule la pa’ali to la to wan eŋɛ se’em ta’an tara vom somɔ. Bala wan soŋɛ tɔ ti to tara beere sa’am puti’irɛ. Geele makerɛ ase’a bisɛ.

Ee kaaŋɔ Baabule la poan. Yooma 119:105 yeti: “Ho yelesum la dela kania bo mam nama ge dɛna nɛɛsum bo mam n sore zuo.” Nɛɛsum ta’an soŋɛ tɔ ti to eŋɛ yɛla ayi. La ta’an soŋɛ tɔ ti to baŋɛ sɛla n kɔ’ɔn bɔna to nɛŋan. La me ta’an soŋɛ tɔ ti to nyɛ sɛla n boi zãzaarɛ. Bala mea nɔɔ ti Baabule naresum yɛla me wan ta’an soŋɛ tɔ ti to ŋmibe daaŋɔ seto n paari to nananawa la poan ge me tara beere sa’am puti’irɛ daarewoo. Baabule pa’alegɔ ta’an soŋɛ tɔ ti to malum nyɛ paŋa la ‘pupeelum to suuren.’ (Yooma 19:7, 8) Leyɛ’ɛsa, Baabule la pa’alɛ la Naayinɛ puti’irɛ n de se’em bɔ’ɔra asaala, la tinparɛ wa. Beere sa’am puti’irɛ wa ta’an basɛ ti to tara pupeelum wuusa.
Basɛ ti nɛreba soŋɛ hɔ. La san ana wuu to vom ka tari vuurɛ la, to ta’an ni ka bɔta ti to naɛ la to deodoma bii to zɔdoma sɔsa. Baabule la yele to yeti la ka nari ti to ita bala, sɛla n sɔi la bala ta’an basɛ ti to tum sɛla n ka nari. (Magaha 18:1) To deodoma bii to zɔdoma ta’an soŋɛ tɔ ti to ti’isa yɛla ti la makera. Ba me ta’an pa’alɛ tɔ to wan eŋɛ se’em ta’an ŋmibe yele poan. (Magaha 11:14) Ba ta’an buɣela to suure ge pɛɣera tɔ. Bala me ta’an bo to paŋa ti to ŋmibera ta paɛ se’em ma’a ti yɛla sɔna bɛ’ɛna.—Magaha 12:25.
Zusa Naayinɛ. Baabule la yeti: “Dekɛ ho yeledaaŋɔ za’a bo Yehowa ge a wan soŋɛ hɔ. A kan makɛ basɛ ti tontɔɔdaana lui.”b (Yooma 55:22) Baabule la yeti Yehowa dela “Naayinɛ se’em n basɛ ti to tara beere sa’am puti’irɛ.” (Arom 15:13) Ho ta’an tɔɣɛ ho “putɛyiila” za’a bo en ge tara sakerɛ ti a fabeli ho yele mɛ. (1 Peter 5:7) Yelemɛŋɛrɛ, Baabule la yeti: “A wan basɛ ti ya kpe’em, a wan bo ya paŋa, a wan basɛ ti ya zɛ’a kankaŋi.”—1 Peter 5:10.
Basɛ ti wuŋerɛ seto n paari ho la soŋɛ hɔ ti ho tara beere sa’am puti’irɛ. Baabule la yeti: “Sɛba n keleseri [Naayinɛ] boi la fai ti sɛsɛla ka daana ba.” (Magaha 1:33) Pɔka ayima n boi Australia tiŋa ti a yu’urɛ dɛna Margaret. Kusebekãtɛ n daa sa’am a yire, la a lɔɣɔrɔ zo’e zo’e. A daa ka basɛ ti bala sa’am a suure ta gaŋɛ ge a tuɣum zamesɛ la yɛm yele la poan. A nyaa bɔkɛ ti innaanɛ lɔɣɔrɔ ka yuuri ge sa’ana. Nananawa, a nyaa kɔ’ɔn ita la yelese’a n pakɛ n de wuu a nyɛta nɛŋa bɔ’ɔra a deodoma la a zɔdoma ge me tara bɔnsoŋa la Naayinɛ. A me kɔ’ɔn ti’isa Baabule la n tɔɣɛ beere sa’am puti’irɛ la yele mɛ.—Yooma 37:34; Yames 4:8.

Baabule la pa’alɛ ti nɛresaaleba tari la bem beere sa’am puti’irɛ?

Baabule la yeti beere sa’am, tingɔŋɔ wa wan ana soŋa bɔ’ɔra nɛresaaleba. Yele wa me kan yue ge tum. Yelemɛŋɛrɛ la dela, daaŋɔ seto n paari nɛresaaleba zina beere wa pa’alɛ ti to boi la tingɔŋɔ wa “ba’asegɔ dabesa” la poan. (2 Timoti 3:1-5) La kan yue, Naayinɛ wan bisera tingɔŋɔ wa ge yese ŋmɛlema tuuma la mɛlesegɔ basɛ. A wan doose la Naayinɛ Na’am la poan n nyaa wan dɛna tingɔŋɔ wa gɔmɛt la tum tuunɛ wa. (Daniel 2:44; Liligere 11:15) Yezu yuun tɔɣeri la saazuo gɔmɛt wa yele se’em ma’a ti a yuun zusɛ yeti: “Basɛ ti ho Na’am la wa’ana. Basɛ ti ho puti’irɛ n boti sɛla la tum tingɔŋɔ wa zuo.”—Matu 6:9, 10.

Baabule la kɔ’ɔn pa’alɛ Naayinɛ n tari putɛse’ere bɔ’ɔra nɛresaaleba mɛ. Geele yɛla ase’a ti Naayinɛ Na’am la wan yese basɛ:

Kom kan le bɔna. “Tinparɛ wa wan wɔm, la lɔɣɔrɔ zo’e zo’e.”—Yooma 67:6.
Bã’asi kan le bɔna. “Nɛra ka boi n wan ta yeti: ‘Mam bɛ̃’ɛri mɛ.’”—Isaiah 33:24.
Kum kan le bɔna. Naayinɛ “wan duuse [asaaleba] nintam ba nini poan basɛ, ti kum kan le bɔna, susa’aŋɔ la kaasega la induuma kan le bɔna. Yelekɛɣesi la toli ya.”—Liligere 21:3, 4.

a To ni tara puti’irɛ gura la sɛla ti to nɔŋɛ ge me mina ti to wan ta’an nyɛ dɛ. Beere sa’am puti’irɛ me ta’an dɛna sɛla ti to gura.

b Baabule la pa’alɛ ti Naayinɛ yu’urɛ dela Yehowa.—Yooma 83:18.

Baabule kaalegɔ zɛ̃’ɛsi n tɔɣeri beere sa’am puti’irɛ yele

Yob 5:16: “Tarema tari puti’irɛ mɛ.”

Vuurɛ: Nɛresɛba n bisɛ ti ba ka tɛ̃ri bamam yele tingɔŋɔ wa zuo la, ta’an tara sakerɛ ti Naayinɛ wan soŋɛ ba, ba san zusa en.

Yooma 27:14: “Dekɛ homea delum Yehowa; tara sukpe’ene ge basɛ ti ho suure tara paŋa. Dekɛ homea delum Yehowa.”

Vuurɛ: To san tara sakerɛ Yehowa Naayinɛ poan, la ni basɛ ti to tara la sukpe’ene ge ti to giila kpeŋe. Naayinɛ kan basɛ sɛba n dekɛ bamesi delum en la.

Yooma 62:5: “Mam ani baalam gura la Naayinɛ ma’a. Se’ere n sɔi la, mam puti’irɛ boi la eŋa poan.”

Vuurɛ: Nɛresɛba n dekɛ bamea delum Naayinɛ ge di’isa suure ŋmibera daaŋɔ seto n paari ba la, ta’an tara sakerɛ ti Naayinɛ wan maalɛ ba yɛla bo ba sansɛka n nari poan.

Magaha 20:22: ‘Da yeti n wan lerege be’em. Gura Yehowa ti a soŋɛ hɔ.’

Vuurɛ: Nɛra san eŋɛ sɛla ti la daam tɔ bii nyie to sunsɔa, to kan ɛɛra to lerege sanɛ, to san tara puti’irɛ Yehowa poan. A tari pansɛka n wan fãɛ to basɛ mɛ ge maalɛ daaŋɔ seto woo n paari to la. Naayinɛ n kɔ’ɔn bɔta ti a eŋɛ sɛla n bala.

Hebru 6:19: “To tari [la Kristakɔma] beere sa’am puti’irɛ n ani wuu ba’arɛ n bo’ori to vom, de kɔ’ɔn zɛ’a mɛ kankaŋi.”

Vuurɛ: Ba’arɛ n ni gurɛ ɔɔreŋɔ ti ka zɛ’a kankaŋi se’em ma’a ti sabeo vukera. Bala mea ti to san tara puti’irɛ ti Naayinɛ beere wan ta kã bo to, la ta’an soŋɛ tɔ ti to kan tara putɛyiila. La wan ana to mama, ti to ti’isa soŋa ge me basɛ ti to sakerɛ kpe’em. To beere sa’am puti’irɛ la me ta’an bo to paŋa ti to ŋmibera daaŋɔ poan.