**Baabule La Yeti Bem La Naaŋɔ Lɔɣɔrɔ Zamesegɔdoma N Ŋmɛregɛ Tingɔŋɔ Wa Sa’aŋɔ Daarɛ Watch La Keŋɛ Nɛŋa La?**

January 24, 2023 poan ti naaŋɔ lɔɣɔrɔ zamesegɔdoma ŋmɛregɛ Tingɔŋɔ Wa Sa’aŋɔ Daarɛ Watcha la ti la gee fii la paɛ yu’unsunsua karefa 12 ti la pa’alɛ ti tingɔŋɔ la ba’asegɔ pɔ̃ri mɛ.

AFP International Text Wire la yeti: “Yelese’a n iti tingɔŋɔ wa poan maɣesɛ wuu tingɔŋɔ wa yɛla n teere se’em, Ukraine zaberɛ, la tisi ase’a n maalɛ nuclear bombedoma tara vuusa nɛreba la, naaŋɔ lɔɣɔrɔ zamesegɔdoma viisɛ de poan mɛ. Atalatadaarɛ ti ba yeti la kan yue nɛreba wan sa’am tingɔŋɔ wa. Bala la, ba pa’alɛ ti la gee fii ti ‘Tingɔŋɔ Wa Sa’aŋɔ Daarɛ Watch’ la ŋmɛregɛ paɛ yu’unsunsua karefa 12.”.
ABC lasebaarɛdomayeti: “Atalatadaarɛ la ti naaŋɔ lɔɣɔrɔ zamesegɔdoma yeti ‘Tingɔŋɔ Wa Sa’aŋɔ Daarɛ Watch’ la gee la kiki 90 ti la ŋmɛregɛ paɛ yu’unsunsua karefa 12. Asaaleba kɔ’ɔn pɔ̃ra sa’aŋɔ mɛ.”
The Guardian gɔŋɔ la yeti: “Naaŋɔ lɔɣɔrɔ zamesegɔdoma n ze’ele tisi zo’e zo’e poan kaɣɛ tɔ ti, yɛla n keni se’em la, la kan yue asaaleba wan sa’am bamesi.”.

Tingɔŋɔ wa la asaaleba sa’aŋɔ kɔ’ɔn pɔ̃ra mɛ? La nari ti to zɔta dabeem la sɛla n wan eŋɛ beere sa’am la yoi? Baabule la yeti bem?

Sɛla n wan eŋɛ beere sa’am

Baabule la pa’alɛ ti, ‘tinparɛ wa gã la bala yɛ’ɛsa’ ti nɛreba me wan ‘bɔna ka poan yɛ’ɛsa.’ (Pa’ala 1:4; Yooma 37:29) Bala la, asaaleba kan sa’am tingɔŋɔ la bii basɛ ti la paɛ beene se’ere ti nɛreba kan ta’an kɛ̃’ɛra ka poan.

Ge Baabule la pa’alɛ ti ba’asegɔ daarɛ boi mɛ. Makerɛ, la yeti ‘tingɔŋɔ wa wan tole.’—1 Yon 2:17.

Ho san bɔta ti ho baŋɛ Baabule la n tɔɣɛ tingɔŋɔ wa ba’asegɔ yele se’em, kaalɛ zaseŋɔ yele la zuo n de “Is the World Coming to an End? What Is the Apocalypse?” (Tingɔŋɔ La Yeti La Sa’am Mɛ Yoi? Baabule La Yeti Sɛla Woo Wan Sa’am Mɛ Yoi?)
Ho san bɔta ti ho zamesɛ baŋɛ Baabule la n tɔɣɛ sansɛka la yelese’a n wan eŋɛ ge ti ba’asegɔ la paɛ, kaalɛ zaseŋɔ yele la zuo n de “When Will the World End?” (Sankani Ti Tingɔŋɔ La Wan Sa’am?)

Tara putɛsonɛ

Baabule la wan ta’an soŋɛ tɔ ti to tara putɛsonɛ la ka pakɛ la tingɔŋɔ wa yeledaaŋɔ la n ani se’em. Sodeni poan?

Baabule la bo’ori to la pa’alegɔ n wan soŋɛ tɔ. (2 Timoti 3:16, 17) Makerɛ, kaalɛ zaseŋɔ yele la zuo n de “How to Control Worry” (Hon Wan Eŋɛ Se’em Ŋmibe Yeledaaŋɔ Poan) ge baŋɛ Baabule la n wan ta’an soŋɛ ho se’em ti ho tara putɛsonɛ la ka pakɛ la tingɔŋɔ wa yeledaaŋɔ la.
Baabule la pa’alɛ ti to wan ta’an tara beere sa’am puti’irɛ. (Arom 15:4) La basɛ ti to baŋɛ yelese’a n iti nananawa la yelese’a n wan eŋɛ beere sa’am. Bala basɛ ti to ŋmibera mɛ la yelese’a woo n paari to la.

Ho san bɔta ti ho baŋɛ yɛla zo’e zo’e pa’asɛ, to beem ho ti ho basɛ ti to zamesɛ ho Baabule la zaŋa.

a Bulletin of the Atomic Scientists la yeti “Tingɔŋɔ Wa Sa’aŋɔ Daarɛ Watch la dela sɛla ti naaŋɔ lɔɣɔrɔ zamesegɔdoma dekɛ kaɣɛ tɔ ti tingɔŋɔ wa sa’aŋɔ pɔ̃ri mɛ. Ba pa’alɛ ti yelese’a ti asaaleba maalɛ, n de wuu bombedoma n wan basɛ ti tingɔŋɔ wa sa’am. La basɛ ti to baŋɛ tingɔŋɔ wa ba’asegɔ la n pɔ̃ri se’em. Bala basɛ ti to mina yelese’a n wan basɛ ti tingɔŋɔ la sa’am ge me mina ton wan eŋɛ se’em ta’an maalɛ ka kɛ̃’ɛra ka poan.”