Naayinɛ Na’am La Dela Bem?

1. Naayinɛ Na’am la dela bem?

Naayinɛ Na’am la dela saazuo gɔmɛt. Gɔmɛt kana n wan sa’am gɔmɛt woo ge basɛ ti Naayinɛ puti’irɛ tum saazuo sa la teŋgɔŋɔ wa. Naayinɛ Na’am la yɛla dela yelesoma. La kan yue Naayinɛ Na’am la wan tari gɔmɛt soŋa wa’ana bo asaala. La wan basɛ ti nɔyinɛ bɔna nɛreba teŋasuka teŋgɔŋɔ wa zuo.​—Kaalɛ Daniel 2:44; Matu 6:9, 10; 24:14.

So’olum woo tari naba mɛ. Yehowa loe la a Dayɔa Yezu Krista ti a dɛna A Na’am la Naba.​—Kaalɛ Liligere 11:15.

Bisɛ Naayinɛ Na’am La Dela Bem? vidiyo la

2. Bem zuo ti Yezu nara ti a dɛna Naba?

Sɛla n sɔi ti Naayinɛ Dayɔa la nara ti a dɛna Naba la dela, a tari la itisoŋɔ ge ni kɔ’ɔn sɛ ze’ele ita sɛla ani soŋa. (Matu 11:28-30) Leyɛ’ɛsa, a me tara kpe’eŋɔ n wan nyaŋɛ soŋɛ nɛreba sɛla n sɔi la a wan bɔna saazuo ge bisa teŋgɔŋɔ wa. Ba yun isige en kum poan la, a yun zom la saazuo ta zi’ire Yehowa zuɔ nu’o. (Hebru 10:12, 13) Pooren la, Naayinɛ bo en la kpe’eŋɔ ti a bisa.​—Kaalɛ Daniel 7:13, 14.

3. Bani wan naɛ la Yezu bisa?

Sɛba ‘n de zilam nɛreba la’ wan naɛ la Yezu saazuo sa bisa. (Daniel 7:27) Zilam nɛreba la n tari sakerɛ ti ba loe ba yia la yun dela Yezu tuntuneba. Yehowa loe la buraasi la pɔɣesi n de zilam nɛreba n tari sakerɛ ta paɛ zina. Maɣesɛ wuu Yezu la, ba mɛ isige la kum poan nyaa tara vo’osum inya.​—Kaalɛ Yon 14:1-3; 1 Korint 15:42-44.

Nɛreba ba lɛ n wan zom saazuo sa? Yezu yun yeti ba dela ‘pigilepika.’ (Luke 12:32) Ba za’a wan dɛna la 144,000. Ba wan naɛ la Yezu bisa teŋgɔŋɔ wa.​—Kaalɛ Liligere 14:1.

4. Yezu n yun pɔsɛ bisa la bem n yun eŋɛ?

Naayinɛ Na’am la pɔsɛ bisa la yuun 1914.a Yezu n de Naba la yun pɔsɛ dige la Sitaana la a kolekpabɛ’ɛsi basɛ teŋgɔŋɔ wa zuo na. Sitaana sunsɔa yun nyiie mɛ ti a tara daaŋɔ paara teŋgɔŋɔ wa. (Liligere 12:7-10, 12) Kɔ’ɔn pɔsɛ san kaŋa la asaala yeletooro kɔ’ɔn malum gana la bala. Zaberɛ, kom, bãyaalesi la teŋmiiŋɔ laɣum pa’asɛ la “yelese’a n iti” pa’alɛ ti Na’am la wan soe bisa teŋgɔŋɔ wa.​—Kaalɛ Luke 21:7, 10, 11, 31.

5. Naayinɛ Na’am la wan nyaŋɛ eŋɛ la bem?

Naayinɛ Na’am la doose la na’am mɔɔlegɔ tuuma la poan basɛ ti nɛreba zo’e zo’e n yese tisi buuri buuri tara nɔyinɛ. Nɛreba tustusa n siregere bamea nyaa doli la Yezu poore. Naayinɛ Na’am la wan sa’am bɔŋa wa poan n ani se’em wa ge te’ele a nɛreba. Bala, mina woo n boti a nyɛ Naayinɛ Na’am la nyɔɔrɔ nari ti a kelesa Yezu.​—Kaalɛ Liligere 7:9, 14, 16, 17.

Naayinɛ wan dekɛ yuun 1,000 basɛ ti a Na’am la tum putɛse’ere ti a tara bɔ’ɔra asaala la. Teŋgɔŋɔ wa za’a wan lebege paradiisi. Ba’asegɔ la poan, Yezu wan le dekɛ Na’am la bo a Sɔ. (1 Korint 15:24-26) Ho wan bɔta ti ho yele nɛra Naayinɛ Na’am la n wan eŋɛ sɛla?​—Kaalɛ Yooma 37:10, 11, 29.