ZASEŊƆ 6
David Yuun Ka Zoti Dabeem
Dabeem san tara hɔ, ho ni eŋɛ la wani?— Daanse’ere ho ni zɔ keŋɛ la ho sɔ bii ho ma zɛ’an ti a soŋɛ hɔ. Ge nɛra ayima me n boi n wan ta’an soŋɛ ho. Eŋa n tari paŋa gana nɛra woo. Hon mi n de mina?— Ɛɛ, a dela Yehowa Naayinɛ. Basɛ ti to sɔsɛ bunbilipaalega ayima yele ti a yu’urɛ dɛna David Baabule la poan. A yuun ka zoti dabeem sɛla n sɔi la a mi ti Yehowa wan soŋɛ en tɛm woo.
David n yuun de bilia la, a dɔɣereba yuun pa’alɛ en la Yehowa yɛla. Bala n yuun soŋɛ David ti a ka zɔta dabeem hali sɛla san eŋɛ en ti a paleŋa ɛkɛ. A yuun mi ti Yehowa dela a zɔ ge me wan soŋɛ en. Daarɛ deyima ti gbiɣenɛ yuun ta zɛ David piisi la ti a gura la a yima! Hon mi David n yuun eŋɛ se’em? A yuun tabegɛ gbiɣenɛ la mɛ ta ku en la nu’usi! Leyɛ’ɛsa, ti saseŋa yuun le zɛ a pesego ti David le tabegɛ ta ku eŋa me! Hon ti’isɛ ti ani n yuun soŋɛ David?— Yehowa n yuun soŋɛ en.
Daarɛ deyima ti David yuun le eŋɛ pa’alɛ ti a tari sukpe’ene. Israeldoma yuun zaberɛ mɛ la nɛreba basɛba ti ba yi’ira ba Pilistidoma. Pilistidoma la soogɛa ayima yuun tari la paŋa ge wɔɣɛ! A yu’urɛ yuun dela Goliat. Paŋa daana wa yuun zeeni Israeldoma soogɛpa la mɛ la Yehowa. Goliat yuun yele Israeldoma soogɛpa la ti ba san tara paŋa ba wa’ana zabɛ la en. Ge Israeldoma la yuun zoti la dabeem ti ba zabɛ la en. David n yuun wum bala la, ti a yele Goliat yeti: ‘Mam wan zabɛ la hɔ! Yehowa wan soŋɛ mam ti n zabɛ nyaŋɛ hɔ!’ Hon ti’isɛ ti David yuun tari sukpe’ene?— Ɛɛ, a yuun tari. Ho boti ho baŋɛ sɛla n yuun eŋɛ pooren?
David yuun dekɛ la kuga anuu la kalɔbega keŋɛ ti a ta zabɛ la paŋa daana la. Goliat n yuun nyɛ David n de bunbilipaalega ge paara a zɛ’an la, a yuun zeem David mɛ. Ge David yuun yele en yeti: ‘Ho dekɛ la su’a ti ho zabɛ la mam ge mam dekɛ la Yehowa yu’urɛ tu’usa hɔ!’ Ge nyaa dekɛ kugere eŋɛ kalɔbega poan lobe Goliat. Ti kugere la firɛ Goliat gbe’ere! Ti paŋa daana la lui ki! Ti dabeem yuun kɛ̃ Pilistidoma la ti ba zɔ. La yuun eŋɛ la wani ti David n de bunbilipaalega la nyaŋɛ paŋa daana wa?— Yehowa n yuun soŋɛ en! Yehowa dela paŋa za’a daana
David yuun ka zoti dabeem sɛla n sɔi la a mi ti Yehowa wan soŋɛ en
To wan zamesɛ la bem yese David yele wa poan?— Yehowa dela paŋa daana gana nɛra woo. A dela ho Zɔ. Bala la, dabeem san tara hɔ tɛra ti Yehowa wan basɛ ti ho tara sukpe’ene!