ZASEŊƆ 10
Yezu Yuun Kɔ’ɔn Nana Mɛ
La ni dɛna naana bo ho ti ho nana ho dɔɣereba?— Tɛm bo sebo la ni kpe’em mɛ. Hon mi ti Yezu yuun nani Yehowa la a dɔɣereba mɛ?— A makesonɛ la wan ta’an soŋɛ ho ti ho nana ho dɔɣereba la san puɣum daɣena naana. Basɛ ti to zamesɛ a makesonɛ wa.
Yezu yuun naɛ la a Sɔ, Yehowa, bɔna la saazuo sa ge nyaa baŋɛ wa’an teŋgɔŋɔ zuo na. Ge Yezu me yuun tari dɔɣereba teŋgɔŋɔ wa zuo mɛ. Ba yu’ura yuun dela Yosef la Maria. La yuun eŋɛ la wani ti ba dɛna a dɔɣereba?—
Yehowa yuun dekɛ la Yezu vom ze’ele saazuo sa eŋɛ Maria puurɛ poan, la wan eŋɛ se’em ti a ta’an dɔɣɛ Yezu teŋgɔŋɔ wa zuo. La yuun dela yelekiriga! Yezu yuun bi’ɛ la Maria puurɛ poan wuu kɔma n bi’iri ba madoma puuren se’em la. Ŋmaresi siwaɛ poan ti a dɔɣɛ Yezu. La yuun eŋɛ se’em n bala ti Maria la a sira, Yosef, yuun wa dɛna Yezu dɔɣereba teŋgɔŋɔ wa zuo.
Yezu n yuun paɛ yuun 12 la, a yuun eŋɛ la sɛla pa’alɛ ti a nɔŋɛ a Sɔ, Yehowa. La yuun eŋɛ la tɛm sebo ti Yezu la a dɔɣereba yuun keŋɛ Yerusalem ti ba ta de’em Azootole De’eŋo la. Ge Yosef la Maria n yuun leberi kula la, ba yuun ka nyɛ Yezu n boi zɛ’an. Hon mi en yuun boi zɛ’an?—
Beni n sɔi ti Yezu yuun bɔna Naayinɛ yire la?
Yosef la Maria yuun kãbelɛ lebe la Yerusalem ta ɛɛra Yezu zɛ’an woo. La yuun daam ba mɛ la ba yuun ka nyɛ en la. Ge dabesa atã poan ti ba yuun nyɛ en Naayinɛ yire. Hon mi sɛla n sɔi ti Yezu yuun bɔna Naayinɛ yire la?— Sɛla n sɔi la bilam a yuun wan ta’an zamesɛ a Sɔ, Yehowa yele. A yuun nɔŋɛ Yehowa mɛ ge bɔta a bisɛ eŋa n wan eŋɛ se’em pee a puurɛ. Hali en yuun ta dɛna bunkutɛ la, Yezu yuun kɔ’ɔn nana Yehowa mɛ. Yezu yuun kelum nana mɛ, la yuun san puɣum kpe’em la se’em me ge dɛna ti a namesɛ. Yezu me yuun nani Yosef la Maria mɛ?— Ɛɛ, Baabule la yeti a yuun nani ba mɛ.
Hon zamesɛ la bem yese Yezu makesonɛ wa?— La nari ti ho nana ho dɔɣereba, la san puɣum kpe’em la se’em me. Ho wan nana ba?—