Timoti Yuun Soŋeri La Nɛreba

Timoti yuun dela budibilepaalega puurɛ n pee ti a soŋera nɛreba. A yuun keŋɛ la tisi zo’e zo’e ta soŋɛ nɛreba. Eŋa n yuun iti bala la n sɔi ti a tara pupeelum. Hon wan bɔta ti ho baŋɛ a yele?​—

Timoti yuun zo’e la Listra teŋa. Eŋa n yuun de bia la ti a mayaaba Lois la a ma, Eunise yuun pa’ala en Yehowa yɛla. Timoti n yuun zo’ori la, a yuun boti la a soŋɛ nɛreba ti ba baŋɛ Yehowa.

Timoti n yuun de budibilepaalega la, Paul yuun yele en ti a doose en keŋɛ ti ba ta mɔɔlɛ yetɔɣum la tisi sisesi poan. Ti Timoti yuun sakɛ: ‘Ɛɛ!’ A yuun kɔ’ɔn bɔta la a keŋɛ ta soŋɛ nɛreba basɛba.

Timoti yuun doose Paul keŋɛ la Tesalonika n boi Makedonia teŋa poan. Teŋa la yuun zaɛ mɛ, ti ba keŋɛ nama ta dekɛ ɔɔreŋɔ yakɛ. Ba yuun paɛ la, ba soŋɛ nɛreba zo’e zo’e mɛ ti ba baŋɛ Yehowa. Ge nɛreba basɛba sunsɔa n yuun nyie ti ba bɔta ba daam ba. Bala la, Paul la Timoti yuun basɛ teŋkaŋa mɛ ge keŋɛ tisi sisesi.

Ŋmaresi fii n yuun tole la, Paul yuun yele Timoti ti a lebe Tesalonika ta bisɛ ba ani se’em. La yuun dela a tara sukpe’ene ge ta’an lebe teŋa wa nɛreba n ka nɔŋɛ ba yele la! Ge mabiisi la yele n yuun pakɛ Timoti la n sɔi ti a yuun lebe ba zɛ’an. A yuun lebe ta yele Paul la yelesonɛ. To mabiisi la n boi Tesalonika la kɔ’ɔn mɔɔra mɛ!

Timoti yuun naɛ la Paul tum mɛ yuuma zo’e zo’e. Paul tabelɛ gulesɛ yeti, Timoti n de mina ti a wan tum ti a ta’an soŋɛ tansuga la. Timoti yuun nɔŋɛ Yehowa la nɛreba mɛ.

Hon nɔŋɛ nɛreba ge bɔta ti ho soŋɛ ba ti ba zamesɛ baŋɛ Yehowa?​— Ho san ana bala, ho wan tara pupeelum wuu Timoti!