Tari Ya Nɔŋerɛ Bɔ’ɔra Taaba

Yehowa boti la to “nɔŋɛ” taaba. (Mika 6:8) La dela ninmɔ’ɔrɛ yele pɔɣedire poan sɛla n sɔi la nɔŋerɛ wan basɛ ti ya giile kɛ̃ taaba. Nɛreba suure san kɛ̃ taaba, bala n wan basɛ ti ba tara nɔŋerɛ bɔ’ɔra taaba.

Zina beere wa, nɔŋerɛ ka boi pɔɣedire poan. Ho san bɔta ti ho te’ele ho pɔɣedire, la dela ho tiregɛ dekɛ yɛla ayi tum tuuma.

1 BASƐ TI HO PƆƔEDIRE YELE PAKƐ HƆ

BAABULE LA N YELE SE’EM: “Eta sɛla n de ma’an.” (Filipi 1:10) Ho pɔɣedire laɣum dɛna la ninmɔ’ɔrɛ yele ho vom poan. La nari ti la dɛna sɛla n de yia.

Yehowa boti la ho puti’irɛ bɔna ho pɔɣa bii ho sira poan ti ya “dita vom nyɛlom.” (Pa’ala 9:9) A basɛ ti ho baŋɛ ti la ka nari ti ho tamɛ ho sira bii ho pɔɣa yele ge ya tuɣum bisɛ ya wan eŋɛ se’em peera taaba puurɛ. (1 Korint 10:24) Basɛ ti ho pɔɣa bii ho sira mina ti a yele pakɛ hɔ.

HON WAN TA’AN EŊƐ SƐLA:

• Tara nɛŋa bɔ’ɔra ho pɔɣa bii ho sira ge kɛlesa sɛla woo ti a yɛta hɔ

• Ho yetɔɣum poan ni yeti “tomam” ge daɣɛ “mam”

2 GU HO SUURE

BAABULE LA N YELE SE’EM: “Ge mam yeti ya te se’em woo n behɛ pɔka, ge tɛn’ɛha te ka nare ne enŋa gan’anrɛ la ka a potɛn’ɛrɛ poan, pon gan’anrɛ ka mɛ n bala.” (Matu 5:28) Nɛra san ti’isa yalumtuuma yɛla la pa’alɛ ti a ka tari nɔŋerɛ bɔ’ɔra a sira bii a pɔɣa.

Yehowa yeti, ‘gu ho suure.’ (Magaha 4:23; Yeremia 17:9) Ho wan nyaŋɛ eŋɛ bala ho puti’irɛ san ka bɔna yɛla a se’a poan. (Matu 5:29, 30) Tɔɣesa daami nɛra Yob n yuun yeti eŋa biŋe la nɔɔrɛ la a nini ti a ka malum bisɛ pɔka tara kunkoma’asum la en. (Yob 31:1) Eŋɛ ho puti’irɛ ti ho kan malum bisɛ yalum fɔɔra. Da sarena la nɛra ti ho suure ta kɛ̃ en gana ho pɔɣa bii ho sira.

HON WAN TA’AN EŊƐ SƐLA:

• Basɛ ti nɛreba baŋɛ ti ho suure kɛ̃ ho pɔɣa bii ho sira mɛ

• Ti’isɛ bisɛ la wan ana ho pɔɣa bii ho sira se’em ge eŋɛ kalam basɛ mina ti hon la eŋa sarena la